قوستاناي وبلىسىندا مەملەكەت شىعىنى قالپىنا كەلتىرىلدى

قوستاناي. 7 اقپان. قوستاناي وبلىستىق پروكۋراتۋراسى وتكەن جىلى 2,5 ملليارد تەڭگە مەملەكەت شىعىنىن قالپىنا كەلتىردى. ونىڭ كولەمى الدىڭعى جىلى 1 ميلليارد تەڭگە بولاتىن. بۇل تۋرالى egemen.kz ءتىلشىسى حابارلادى. وبلىس پروكۋرورى مارات قايىبجانوۆ جىل بويى ورىن العان قىلمىستىڭ باسىم كوپشىلىگى ۇرلىققا تيەسىلى ەكەنىن ايتتى. وبلىستا پروفيلاكتيكالىق جۇمىستاردىڭ ارقاسىندا وتكەن جىلى وزگەنىڭ مۇلكىنە قول سالۋ 9,1 پايىزعا ازايعان. الايدا, بۇل كوڭىل جۇباتپايدى, سوندىقتان پروكۋراتۋرا 2015 جىلى وسى باعىتتاعى جۇمىستى كۇشەيتەتىن بولادى. سونىمەن قاتار, وتكەن جىلعى تەكسەرىس كاسىپكەرلەردىڭ سالىقتان جالتارۋ مەن زاڭسىز ارەكەتتەرىن اشكەرەلەدى. پروكۋراتۋرا تالابىمەن وڭىردە جالعان ادامنىڭ اتىنا تىركەلگەن 26 كاسىپورىندى توقتاتتى, وسى بويىنشا 3 قىلمىستى ءىس قارالدى. پروكۋراتۋرا كاسىپكەرلەردىڭ قۇقىن قورعاۋ ءىسى تۋرالى دا بۇرمالاۋشىلىقتاردىڭ بەتىن اشتى. وتكەن جىلى پروكۋراتۋرانىڭ قارسىلىعىمەن «قازپوشتا» اكتسيونەرلىك قوعامى باسقارماسى توراعاسىنىڭ «كاسىپكەرلەرگە اقىلى قىزمەت كورسەتۋدى جۇكتەگەن» زاڭسىز ۇكىمىنىڭ كۇشى جويىلدى. وبلىستىق پروكۋراتۋرانىڭ جىل قورىتىندىسىنا وبلىس اكىمى نۇرالى سادۋاقاسوۆ قاتىستى. ول قوعامداعى بارلىق زاڭ بۇرمالاۋشىلىقتارعا, سىبايلاس جەمقورلىققا, قىلمىسقا قارسى بىلىكتىلىكپەن قارسى تۇرۋ كەرەك ەكەنىن تىلگە تيەك ەتتى. سونىمەن قاتار, بيۋدجەتتىڭ قىسقاراتىنىن, بارىنشا ۇنەم عانا قيىندىقتان الىپ شىعاتىنىن ايتتى. قىلمىستىڭ, ونىڭ ىشىندە ۇرلىقتىڭ وسۋىنە ايماق باسشىسى دا توقتالدى. وبلىس اكىمى نۇرالى سادۋاقاسوۆ: «ۇرلىقتىڭ ءىرى-ۋاعى بولمايدى. ول تۇرعىنداردى مازالاماۋى ءتيىس. حالىقتىڭ سەنىمى دە وسىنداي مايدا, ۋاق نارسەدەن باستالادى», دەدى. ءنازيرا جارىمبەتوۆا. دەرەك, سۋرەت: egemen.kz.