ورتاق كەلىسىم ساپالى «Samsung» تەلەديدارلارىنىڭ جەلىسىن شىعارۋدى كوزدەيدى. جاڭا ءوندىرىس جەلىسى «Silk Road Electronics» كاسىپورنىندا قۇرىلادى. الەمدىك برەندتى وندىرۋگە زاۋىتتىڭ الەۋەتى تولىق جەتەدى. بۇل ارقىلى ەلىمىزدىڭ, ءتىپتى ورتا ازيانىڭ جوعارى تەحنولوگيالىق ونىمگە دەگەن سۇرانىسى وتەلەدى.
سونى جوبا ونەركاسىپتى دامىتۋ قورىنىڭ قولداۋىمەن جۇزەگە اسىرىلىپ وتىر. وندىرىستىك جەلىنى ىسكە قوسۋ وسى جىلدىڭ ەكىنشى توقسانىنا جوسپارلانعان. ال تۇتىنۋشىلار كەلەسى جىلدىڭ ەكىنشى جارتىجىلدىعىندا ساراننان شىققان «Samsung» تەلەديدارلارىن ساتىپ الا الادى. بۇل باستاما – ءوڭىرىمىزدىڭ تۇرمىستىق تەحنيكا ءوندىرۋ سالاسىنداعى تاعى ءبىر ماڭىزدى قادام.
«Silk Road Electronics» زاۋىتىنىڭ ديرەكتورى الەكساندر كريتسكيدىڭ ايتۋىنشا, بۇل ىنتىماقتاستىق جەرگىلىكتى كاسىپورىن ءارى تۇتاستاي العاندا ەلىمىزدىڭ ونەركاسىپتىك دامۋى ءۇشىن جاڭا مۇمكىندىك جولىن اشادى. «Samsung Electronics» كومپانياسىمەن بىرلەسىپ, ءبىز وتاندىق تۇتىنۋشىلار ءۇشىن قولجەتىمدى باعامەن الەمدىك دەڭگەيدەگى ونىمدەردى ۇسىنامىز», دەيدى زاۋىت باسشىسى.
جاڭا جوبانىڭ ونەركاسىپتىك ينفراقۇرىلىمدى دامىتىپ, جاڭا جۇمىس ورىندارىن قۇرۋعا دا ىقپالى بار.
– «Samsung Electronics» ەلەكترونيكا سالاسىنداعى كوپجىلدىق تەحنولوگيالىق كوشباسشى بولىپ تانىلىسىمەن, ەڭ جاڭا تەحنولوگيا مەن بىرەگەي پايدالانۋشى تاجىريبەسىن توپتاپ, ءوز تۇتىنۋشىسىنا بارىنشا جاقىن بولۋعا ۇمتىلادى. ەلىمىزدە ءوندىرىستىڭ باستاۋ الۋى ءبىزدىڭ كومپانيا ءۇشىن ماڭىزدى ءرول اتقارادى. بۇل ءبىزدىڭ ءونىمىمىزدىڭ جەرگىلىكتى نارىق ءۇشىن قولجەتىمدىلىگىن ارتتىرۋعا تەڭدەسسىز مۇمكىندىك سىيلايدى, – دەيدى «Samsung Electronics» ورتالىق ەۋرازيا پرەزيدەنتى دجونگ يۋدجين.
«Silk Road Electronics» پەن «Samsung Electronics» كومپانيالارىنىڭ بىرلەسكەن جۇمىسى ءوڭىردىڭ وندىرىستىك الەۋەتىن عانا ارتتىرىپ قويمايدى, ەلدىڭ يندۋستريالدىق ينفراقۇرىلىمىن نىعايتىپ, جوعارى تەحنولوگيالىق ونىمدەردىڭ وتاندىق ءوندىرىسىن ورىستەتەدى.
قازىرگى ۋاقىتتا كاسىپورىن «Artel» برەندىمەن تەلەديدار, ەلەكترلى سۋ جىلىتقىش, شاڭسورعىش, ءاسۇي توقپەشى, اۋاسورعىش, كىر جۋاتىن ماشينا, جەلدەتكىش سەكىلدى تۇرمىستىق تەحنيكا تۇرلەرىن شىعارىپ جاتىر. بۇگىننىڭ وزىندە 130 مىڭ تەحنيكا ءساتتى ساۋدالاندى. كاسىپورىن ونىمدەرىن ساۋدا جەلىلەرى مەن ينتەرنەت ارقىلى وتكىزىپ وتىر. اسىرەسە «Kaspi.kz» قوسىمشاسى سەكىلدى ونلاين ساۋدا پلاتفورمالارىن ءتيىمدى پايدالانادى. ساتۋ ءبولىمى مەنەدجەرلەرىنىڭ بىلىكتىلىگى ارقاسىندا تمد ەلدەرىنە دە ەكسپورتتايدى. بۇل – كومپانيانىڭ العا قويعان باستى ماقساتى. ەگەر شەتەل نارىعىنا شىقسا, وندا كاسىپورىن مول تابىسقا كەنەلىپ, مىڭداعان جۇمىس ورنىن اشۋعا مۇمكىندىك تۋادى.
كومپانيا – ەلىمىزدەگى تۇرمىستىق تەحنيكا شىعاراتىن جالعىز ءوندىرىس ورنى. ەندى «Samsung» ماركالى تەلەديدارلارىن نارىققا شىعارسا, وندا زاۋىت تىرشىلىگى ءتىپتى سەرپىلەدى.
– ءبىزدىڭ كومپانيا الەمدىك نارىققا ەنەرگياعا ءتيىمدى, پايدالانۋعا وتە ىڭعايلى تۇرمىستىق تەحنيكانى شىعارىپ جاتىر. قىزمەتكەرلەرىمىز ءوندىرىس كەزىندە تەحنيكالىق يننوۆاتسيالاردىڭ يگىلىگىن كادەگە جاراتۋعا ۇمتىلادى. ءونىم كوپشىلىك تالعامىنان شىعىپ, كوزگە تارتىمدى كورىنۋ ءۇشىن ديزاينىنا دا ەرەكشە ءمان بەرەمىز. الەمدىك برەند قالىپتاستىرۋ ماقساتىندا تاجىريبەمىزدى ءاردايىم تولىقتىرىپ, ىزدەنىستەن قول ۇزبەيمىز. ءبىزدىڭ كومپانيانى كوپ جۇمىس كۇتىپ تۇر. وتاندىق برەندتى كۇنى ەرتەڭ الەم مويىنداپ جاتسا, وندا قاراعاندىنىڭ دا, ساراننىڭ دا ءوندىرىسى ۇلعايادى, – دەيدى سەرىكتەستىكتىڭ قوعام جانە مەملەكەتتىك مەكەمەلەرمەن بايلانىس باسقارماسىنىڭ جەتەكشىسى ديليارا تالعاتقىزى.
قاراعاندى وبلىسى
