فوتو: parlam.kz
وسى تۇرعىدا كوپ ءوتىنىش كەلىپ تۇسكەنىن تىلگە تيەك ەتكەن ءماجىلىس دەپۋتاتىنىڭ ايتۋىنشا بۇگىندە اۋىل كاسىپكەرلەرى مەن تاۋار وندىرۋشىلەرى بىرقاتار شۇعىل شەشۋدى قاجەت ەتەتىن كۇردەلى پروبلەمالارعا تاپ بولىپ وتىر.
«بىرىنشىدەن فەرمەرلەر ءوز قىزمەتىن جۇرگىزۋ ءۇشىن قاجەتتى قاراجات تاپشىلىعىن سەزىنىپ وتىر. بانكتىك نەسيەلەردى الۋ قيىندىقتارى كەپىلدىك مۇلكىنە تومەن باعالاۋ كوەففيتسيەنتتەرىن (0,5) قولدانۋ سالدارىنان كۇشەيىپ, قارجىلاندىرۋعا قولجەتىمدىلىكتى شەكتەيدى.
ەكىنشىدەن بولىنەتىن جەر تەلىمدەرى كوبىنەسە نەگىزگى ينفراقۇرىلىمى (ەلەكتر, گاز, سۋ, جول) جوق الىس اۋدانداردا ورنالاسقان. ينفراقۇرىلىمدى تارتۋ شىعىندارىنىڭ جوعارى بولۋى اۋىل شارۋاشىلىق ءوندىرىسىن قارجىلىق تۇرعىدان ءتيىمسىز ەتەدى», دەدى دەپۋتات.
دەپۋتاتتىق ساۋالىندا ول سونداي-اق, ءونىمدى سەرتيفيكاتتاۋعا قويىلاتىن قاتاڭ تالاپتار شاعىن تاۋار وندىرۋشىلەردىڭ نارىققا شىعۋىنا كەدەرگى كەلتىرەتىنىن جانە فەرمەرلەر ءونىمدى وتكىزۋ ماسەلەسىنە تاپ بولىپ وتىرعانىن, سەبەبى ولاردىڭ ساتىلىم بويىنشا تاجىريبەسى جەتكىلىكسىز, ساۋدا جەلىلەرىمەن جۇمىس ىستەۋ تالاپتارى كۇردەلى (جالداۋ اقىسى, رەترو-بونۋستار), سونداي-اق سۋبسيديالاۋ جۇيەسىندە ءىرى تاۋار وندىرۋشىلەرگە باسىمدىق بەرىلەتىنىن ايتتى.
وسى ورايدا «اۋىل» پارتياسى» فراكتسياسىنىڭ دەپۋتاتتارى اتىنان ە.ساۋرىقوۆ مىناداي شارالاردى ۇسىندى:
«شاعىن تاۋار وندىرۋشىلەرگە «دامۋ» قورىنىڭ كەپىلدىكتەرىنە قولجەتىمدىلىكتى قامتاماسىز ەتۋ, ولاردىڭ ءبولىنۋ ءتارتىبىن قايتا قاراۋ.
ءىرى جانە شاعىن وندىرۋشىلەر اراسىنداعى سەرىكتەستىك جۇيەسىن قۇرۋ, شاعىن فەرمەرلەردى قولداعانى ءۇشىن مەملەكەتتىك پرەفەرەنتسيالار ۇسىنۋ.
جەر تەلىمدەرى مەن اۋىل شارۋاشىلىعى عيماراتتارىن كەپىل رەتىندە قابىلداي وتىرىپ, تومەن پايىزدىق مولشەرلەمەمەن جانە ۇزاق مەرزىمگە جەڭىلدەتىلگەن نەسيە بەرۋ باعدارلاماسىن ازىرلەۋ.
جەرگىلىكتى اكىمدىكتەرگە بولىنەتىن جەر تەلىمدەرىنە ينفراقۇرىلىم جۇرگىزۋ مىندەتىن جۇكتەۋ, شىعىنداردى مەملەكەت تاراپىنان وتەۋ مۇمكىندىگىن قاراستىرۋ.
شاعىن تاۋار وندىرۋشىلەر ءۇشىن سەرتيفيكاتتاۋ راسىمدەرىن جەڭىلدەتۋ نەمەسە كووپەراتيۆتىك سەرتيفيكاتتاۋ مودەلىن ەنگىزۋ.
ساۋدا جەلىلەرىن جەرگىلىكتى ءونىم وندىرۋشىلەرگە سورە ورىندارىن ۇسىنۋعا مىندەتتەۋ نەمەسە ولاردىڭ وتكىزۋ شىعىندارىن وتەۋ.
ماركەتينگتىك جانە ساتۋ قىزمەتتەرىن سۋبسيديالاۋ, شاعىن وندىرۋشىلەرگە ساتۋ بويىنشا مامانداردى تارتۋعا مۇمكىندىك بەرۋ.
مەملەكەتتىك قولداۋ شارتتارىن تەڭەستىرۋ, شاعىن وندىرۋشىلەردىڭ ءىرى كاسىپورىندارمەن تەڭ دارەجەدە سۋبسيديا الۋىن قامتاماسىز ەتۋ».
دەپۋتاتتىڭ سوزىنشە اتالعان شارالاردى ىسكە اسىرۋ اۋىل شارۋاشىلىعىنداعى شاعىن جانە ورتا بيزنەستىڭ دامۋىنا, شارۋاشىلىق قىزمەت جۇرگىزۋ جاعدايلارىن جاقسارتۋعا, جاڭا جۇمىس ورىندارىن اشۋعا جانە اۋىل حالقىنىڭ ءومىر ءسۇرۋ دەڭگەيىن ارتتىرۋعا ىقپال ەتەدى.
«وسى كورسەتىلگەن ماسەلەلەر مەن ۇسىنىلعان شەشىمدەردى قاراستىرىپ, ولاردى ىسكە اسىرۋ بويىنشا ناقتى مەحانيزمدەردى ازىرلەۋدى سۇرايمىز. سونداي-اق كوتەرىلگەن ماسەلەلەردىڭ جان-جاقتى تالدانۋىن جانە مەملەكەتتىك قولداۋ باعدارلامالارى مەن نورماتيۆتىك اكتىلەرگە وزگەرىستەر ەنگىزۋ بويىنشا ۇسىنىستاردى كۇتەمىز», دەپ تۇيىندەدى دەپۋتاتتىق ساۋالىن ە. ساۋرىقوۆ.
