فوتو: parlam.kz
دەپۋتاتتىڭ ايتۋىنشا, ازىرگە, اۋىل حالقىنىڭ تابىسىن تولتىرۋعا ارنالعان ەلدەگى جالعىز جوبا – وسى بولعاندىقتان ودان ءۇمىت كۇتەتىن ەل كوپ. بىراق, سول ەلدىڭ بۇل جوباعا ايتار وكپە-نازى دا جوق ەمەس.
«كاسىپتەن ءناسىبىن تاپقىسى كەلەتىندەردى اكىمدىك اۋرە-سارساڭعا سالۋعا دايىن. ءالجۋاز الەۋمەتكە بيۋروكراتيا ءۇش-ءتورت ايلاپ قۇجات جيناتىپ, تابانىنان توزدىرادى.
جوبانى قارجىلاندىرۋ تەتىگى دە قارىن اشتىرادى. نەگىزى جوبانىڭ باستى ماقساتى - 7 جىلدا 350 مىڭ جۇمىس ورنىن اشىپ, جىل سايىن كەمىندە 20-25 مىڭ تۇرعىنعا ميكرونەسيە بەرىلۋ كەرەك. بىراق بيۋدجەت تاپشىلىعىنا بايلانىستى, بىلتىر جوباعا بار بولعانى 20 ملرد. تەڭگە بولىنگەن. بۇنى ەكى دەپ قويىڭىز», دەدى دەپۋتات م.تولىقباي.
دەپۋتاتتىڭ پىكىرىنشە تاعى ءبىر وزەكتى ماسەلە كادر تاپشىلىعى. كووپەراتيۆتەردە ۆەتەرينار, زووتەحنيك, مەحانيزاتور, اگرونوم سياقتى ماماندار جەتىسپەيدى.
سونداي-اق دەپۋتات پيلوتتىق اۋىلدار جوباسى ءپرينتسيپىن مىندەتتى تۇردە قالدىرۋ قاجەت ەكەنىن ايتتى.
«ايتپەسە, جوبانىڭ ءمانى جوعالادى, جوبا تەك كرەديت بەرەتىن كەزەكتى باعدارلاما رەتىندە بايانسىزدىڭ كۇنىن كەشەدى.
ارينە, وسىدان ءبىراز بۇرىن پرەزيدەنت نازارىنا ۇسىنىلعان جامبىل وبلىسىنداعىداي بارلىعى باقۋاتتى بولمايتىنى انىق. بىراق, پيلوتتىق پرينتسيپ توقتاسا, وندا اۋىل كووپەراتيۆتەرىن قۇرۋدىڭ, تيىسىنشە, ليزينگكە تەحنيكا بەرۋدىڭ دە قاجەتى بولماي قالۋى مۇمكىن.
ەڭ قىزىعى, كووپەراتيۆتتەر قۇرۋ دەگەن نە؟ ونىڭ مەحانيزمى قانداي؟ بۇنى جەرگىلىكتى اتقارۋشى ورگانداردىڭ ءوزى تۇسىنبەي جاتادى. سوندا ونى قاراپايىم حالىق قايدان تۇسىنەدى؟», دەدى دەپۋتات. ونىڭ ايتۋىنشا سول ورايدا ء تۇسىندىرۋ جۇمىستارىن شيراتقان ءجون.
دەپۋتاتتىق ساۋالدا سونىمەن قوسا, اۋىل حالقىنىڭ تابىسىن كوتەرۋ ءۇشىن, تۇرعىنداردى اۋىل شارۋاشىلىعى بويىنشا تەحنولوگيالىق كارتالارعا وقىتۋ ماسەلەسى وتە وتكىر بولىپ تۇرعانى ايتىلدى.
«بۇنى مەملەكەت باسشىسى جولداۋىندا «پيلوتتى رەجيمدە «امانات» پارتياسىنىڭ مەركە اۋدانىندا اشقان «اگروساۋات» وقۋ ورتالىعىن بارلىق اۋدانداردا اشۋدى ۇكىمەتكە تاپسىرامىن», دەدى. بىراق, بۇل تاپسىرما بويىنشا ۇكىمەت تە, ءوڭىر اكىمدەرى دە قىلاۋداي شەشىم قابىلداماعان. بۇل ۇكىمەتكە, اكىمدىكتەرگە سىن», دەدى ماقسات تولىقباي.
دەپۋتاتتىڭ ايتۋىنشا «اگروساۋات» ورتالىعىن ىسكە قوسپاي, قالىپتاستىرماي اۋىل حالقىنىڭ تابىسىن كوتەرۋ مۇمكىن ەمەس, بۇل – جۇيە قالىپتاستىراتىن, بىلمەگەنگە ۇيرەتەتىن, بىلگەنگە قولداۋ بولاتىن ورتالىق.
«سوندىقتان, «اگروساۋات» وقۋ ورتالىقتارىن اشۋ تۋرالى مينيسترلىكتىڭ جوسپارىمەن تەز ارادا تانىستىرۋىڭىزدى سۇرايمىن», دەگەن دەپۋتات ماقسات مالىك ۇلى اۋىل شارۋاشىلىعى سالاسىنداعى بۇدان دا باسقا بىرنەشە ماسەلەلەردى قوزعادى.
