مەرەيتويلىق جوسپاردى تالقىلاۋعا قازاقستان حالقى اسسامبلەياسى توراعاسىنىڭ ورىنباسارى – قازاقستان حالقى اسسامبلەياسى حاتشىلىعىنىڭ مەڭگەرۋشىسى مارات ءازىلحانوۆ, قازاقستان حالقى اسسامبلەياسى توراعاسىنىڭ قوعامدىق ورىنباسارى لۋگمار بۋلاروۆ, پارلامەنت سەناتىنىڭ دەپۋتاتتارى, مادەنيەت جانە اقپارات مينيسترلىگىنىڭ باسشىلىعى, وڭىرلەردىڭ ىشكى ساياسات, قوعامدىق دامۋ باسقارمالارى, «قوعامدىق كەلىسىم» كمم, قحا قوعامدىق قۇرىلىمدارى جانە رەسپۋبليكالىق ەتنومادەني بىرلەستىكتەردىڭ باسشىلارى, ساراپشىلار قاتىستى.
– 2025 جىلدىڭ قاڭتار-اقپان ايلارىندا قحا-نىڭ 30 جىلدىعىنا ارنالعان ەلىمىزدىڭ 25 جوعارى وقۋ ورنى مەن ساراپتامالىق ورتالىقتارىندا باق-تا كەڭىنەن جاريالاناتىن 34 عىلىمي-تاجىريبەلىك كونفەرەنتسيا, دوڭگەلەك ۇستەل, سەمينار قازىردىڭ وزىندە بارلىق وڭىردەگى جوعارى وقۋ ورىندارىندا ءوتىپ جاتىر. نەگىزىنەن ءىس-شارالار 1 ناۋرىزدان (قحا قۇرىلعان كۇنى) باستالادى. ءدال وسى كۇنى باس قالاداعى بەيبىتشىلىك جانە كەلىسىم سارايىندا رەسپۋبليكالىق فورۋم وتەدى. اۋدان, وبلىستاردان ارنايى دەلەگاتتار شاقىرتىلىپ, اسسامبلەيانىڭ ماڭىزدى مەجەلەرىن ساراپتايدى. العىس ايتۋ كۇنىن مەرەكەلەۋدە «قايىرىمدىلىق كەرۋەنى» اكتسياسى, ۇيىمنىڭ باستاۋىندا بولعان قحا ارداگەرلەرىنە قۇرمەت كورسەتۋ, ەتنيكالىق انسامبلدەر مەن سوليستەر قاتىساتىن فەستيۆالدار, كورمەلەر, كونتسەرتتەر, حورەوگرافيا, ۆوكال جانە اسپاپتىق مۋزىكا بويىنشا شىعارماشىلىق بايقاۋلار ۇيىمداستىرۋ كوزدەلەدى, – دەدى م.ءازىلحانوۆ.
جيىن بارىسىندا «قولدانبالى ەتنوساياسي زەرتتەۋلەر ينستيتۋتى» جشس ديرەكتورىنىڭ ورىنباسارى ايگۇل سادۋاقاسوۆا قازاقستان حالقى اسسامبلەياسىنىڭ ماقساتى بىرەگەيلىكتى قالىپتاستىرۋ ەكەنىن اتاپ ءوتتى. ال سەنات دەپۋتاتى اليشەر ساتۆالديەۆ ەلىمىزدەگى ەتنوستىق تاقىرىپتاردىڭ دۇرىس جازىلۋىنا, ناسيحاتتالۋىنا دا ەرەكشە كوڭىل ءبولۋ كەرەك ەكەنىن ەسكە سالدى. ءوز كەزەگىندە قحا جانىنداعى انالار كەڭەسى توراعاسىنىڭ ورىنباسارى بايان احاتاي بىلتىر مەملەكەت باسشىسى قاسىم-جومارت توقاەۆتىڭ قوعامداعى 5 كەسەلمەن كۇرەسۋ تۋرالى تاپسىرماسى اياسىندا «سالاماتتى سانا» جوباسىن قولعا العانىن ايتتى. ونىڭ ايتۋىنشا, مەرەيتويلىق العاشقى ءىس-شارا 12 اقپاندا الماتى قالاسىنداعى دوستىق ۇيىندە «قحا-نىڭ 30 جىلدىعى: انا مەن بالا باقىتى – قوعامدىق تۇراقتىلىقتىڭ نەگىزى» اتتى دوڭگەلەك ۇستەل جۇمىسىمەن باستالادى.
