دەپارتامەنت باسشىسى ءاليا امانجولوۆانىڭ ايتۋىنشا, بۇگىندە ءوڭىر تۇرعىندارىنا ونلاين رەجىمدە قۇقىقتىق كومەك كورسەتەتىن «E-ZanKomegi» بىرىڭعاي قۇقىقتىق كومەك اقپارات جۇيەسى قىزمەت كورسەتەدى. اتالعان جۇيەگە 2 مىڭعا جۋىق زاڭ كەڭەسشىسى مەن قورعاۋشى تىركەلگەن. مىسالى, كەيىنگى ەكى جىل ىشىندە 7 مىڭعا جۋىق تۇرعىن وسى پورتالعا كىرىپ, بىلىكتى زاڭ ماماندارىنىڭ كومەگىن العان. سونداي-اق اقپاراتتىق جۇيە ارقىلى 88 738 ءىس قارالعان.
تاياۋدا قۇقىقتىق اقپارات قىزمەتى وپەراتورلارى «بەينەقوڭىراۋ» قىزمەتىن ىسكە قوستى. بۇل ازاماتتارعا تاۋلىك بويى قۇقىقتىق كەڭەس الۋعا مۇمكىندىك بەرەدى. قازىرگى تاڭدا جاساندى ينتەللەكت ەلەمەنتتەرى بار تاعى ءبىر قۇقىقتىق كەڭەس بەرەتىن چات-بوت ازىرلەنىپ, «Zan Komegi» ءموبيلدى قوسىمشاسىندا سىناقتان وتكىزىلىپ جاتىر.
«جاساندى ينتەللەكتىنى ەنگىزۋ ماقساتىندا مينيسترلىك زاڭ قىزمەتتەرىن ۇسىناتىن پلاتفورمالاردى ازىرلەۋگە باعىتتالعان IT ۇيىمدارىنان جۇمىس توبىن قۇردى. ءبىز كەپىلدەندىرىلگەن مەملەكەتتىك زاڭ كومەگىن «E-ZanKomegi» جۇيەسى ارقىلى ۇسىنۋ ءۇشىن 131 ادۆوكاتپەن, 27 زاڭ كەڭەسشىسىمەن كەلىسىمشارتقا وتىردىق. بىلتىر دەپارتامەنتكە رەسپۋبليكالىق بيۋدجەتتەن 150 ملن تەڭگە بولىنگەن. بۇل قارجى تسيفرلىق قىزمەت كورسەتۋدى جەتىلدىرۋگە جۇمسالدى. ناتيجەسىندە, 17 630 ازاماتقا 13 360 قىلمىستىق ءىس, 19 ازاماتتىق ءىس, 206 اكىمشىلىك ءىسى بويىنشا ساپالى قۇقىقتىق كومەك كورسەتىلدى. سونىمەن قاتار 4 مىڭنان اسا ادامعا قۇقىقتىق كەڭەس بەرىلدى», دەيدى ءا.امانجولوۆا.
وڭىردە «تسيفرلىق سوت ورىنداۋشىسى» جوباسى دا وڭتايلى جۇزەگە اسىرىلىپ جاتىر. بۇعان دەيىن اقىلى قىزمەت كورسەتەتىن جەكە سوت ورىنداۋشىلارىنا جۇگىنىپ كەلگەن ازاماتتار اتالعان تەگىن قىزمەتتىڭ كومەگىمەن 4 اي ىشىندە 550 ملن تەڭگە ۇنەمدەگەن. ادىلەت مينيسترلىگىنىڭ باستاماسىمەن جەڭىلدەتىلگەن ءوندىرىستىڭ جاڭا ينستيتۋتى اياسىندا جۇمىس ىستەپ جاتقان جوبانىڭ ارتىقشىلىعى كوپ. مىسالى, بۇرىن نەسيە قارىزىن ۋاقتىلى وتەي الماعانى ءۇشىن جەكە سوت ورىنداۋشىنىڭ قىزمەتىنە ايىپپۇلدىڭ سىرتىندا قوسىمشا 25% قاراجات تولەۋگە مىندەتتى بولعان. ازاماتتار وسى شىعىنداردان جانە جەكە سوت ورىنداۋشىلارعا جۇگىنۋدەن بوساتىلىپ وتىر.
«ماسەلەن, 20 اەك-كە دەيىنگى سوماداعى وڭايلاتىلعان ءوندىرىس بويىنشا ازاماتتار ەGov Mobile قوسىمشاسى ارقىلى ءىس تۋرالى ەگجەي-تەگجەي اقپاراتى بار sms حابارلامالار مەن push-حابارلامالار الاتىن بولدى. حالىققا ىڭعايلى بولۋ ءۇشىن قازىر بورىشكەردىڭ ەسەپشوتىن بۇرىنعىداي بۇعاتتاپ تاستامايدى. بەرەشەكتى ونلاين تولەۋ قولجەتىمدى. وسىلايشا, ادامي فاكتور تولىعىمەن الىنىپ تاستالدى», دەيدى ول.
وتكەن جىلدىڭ قورىتىندىسى بويىنشا وڭىردە جوعارىداعىداي جەڭىلدەتىلگەن ءوندىرىس تارتىبىمەن كولەمى 211 396 214 تەڭگە قارجىعا اتقارۋشىلىق ءوندىرىس قوزعالعان. بۇل وبلىس تۇرعىندارىنا 6,5 ملن تەڭگەدەن اسا قاراجاتىن ۇنەمدەۋگە مۇمكىندىك بەرىپ وتىر.
بۇگىندە ءوڭىر تۇرعىندارىنىڭ دەنى جىلجىمايتىن م ۇلىكتى ونلاين تىركەۋدى دە ۇيرەنىپ الدى. ياعني قۇنى 50 ملن تەڭگەگە دەيىنگى جىلجىمايتىن م ۇلىك يەلەرى نوتاريۋسپەن بەينەقوڭىراۋ ارقىلى بايلانىسىپ, كەلىسىمشارت جاساي بەرەدى. شارت جاساۋ بارىسىندا بيومەتريالىق سايكەستەندىرۋ جانە ەلەكتروندىق تسيفرلىق قولتاڭبا پايدالانىلادى.
قوستاناي وبلىسى
