سۋرەتتى تۇسىرگەن – نۇرعالي جۇماعازى
فريستايل-اكروباتيكادان ەرلەر قۇراماسى قىتايداعى قىسقى الاماندا توپ جاردى. شەرزود حاشيرباەۆ پەن رومان يۆانوۆ باستى قارسىلاستارىن قاپى قالدىردى. بۇل التىن مەدالدىڭ تاريحي ءمان-ماڭىزى ايرىقشا. جىگىتتەرىمىز سينحروندى سەكىرۋدە 97,92 ۇپاي جيناپ ازيا رەكوردىن جاڭارتتى.
ازيا ويىندارى حاربينمەن قاتار يابۋلي قالاسىندا دا وتكىزىلىپ جاتىر. ءيابۋليدىڭ تاۋ بوكتەرىندە بياتلون, شاڭعى جارىسى, تاۋ شاڭعىسى, سكي-الپينيزم, فريستايل اكروباتيكا سپورتىنان سايىستار ۇيىمداستىرىلعان.
– فريستايل-اكروباتيكادان سينحروندى سەكىرۋدە قىسقى ازيا ويىندارىنىڭ چەمپيونى اتاندىق. بۇرىن-سوڭدى وسى سايىس تۇرىنەن التىن مەدال بۇيىرعان جوق. ءبىرىنشى سەكىرگەندە رومان ەكەۋمىزدىڭ اكروباتيكالىق ءادىسىمىز ويداعىداي بولمادى, قيمىلىمىز بىردەي كورىنگەن جوق. ودان كەيىن باپكەرلەر ابدىراماۋدى, قاتەلىككە بوي الدىرماي ورىنداۋدى شەگەلەپ تاپسىردى. وقۋ-جاتتىعۋ كەزىندە جاساپ جۇرگەن ءادىس. سونى تاعى دا قاتەلىكسىز ورىندادىق, – دەدى ش.حاشيرباەۆ.
ايەلدەر اراسىنداعى سايىستا فريستايل-اكروباتيكادان سينحروندى سەكىرۋدە اردانا ماحانوۆا مەن ايانا جولداس قىسقى ازيا ويىندارىنىڭ قولا جۇلدەگەرى اتاندى.
شاڭعىشى اكروباتتاردىڭ جەڭىسىنە جەڭىس ۇستەگەن شاڭعىشىلار دا جانكۇيەر سەنىمىن اقتاي ءبىلدى. بياتلوننان 10 شاقىرىمدىق سپرينتتە ۆلاديسلاۆ كيرەەۆ التىن مەدال ەنشىلەسە, تاعى ءبىر ساڭلاق ۆاديم كۋرالەس كومبەگە ەكىنشى جەتىپ, كۇمىس جۇلدە يەلەندى. قالعان شاڭعىشىلار دا وندىققا ەندى: اسەت دۇيسەنوۆ 6, الەكساندر مۋحين 7-ورىندى مىسە تۇتتى.
– قىسقى ازيا ويىندارىنا تەك التىن مەدال ولجالاۋ ءۇشىن كەلدىك. الدا ءالى كوماندالىق سايىس بار. جەكەلەي جارىستا جەلدىڭ قارسى ۇيتقۋى دا جىلدامدىقتى تەجەپ, ايتارلىقتاي كەدەرگىسىن تيگىزدى. جەر باۋىرلاي جاتىپ نىسانانى كوزدەۋدە قاتەلىك جىبەردىم, جەل ەكپىنى وقتىڭ باعىتىن ءسال بۇرىپ جىبەردى. ال تىك تۇرىپ نىسانا كوزدەۋدە بارلىق مۇمكىندىكتى ءمۇلت جىبەرمەدىم, – دەدى ۆ.كيرەەۆ.
ازيا ويىندارىنا سپورتشىلارىمىزدى قولداۋعا ارنايى بارعان ۇلتتىق وليمپيادا كوميتەتىنىڭ پرەزيدەنتى گەننادي گولوۆكين مەن تۋريزم جانە سپورت ءمينيسترى ەربول مىرزابوسىنوۆ ساڭلاقتاردىڭ جەتىستىگى ۇيىمشىلدىقپەن اتقارىلعان ەڭبەكتىڭ ناتيجەسى ەكەنىن اتاپ ءوتتى.
– فريستايل-اكروباتيكادان وتانداستارىمىز شەرزود حاشيرباەۆ پەن رومان يۆانوۆ ازيا ويىندارىنىڭ چەمپيونى اتاندى. ەرلەر اراسىنداعى سينحروندى سەكىرۋدە سىنعا تۇسكەن جەرلەستەرىمىز ەكىنشى مۇمكىندىكتەرىندە بار شەبەرلىكتەرىن كورسەتىپ, ازۋلى قىتاي قۇراماسىنىڭ التىننان ءۇمىتتى ەكى قۇرامىن دا باسىپ وزدى. بۇل مەدالدىڭ ەلىمىز ءۇشىن ماڭىزى زور. بۇل – قىسقى ازيا ويىندارى تاريحىندا وتانداستارىمىز فريستايل-اكروباتيكادان جەڭىپ العان تۇڭعىش التىن مەدال. وسى جەڭىسكە ۇلەس قوسقان جاتتىقتىرۋشىلار مەن كوماندانىڭ ەڭبەگىن ەرەكشە اتاپ وتكەن ءجون. سپورتشىلارىمىزدىڭ قاجىرلى ەڭبەگى مەن ۇزدىكسىز دايىندىقتارىنىڭ ارقاسىندا وسىنداي ۇلكەن جەتىستىككە قول جەتكىزىپ وتىرمىز. فريستايل-اكروباتيكاداعى جىگىتتەردىڭ التىنىنان كەيىن ىلە-شالا بياتلون سپورتىنداعى ساڭلاقتارىمىز ەل قورجىنىنا ءبىر التىن, ءبىر كۇمىس جۇلدە سالدى. 10 شاقىرىمعا سپرينتتىك جارىستا ۆلاديسلاۆ كيرەەۆ مارە سىزىعىن ءبىرىنشى كەسىپ, مەرەيىمىزدى تاسىتتى. تاعى ءبىر وتانداسىمىز ۆاديم كۋرالەس تە ەكىنشى ورىنعا يە بولىپ, كۇمىس جۇلدەگەر اتاندى. سپورتشىلارىمىز بۇل جۇلدەمەن شەكتەلىپ قالمايدى دەپ سەنەمىن. بىرەر كۇننەن سوڭ ولار كوماندالىق سىندا جارىس جولىنا شىعىپ, تاعى دا جوعارى جەتىستىگىمەن قۋانتادى دەپ ۇمىتتەنەمىز, – دەدى ە.مىرزابوسىنوۆ.
يابۋلي قالاسىنىڭ تاۋ سىلەمدەرىندەگى سان سالالى جولداردا سايىسقا تۇسكەن شاڭعىشىلارىمىزعا دا مەدال بۇيىردى. ايەلدەر اراسىنداعى ەستافەتالىق تارتىستا (4ح5 كم) كاميلا ەلعازينوۆا, كسەنيا شالىگينا كلاسسيكالىق ادىستە جارىس جولىنا شىقسا, انگەلينا شۋرىگا, نادەجدا ستەپاشكينا ەركىن ادىسپەن جارىستى تۇيىندەپ, كۇمىس جۇلدەگە قول جەتكىزدى. ازيا ويىندارىنىڭ التىنىن قىتاي قىزدارى الدى, قولا جۇلدە جاپونيا سپورتشىلارىنا بۇيىردى.
ەرلەر سايىسىندا ءتورت سپورتشىمىز ەستافەتالىق تارتىستى جاقسى باستاعان ەدى. كلاسسيكالىق ادىسپەن جارىس جولىنا شىققان كونستانتين بورتسوۆ قارسىلاستارىنان وق بويى وزىپ كەلدى. ەستافەتانى قابىل الىپ جارىستى جالعاعان نايل باشماكوۆ, كۇشىن كۇنى بۇرىن سارقىپ الدى ما, مارەگە تايانعاندا جىلدامدىعىن باسەڭدەتىپ قالدى. ەركىن ادىسپەن سايىستى جالعاستىرعان ولجاس كليمين كوش باستاپ كەلىپ تىزگىندى ۆلاديسلاۆ كوۆوليوۆكە ۇستاتتى. بىراق قىتاي مەن جاپونيا سپورتشىلارى جەرلەسىمىزدەن وق بويى ۇزاپ الىپ, جەتكىزبەدى. وسىلايشا, ەرلەر قۇراماسىنا ەستافەتالىق سايىستىڭ قولا مەدالى بۇيىردى.
ازىرگە سپورتشىلارىمىزدىڭ ەنشىسىندە 3 التىن, 7 كۇمىس, 5 قولا مەدال بار.
