«الماتى» تەلەارناسى جازعانداي, قىزىنىڭ ەسىمىن اتاماۋدى وتىنگەن انا ءبۇلدىرشىننىڭ قولى شىعىپ كەتكەنىن كەشكىسىن اكەسى بالاباقشادان الىپ كەتۋگە بارعاندا ءبىر-اق بىلگەن. جەكە بوبەكجايعا بارىپ جۇرگەن كىشكەنتاي قىزدىڭ قولى زاقىمدالعانىن دارىگەرلەر دە راستادى. اناسى سول كۇنى اۋرۋحانادان شىعا سالا مەكتەپكە دەيىنگى ءبىلىم بەرۋ ورتالىعىنا بارىپ, كامەرا جازباسىن قاراعان. ناتيجەسىندە تاربيەشى بالانى قولىنان جۇلقىپ, كوتەرىپ قالعانىن كورەدى.
سونداي-اق كادرلاردا ءبىر داستارقان باسىندا 8 ءبۇلدىرشىن وتىرعانى كورىنەدى.
- الدارىنا ەكى سورپا ىدىسى قويىلعان. ال تاربيەشىسى جالاڭ قولمەن ناندى تۋراپ, سول ىدىسقا سالىپ بەرەدى. بەرگەندە دە جەكە-جەكە ەمەس, ءبىر قاسىقپەن 8 بالانى بىردەن تاماقتاندىرادى, - دەپ جازىلعان مالىمەتتە.
تىركەلگەن كەلەڭسىز جاعدايعا بايلانىستى بوبەكجاي ديرەكتورى پىكىر بىلدىرگەن. بالاباقشانىڭ قوس قىزمەتكەرىنە تارتىپتىك جازا قولدانىلىپ, جۇمىستان بوساتىلعان. ال بالالاردىڭ اس مازىرىنە قاتىستى ماسەلەنى بىلاي دەپ ءتۇسىندىرىپ بەردى.
- ول ارتىق ىدىس-اياقتى جۋعىسى كەلمەي, جۇمىسىن جەڭىلدەتۋ ءۇشىن سولاي جاساعان. سول كۇنى مەن جۇمىستا بولمادىم, جىلدىڭ باسى بولعان سوڭ بالاباقشاعا وزگەرىستەر ەنگىزەيىن دەپ ورتالىقتىڭ شارۋاسىمەن سىرتقا شىعىپ كەتتىم. نەگىزى بالا سانىنا قاراي كەرەك قۇرالدار جەتكىلىكتى, تاماق تا از ەمەس, - دەدى جەكە بالاباقشانىڭ ديرەكتورى راۋشان اياپبەرگەنوۆا.
ال اۋدانداعى ءبىلىم ءبولىمىنىڭ باسشىسى اتا-انا قۇقىعىن ءتۇسىندىرىپ, بالاباقشاعا قاتىستى قانداي شارا قولدانىلعانىن جەتكىزدى.
- بولعان جاعدايعا بايلانىستى قىزمەتكەرگە ارنايى ايىپپۇل سالىندى. قازىر كەمشىلىكتەرگە بايلانىستى قۇزىرلى ورگاندارعا شارا قولدانۋ جونىندە حات جولدانعان. قازىرگى تاڭدا ول بالا باسقا بالاباقشادا تاربيەلەنىپ جاتىر, - دەدى مۇنايلى اۋدانى ءبىلىم ءبولىمىنىڭ باسشىسى باتىربەك دەموكرات ۇلى.
