ءارى كەتسە 4-5 مەملەكەتتىڭ وكىلدەرى قاتىسقان جارىستىڭ جەڭىمپازدارى دا, ولاردىڭ جاتتىقتىرۋشىلارى دا جوعارى جالاقى الىپ, وليمپيادالىق سپورت تۇرلەرىنىڭ ەسكەرۋسىز قالۋىنان كوپ رەتتە ەسەمىز كەتىپ-اق ءجۇر. بۇل ەلىمىزدىڭ بارلىق وڭىرىنە ءتان جاعداي. جۋرناليستەرمەن جۇزدەسكەن وبلىستىق دەنە شىنىقتىرۋ, سپورت جانە تۋريزم باسقارماسىنىڭ باسشىسى باقتيار ارتاەۆ سپورتشىلاردى دايىنداۋعا ەرەكشە ءمان بەرەتىن ۋاقىت جەتكەنىن باسا ايتتى. مىسالى, بالۋانداردى وسى سپورت ءتۇرى جاقسى دامىعان كاۆكاز تاجىريبەسىنەن وتكىزگەن دۇرىس. بوكسشىلارىمىزدى كەيىنگى جىلدارى تاماشا كورسەتكىشكە جەتىپ جۇرگەن وزبەكستان, شارشى الاڭنىڭ تالاي شەبەرىن شىڭداعان كۋبا ەلىنىڭ سپورتشىلارىمەن بىرگە جاتتىقتىرعان ءجون. قازىردە وبلىستان ازەربايجان مەن وسەتياعا ءادىس-ءتاسىلىن جەتىلدىرۋگە كەتكەن بالۋاندار بار. ناعىز سپورتشى وسىلاي شىڭدالادى. ويتكەنى باسەكەلەستىك بار جەردە عانا ناتيجە بولادى.
باسقارما باسشىسى سپورت مەكتەپتەرىنىڭ جۇمىسى دا سارالاناتىنىن ايتىپ ءوتتى. جيىرما جىل تاپجىلماي مەكتەپ باسقارسا دا, ناتيجە كورسەتە الماعان باسشىلاردىڭ ەندى ەشكىمگە وكپەسى بولماۋى كەرەك.
وبلىس سپورتىنداعى بيىلعى جاڭالىق – جەرگىلىكتى «قايسار» فۋتبول كومانداسى بىردە-ءبىر لەگيونەرسىز وينايتىن بولدى. كوماندا بيۋدجەتى 1 ملرد 200 ملن تەڭگە بولىپ وتىر. «مۇنداي قادامعا بارۋ وڭاي ەمەس. العاشقى تۋرلاردا ەسە جىبەرۋىمىز مۇمكىن. بىراق جەرگىلىكتى فۋتبولشىلارعا سەنىم ارتۋدى ءجون كوردىك. ء«وزىمىزدىڭ بالالار ويناسا عوي» دەگەندى ايتىپ جۇرگەنىمىزگە 30 جىلداي ۋاقىت بولىپتى. سونداي ءسات تۋىپ وتىر. ءوز سپورتشىلارىمىزعا قولداۋ تانىتايىق. جاستارىمىز جانكۇيەرلەرىن جەرگە قاراتپايدى, ەل ىشىندە جۇرگەن تالانتتارعا جول اشىلادى دەگەن سەنىمدەمىز», دەدى باسقارما باسشىسى.
كلۋب باسشىلىعىنا جاقىندا تاعايىندالعان تالعات ابدىعاپپار ۇلى كوماندانىڭ بىلتىرعى قارىزدارىن وتەۋدىڭ قام-قارەكەتى جونىندە ايتتى. قازىر 700 ملن تەڭگە بەرەشەكتى جابۋ ماقساتىندا كەيبىر كومپانيالارمەن كەلىسىم-شارت جاسالدى. ودان بولەك, اقىلى قىزمەتتەن تۇسكەن قارجى جۇمسالادى. ءسويتىپ, بيىل قارىزدىڭ جارتىسىن قايتارۋعا مۇمكىندىك تۋماق.
بىلتىر قىزىلوردا قالاسىنان بوي كوتەرگەن ستاديون قۇرىلىسى قارقىندى ءجۇرىپ جاتىر. الداعى مامىر ايىندا ىسكە قوسىلادى. قالاداعى «تارلان» سپورت كەشەنى وبلىستىق دەنە شىنىقتىرۋ, سپورت جانە تۋريزم باسقارماسىنىڭ تەڭگەرىمىنە ءوتتى. جاقىن ارادا بوكس كلۋبى قۇرىلىپ, جەرگىلىكتى تالاپتى ورەندەر تەگىن جاتتىعا باستايدى.
قىزىلوردا
