كۇدىكتى بىلتىرعا دەيىن ءار جاڭا قاتىسۋشى ءۇشىن 10%-دان 300%-عا دەيىن تابىس بەرەمىن دەپ سەندىرگەن. سالىم قۇنى ماركەتينگتىك ستراتەگياعا بايلانىستى 7 500-دەن 2 ملن تەڭگەگە دەيىن وزگەرىپ وتىرعان. وسىلايشا, تارتىلعان قاراجاتتىڭ جالپى سوماسى 286 ملن تەڭگەدەن اسقان.
قارجىلىق تەرگەۋ جۇرگىزۋ بارىسىندا كۇدىكتى زاڭسىز جولمەن الىنعان قاراجاتقا ەليتالىق تۇرعىن ءۇي كەشەنىنەن 36 ملن تەڭگە تۇراتىن پاتەر ساتىپ العانى انىقتالدى. سوتتىڭ سانكتسياسىمەن اتالعان پاتەرگە تىيىم سالىندى. سونداي-اق سوت كۇدىكتىگە «ەشقايدا كەتپەۋ جانە ءتيىستى مىنەز-قۇلقى تۋرالى قولحات» تۇرىندەگى بۇلتارتپاۋ شاراسىن تاڭدادى. تەرگەۋ ءالى جالعاسىپ جاتىر.
انىقتالعانداي كۇدىكتىنىڭ قىرىق وتىرىگىنە سەنىپ, سان سوعىپ قالعان 35 ازامات جەڭىل تابىستى كوزدەگەن. باسىم كوپشىلىگى – زەينەتكەرلەر. ولار ءوز جيناقتارىنىڭ باسقا سالىمشىلار اراسىندا اقشا ءبولۋ سحەماسىنىڭ ءبىر بولىگىنە اينالاتىنىن سەزبەگەن.
ال باس پروكۋراتۋرا مەن ىشكى ىستەر مينيسترلىگىنىڭ قىزمەتكەرلەرى قازاقستاننىڭ گرۋزياداعى ەلشىلىگىنىڭ كومەگىمەن بىرنەشە رەت الاياقتىق جاساعانى ءۇشىن قازاقستان ازاماتىن قىلمىستىق جاۋاپكەرشىلىككە تارتۋ ءۇشىن تبيليسيدەن ەكستراديتسيالادى.
2020 جىلى اتالعان تۇلعا ادامدار توبىنىڭ الدىن الا ءسوز بايلاسۋىمەن سۋبسيديا الۋعا كومەك كورسەتۋ سىلتاۋىمەن ۇلىتاۋ وبلىسىنىڭ 88 تۇرعىنىنىڭ قاراجاتىن يەمدەنىپ, جالپى سوماسى 30 ملن تەڭگەدەن اسا شىعىن كەلتىرگەن.
«ەكى سىبايلاسى ءارتۇرلى جازاعا تارتىلدى, ال كۇدىكتى قىلمىس جاساعاننان كەيىن قاشىپ كەتتى, سوندىقتان وعان حالىقارالىق ىزدەۋ جاريالاندى. 2024 جىلى ول گرۋزيا اۋماعىندا انىقتالىپ, قازاقستاننىڭ باس پروكۋراتۋراسىنىڭ سۇراۋ سالۋى بويىنشا ەلگە قايتارىلدى. قازىر كۇدىكتى اقتاۋ قالاسىنىڭ تەرگەۋ يزولياتورىنا قاماۋعا الىندى. ايىپتالۋشىعا قىلمىستى جاساعانى ءۇشىن مۇلكى تاركىلەنىپ, ءۇش جىلدان جەتى جىلعا دەيىن باس بوستاندىعىنان ايىرۋ جازاسى قاراستىرىلعان», دەدى مينيسترلىكتەردىڭ ءباسپاسوز قىزمەتى وكىلدەرى.
سۋبسيدياعا قاتىستى الاياقتىق سولتۇستىك وڭىردەن دە تىركەلدى. قارجىلىق مونيتورينگ اگەنتتىگى سولتۇستىك قازاقستان وبلىسى بويىنشا دەپارتامەنتى اۋىلشارۋاشىلىق وندىرىستىك كووپەراتيۆى باسشىسىنىڭ 50 ملن تەڭگەدەن اسا سۋبسيديانى زاڭسىز الۋ سحەماسىن انىقتادى. مەملەكەت جوعارى ساپالى ءسۇت ءوندىرىسىن ارتتىرۋ جانە يمپورتقا تاۋەلدىلىكتى تومەندەتۋ ءۇشىن ءسۇت-تاۋار فەرمالارىن اشۋدى بەلسەندى تۇردە قولداپ, ىنتالاندىرىپ جاتىر. الايدا وندىرىستىك كووپەراتيۆىنىڭ باسشىسى 2019 جىلدىڭ مامىرىنان 2020 جىلدىڭ ناۋرىزىنا دەيىنگى ارالىقتا جالعان قۇجاتتاردى پايدالانىپ, ءسۇت ونىمدەرىن وڭدەۋگە بولىنگەن 50 ملن تەڭگەدەن اسا سۋبسيديانى زاڭسىز العان.
وندىرىستىك شىعىنداردى راستاۋ ءۇشىن اۋىل شارۋاشىلىعى باسقارماسىنا جەكە كاسىپكەرلەردەن شيكى ءسۇت ساتىپ العانى ءۇشىن ءوزارا ەسەپ ايىرىسۋ تۋرالى جالعان قۇجاتتار جانە ماي ءوندىرىسى تۋرالى قاساقانا جالعان اقپاراتتار بەرىپ كەلگەن. ناتيجەسىندە, سوت ءسۇت جەتكىزۋ مامىلەلەرىن زاڭسىز دەپ تانىدى. قارجىلىق تەرگەۋ اياسىندا زاڭسىز الىنعان سۋبسيديالارعا كۇدىكتى «Toyota land cruiser prado 150» ماركالى اۆتوكولىك ساتىپ العانى انىقتالدى. ول مۇمكىن بولاتىن تاركىلەۋدەن جاسىرۋ ماقساتىندا سەنىمدى ادامعا راسىمدەلگەن. سوتتىڭ سانكتسياسىمەن اتالعان اۆتوكولىككە تىيىم سالىندى. ال كۇدىكتىگە قاتىستى سوت ەكى ايعا «قاماۋعا الۋ» تۇرىندە بۇلتارتپاۋ شاراسىن تاعايىندادى.
كوكشەتاۋدا تۇرمىستىق تەحنيكانى جالعا الۋمەن اينالىساتىن كاسىپكەرلەر الاياقتىڭ قۇربانى بولدى. ولار WhatsApp مەسسەندجەرىندە تەحنيكا تۋرالى اقپارات الماسادى جانە جاڭالىقتارمەن بولىسەدى. توپ مۇشەلەرىنىڭ ءبىرى بەلگىسىز ادام ودان «Kärcher» ماركالى شاڭسورعىشتى جالعا الىپ, بايلانىسىن توقتاتقانىن حابارلادى. بۇل حابارلاماعا تاعى ءبىر كاسىپكەر «Alteco» شوي بالعاسىن جالعا العان ادام جوعالىپ كەتكەنىن ايتىپ, جاۋاپ بەردى. كوپ ۇزاماي توپتىڭ ءۇشىنشى مۇشەسى الاياقتىڭ قۇربانى بولعانى بەلگىلى بولدى. زارداپ شەككەندەردىڭ ۇشەۋى كوكشەتاۋ قالاسىنىڭ پوليتسيا باسقارماسىنا الاياقتىق ارەكەتتەر تۋرالى ارىزبەن جۇگىندى. پوليتسەيلەر دەرەۋ سوتقا دەيىنگى تەرگەپ-تەكسەرۋدى باستادى. جەدەل-ىزدەستىرۋ ءىس-شارالارى بارىسىندا ولار ۇرلانعان تەحنيكانى جەرگىلىكتى لومباردتاردىڭ بىرىنەن تاۋىپ, قىلمىسقا قاتىسى بار 29 جاستاعى ەر ادامنىڭ جەكە باسىن انىقتادى.
جالپى, باس پروكۋراتۋرانىڭ رەسمي مالىمەتىنە سۇيەنسەك, بىلتىر ەلدە 45 مىڭنان اسا الاياقتىق دەرەگى تىركەلگەن. ال بۇل بارلىق قىلمىستىق ءىستىڭ 34 پايىزىن قۇرايدى.
