فوتو: اشىق دەرەككوز
بۇل تۋرالى حاماس ساياسي بيۋروسىنىڭ جوعارى لاۋازىمدى مۇشەسى مۋسا ابۋ مارزۋك مالىمدەدى.
ء«بىز ترامپ اكىمشىلىگىمەن بايلانىسقا شىعۋعا جانە كەلىسسوزدەر جۇرگىزۋگە دايىنبىز. بۇعان دەيىن ءبىز اقش-تىڭ بۇرىنعى پرەزيدەنتى دجو بايدەننىڭ , ترامپپەن نەمەسە اقش-تىڭ كەز كەلگەن باسقا اكىمشىلىگىمەن بايلانىس ورناتۋعا قارسىلىق بىلدىرگەن جوقپىز. بارلىق حالىقارالىق تاراپتارمەن كەلىسسوزدەرگە اشىقپىز», دەدى ابۋ مارزۋك.
مارزۋك ۆاشينگتوننىڭ تاياۋ شىعىستاعى ماڭىزدى ويىنشى ەكەنىن ەسكەرسەك, حاماس ءۇشىن اقش-پەن كەلىسسوزدەر جۇرگىزۋدىڭ وزىندىك قاجەتتىلىككە اينالعانىن اتاپ ءوتتى. سوندىقتان دا ولار امەريكالىقتارمەن كەلىسسوزدەرگە قولداۋ ءبىلدىرىپ, بۇل ماسەلەگە قارسىلىق تانىتپايتىندارىن جەتكىزگەن.
ايتا كەتەيىك, سەيسەنبى كۇنى حاماس دەلەگاتسياسى رف سىرتقى ىستەر مينيسترلىگىنىڭ باسشىلىعىمەن كەزدەسۋلەر وتكىزگەن.
ءبىر كۇن بۇرىن ترامپ پالەستينالىقتار گازا سەكتورىنان باسقا جەرگە قونىس اۋدارعاننان كەيىن سوعىستان زارداپ شەككەن اۋماقتى اقش باقىلاۋىنا الاتىنىن جانە ونىڭ ەكونوميكالىق دامۋىمەن اينالىساتىنا ۋادە بەرگەن ەدى. بىراق, اقش پرەزيدەنتىنىڭ ءدال وسى مالىمدەمەسى قازىردىڭ وزىندە تاياۋ شىعىس وڭىرىندە, سونداي-اق كەيبىر امەريكالىق ساياساتكەرلەر اراسىندا سىنعا ۇشىراپ وتىر.
حاماس-تىڭ رەسمي وكىلى سامي ابۋ زۋحري اقش پرەزيدەنتى دونالد ترامپتىڭ گازا سەكتورىن باسىپ الۋ تۋرالى مالىمدەمەسىن «كۇلكىلى» ءارى «ابسۋرد» دەپ باعالاعان.
«ترامپتىڭ گازانى باقىلاۋعا الۋ نيەتى تۋرالى مالىمدەمەسى اقىلعا قونىمسىز. مۇنداي سيپاتتاعى كەز كەلگەن يدەيا وڭىردەگى جاۋلىق وتىن تۇتاندىرۋعا تۇرتكى بولا الادى», دەدى ابۋ زۋحري.
حاماس ساياسي بيۋروسىنىڭ مۇشەسى يززات ءال-ريشك ترامپتىڭ سوزدەرى «پالەستينا ماسەلەسى مەن جالپى ايماق تۋرالى تۇسىنىكسىزدىك پەن تەرەڭ ناداندىقتى» كورسەتەدى دەپ مالىمدەگەن.
ساۋد ارابياسى سىرتقى ىستەر مينيسترلىگى پالەستينالىقتاردى ءوز جەرلەرىنەن كوشىرۋ ارەكەتتەرىن جوققا شىعاراتىنىن ايتقان. سونداي-اق ساۋد استاناسى شىعىس يەرۋساليم بولاتىن تاۋەلسىز پالەستينا مەملەكەتى قۇرىلماي يزرايلمەن ديپلوماتيالىق قارىم-قاتىناس ورناتپايتىندىقتارىن اشىق مالىمدەگەن.
