مەيرامبەكپەن قازىرگى ءال-فارابي اتىنداعى قازاق ۇلتتىق ۋنيۆەرسيتەتىنىڭ جۋرناليستيكا فاكۋلتەتىندە بىرگە ءبىلىم الدىق. جاقسى وقىپ قانا قويماي, جاراسىمدى ءازىل-قالجىڭى تاۋسىلماي, كۋرستاستاردى كۇلكىگە كەنەلتىپ جۇرەتىن اقجارقىن مىنەزىمەن ەرەكشەلەندى. ستۋدەنتتىك توي-تومالاعىمىزدا اسابالىق ەتىپ, ورتامىزدىڭ كوركى بولدى. سول كەزدەن-اق تۋما دارىنى, بيىك پاراساتى, جىلى دا شىنشىل سوزىمەن جۇرتتى اۋزىنا قاراتىپ, جانىنا تارتا بىلەتىن ۇيىمداستىرۋشىلىق قابىلەتى اڭعارىلىپ, كەلەشەگىنەن ۇلكەن ءۇمىت كۇتتىرەتىن.
مەيرامبەكتىڭ ءومىر جولى تاقتايداي ءتۇزۋ ءھام جەڭىل بولعان جوق. ورتا مەكتەپتى تامامداعان سوڭ اۋىلدا ءبىر جارىم جىلدان استام قۇرىلىسشى بولىپ ەڭبەك ەتتى. سەبەبى كەڭەس زامانىندا رەسپۋبليكامىزداعى جالعىز جۋرناليستيكا فاكۋلتەتىنىڭ كۇندىزگى بولىمىنە وقۋعا بىردەن ءتۇسۋ ون شاقتى تالاپكەردىڭ بىرەۋىنە عانا بۇيىراتىن باقىت ەدى. سوندىقتان مەيرامبەكتىڭ اۋەلى دايارلىق بولىمىنە تۇسۋىنە تۋرا كەلدى. ال كەيىنگى جۋرناليستىك قىزمەتىندە شىندىقتى ايتامىن دەپ, ماڭدايى تاسقا سوعىلعان ءساتى دە بولدى... بىراق, «الماس قىلىش قىن تۇبىندە جاتپاي», جارق ەتىپ, كۋرستاستارىمىزدىڭ ىشىندە ەڭ جوعارى لاۋازىمدى قىزمەتتەرگە تاعايىندالدى. جامبىل وبلىسى اكىمىنىڭ الەۋمەتتىك ماسەلەلەر جونىندەگى ورىنباسارى بولىپ, تۋعان ءوڭىرىنىڭ وركەندەۋىنە ايانباي اتسالىستى. «Jambyl» تەلەارناسىنىڭ ديرەكتورى كەزىندە تالاي بۇلاقتىڭ كوزىن اشقانداي ءىس تىندىردى – دارىندى جاستاردى جۇمىسقا الىپ, ولارعا تالىمگەر بولدى. وبلىس كاسىپوداقتارى اۋماقتىق بىرلەستىگىنىڭ توراعاسى رەتىندە قاراپايىم ەڭبەككەرلەردىڭ قۇقىقتارىن قورعاۋعا جانىن سالدى. التىنشى شاقىرىلىمداعى جامبىل وبلىستىق ءماسليحاتىنىڭ جانە جەتىنشى شاقىرىلىمداعى پارلامەنت ءماجىلىسىنىڭ دەپۋتاتى بولىپ سايلانىپ, ەل مەن جەر, ءتىل مەن ءدىل تاعدىرىنا قاتىستى كوكەيكەستى ماسەلەلەردى كوتەردى. ونىڭ «جامبىل وبلىسىنىڭ قۇرمەتتى ازاماتى» اتانعاندىعى – تۋعان وڭىرىنە سىڭىرگەن ەلەۋلى ەڭبەگىنە جەرلەستەرى تاراپىنان بەرىلگەن ءادىل دە لايىقتى باعا.
مەيرامبەك تولەپبەرگەن – ەلىمىزدىڭ تاڭداۋلى جۋرناليستەرى شوعىرىنان ءوز ورنىن العان, ەسىمى قازاق جۋرناليستيكاسىنىڭ تاريحىنا ەنگەن قالامگەر. شىعارماشىلىق جۇمىسىن سپورت تاقىرىبىنان باستاپ, ورتالىق ازيا جانە قازاقستان سپورت جۋرناليستەرىنىڭ حالىقارالىق بايقاۋىنىڭ باس جۇلدەسىنە يە بولدى. «حالىق كەڭەسى» جانە «Egemen Qazaqstan» رەسپۋبليكالىق گازەتتەرىندە جاۋاپتى قىزمەتتەر اتقارىپ, ساياسي-الەۋمەتتىك ماسەلەلەرگە ارنالعان پۋبليتسيستيكالىق ماقالالارىمەن كەڭىنەن تانىلدى. «ەرەن ەڭبەگى ءۇشىن» مەدالىمەن ماراپاتتالىپ, «قازاقستاننىڭ ەڭبەك سىڭىرگەن قايراتكەرى», پرەزيدەنت گرانتىنىڭ يەگەرى, جۋرناليستەر وداعى سىيلىعىنىڭ لاۋرەاتى اتاندى.
مەيرامبەك حالقىمىزدىڭ سۇيىكتى ۇلى, جاقسى اعالارعا جاقسى ءىنى, كەيىنگى تولقىنعا جاناشىر اعا, سەنىمدى دوس, اسىل جار, ارداقتى اكە بولا بىلگەن ءبىرتۋار ازامات ەدى. جۇزىنەن نۇر توگىلگەن جارقىن بەينەسى جادىمىزدان وشپەيدى.
كارىباي مۇسىرمان
