فوتو:اشىق دەرەككوز
قر ۇكىمەتىنىڭ 2024 جىلعى 12 ماۋسىمداعى № 454 قاۋلىسىمەن «دەنساۋلىق ساقتاۋ ينفراقۇرىلىمىن دامىتۋدىڭ 2024 – 2030 جىلدارعا ارنالعان تۇجىرىمداماسى» بەكىتىلىپ, رەسپۋبليكا بويىنشا دەنساۋلىق ساقتاۋ ينفراقۇرىلىمى وبەكتىلەرىنىڭ توزۋ دارەجەسىن 2023 جىلعى 49,3% - دان 2030 جىلعا دەيىن 30 % - عا دەيىن تومەندەتۋ مەجەسى بەلگىلەندى.
دەپۋتاتتىڭ پىكىرىنشە, بۇگىندە قولدانىستاعى اۋداندىق اۋرۋحانالار ينفاركت, ينسۋلت, جاراقات جانە باسقا دا جاعدايلار كەزىندە «التىن ۋاقىت» قاعيداتىن ساقتاي وتىرىپ شۇعىل مەديتسينالىق كومەكتى, سونداي-اق ءىرى قالالارعا بارۋ قاجەتتىلىگىنسىز مامانداندىرىلعان جانە جوعارى تەحنولوگيالىق مەديتسينالىق كومەكتى تولىققاندى كورسەتە المايدى.
«جامبىل وبلىسى بويىنشا قولدانىستاعى 10 اۋداندىق اۋرۋحانانىڭ توزىعى ابدەن جەتىپ, اۋىل حالقىنا ساپالى مەديتسينالىق كومەكتى ءتيىستى دەڭگەيدە كورسەتە الماي جاتىر. ماسەلەن, وبلىس ورتالىعىنان شالعايدا ورنالاسقان مويىنقۇم اۋدانىنىڭ 110 توسەك – ورىنعا ارنالعان ورتالىق اۋرۋحاناسى 1954 جىلى سالىنسا, وبلىستاعى ەڭ جاڭا 198 توسەك ورىنعا ارنالعان اۋداندىق ورتالىق اۋرۋحانا عيماراتى شۋ اۋدانىندا 2011 جىلى قولدانىسقا بەرىلگەن. قازىرگى ۋاقىتتا زامانعا ساي حالىقارالىق مەديتسينالىق ستاندارتتاردىڭ وزگەرۋىنە جانە وڭىرلەردەگى اۋىل حالقىنىڭ ارتۋىن ەسكەرسەك, بارلىق اۋداندىق اۋرۋحانا عيماراتتارى قايتا جاڭعىرتۋدى قاجەت ەتەدى», دەدى مۇقاش ەسكەندىروۆ.
ماجىلىسمەن جامبىل وبلىسى اكىمدىگى تاراپىنان ىسكە اسىرۋ قۇنى 38,7 ملرد. تەڭگەنى قۇرايتىن 4 اۋداندىق اۋرۋحانا عيماراتىن قايتا قۇرۋ جانە قوسىمشا عيمارات سالۋ ءۇشىن جوبالار ازىرلەنىپ جاتقاندىعىن اتاپ ءوتتى. بىراق, تومەندە كورسەتىلگەن جوبالار بيۋدجەتتەن قولداۋ تاپپاي وتىر. اتاپ ايتساق:
- جامبىل وبلىسى جامبىل اۋدانىنداعى 115 توسەك ورىنعا ارنالعان ورتالىق اۋرۋحانا عيماراتىن قايتا جاڭعىرتۋ جوباسىنا – 2 611,5 ملن.تەڭگە (04.09.2024 ج. №19-0307/24);
- جامبىل وبلىسى جۋالى اۋدانىندا 100 توسەك ورىنعا ارنالعان ورتالىق اۋرۋحانا جانە 250 توسەك ورىنعا ارنالعان ەمحانا عيماراتىن سالۋ جوباسىنا – 29 969,5 ملن.تەڭگە (20.08.2024 ج. №19-0349/24);
- جامبىل وبلىسى ت.رىسقۇلوۆ اۋدانىنداعى 129 توسەك ورىنعا ارنالعان ورتالىق اۋرۋحانا عيماراتىن قايتا جاڭعىرتۋ جانە جاپسارلاس عيمارات سالۋ جوباسىنا – 3 561,5 ملن.تەڭگە (05.09.2023 ج. №19-0313/24);
- جامبىل وبلىسى تالاس اۋدانىنداعى 140 توسەك ورىنعا ارنالعان ورتالىق اۋرۋحانا عيماراتىن قايتا جاڭعىرتۋ جانە جاپسارلاس عيمارات سالۋ جوباسىنا – 2 609,5 ملن.تەڭگە (10.05.2024 ج. №19-0186/24).
الايدا, قازاقستان رەسپۋبليكاسى قارجى ءمينيسترىنىڭ 2015 جىلعى 25 اقپانداعى «نىسانالى دامۋ ترانسفەرتتەرىن قاراۋ جانە ىرىكتەۋ قاعيدالارىن بەكىتۋ تۋرالى» № 126 بۇيرىعىنىڭ 5-1 تارماعىنا سايكەس, رەسپۋبليكالىق بيۋدجەت ەسەبىنەن قۋاتتىلىعى كەمىندە 200 توسەكتىك كوپ بەيىندى جانە تۋبەركۋلەزگە قارسى ۇيىمداردىڭ, كەمىندە 200 توسەكتىك پەريناتالدىق ورتالىقتار مەن پەرزەنتحانالاردىڭ جانە اۋىسىمىنا كەمىندە 250 ادام قابىلدايتىن قۋاتتىلىعى بار ەمحانالاردى سالۋعا, رەكونسترۋكتسيالاۋعا, كەڭەيتۋگە جانە جاڭعىرتۋعا ارنالعان شىعىستار قارجىلاندىرىلادى.
سونىمەن قاتار, قازاقستان رەسپۋبليكاسى ۇكىمەتىنىڭ 2023 جىلعى 28 ناۋرىزداعى «قازاقستان رەسپۋبليكاسىنىڭ اۋىلدىق اۋماقتارىن دامىتۋدىڭ 2023 – 2027 جىلدارعا ارنالعان تۇجىرىمداماسىن بەكىتۋ تۋرالى» № 270 قاۋلىسىنا سايكەس, «اۋىل – ەل بەسىگى» جوباسى اياسىندا دەنساۋلىق ساقتاۋ سالاسىنىڭ تەك العاشقى مەديتسينالىق-سانيتاريالىق كومەك وبەكتىلەرىن سالۋ, رەكونسترۋكتسيالاۋ, كەڭەيتۋ جانە كۇردەلى جوندەۋ شىعىندارى قارجىلاندىرىلادى.
ماجىلىسمەننىڭ پىكىرىنشە, دەنساۋلىق ساقتاۋ سالاسىنىڭ ينفراقۇرىلىمدارىن دامىتۋدى كوزدەيتىن شىعىندار قوماقتى قاراجاتتى تالاپ ەتەدى. سونداي-اق رەسپۋبليكالىق بيۋدجەتتىڭ قولداۋىنسىز قوردالانعان ماسەلەنى شيراتۋ جەرگىلىكتى بيۋدجەتكە اۋىرتپاشىلىق ءتۇسىرىپ جاتىر. الايدا, قولدانىستاعى زاڭناما اتالعان ماسەلەلەرگە رەسپۋبليكالىق بيۋدجەتتەن قاجەتتى قاراجاتتى باعىتتاۋعا ءوز كەدەرگىسىن كەلتىرەدى.
مۇقاش ەسكەندىروۆ جاڭا بيۋدجەت كودەكسىنە سايكەس وبلىستىق بيۋدجەتتەن كورپوراتيۆتىك جانە جەكە تابىس سالىعىنىڭ تۇسىمدەرى تولىقتاي اۋداندىق دەڭگەيگە بەرىلگەنىمەن دەنساۋلىق ساقتاۋ جانە ءبىلىم سالاسىنىڭ شىعىندارى وبلىستىق دەڭگەيدە قارجىلاندىرىلاتىنىن دا اتاپ ءوتتى.
«جوعارىدا اتالعان جۇيەلى ماسەلەنى شەشۋ ءۇشىن, وڭىرلەردەگى ورتالىق اۋرۋحانا عيماراتتارىن قايتا جاڭعىرتۋ, كۇردەلى جوندەۋ جانە كەڭەيتۋ جۇمىستارىنا رەسپۋبليكالىق بيۋدجەتتەن قارجىلاندىرۋ مۇمكىندىكتەرىن قاراستىرۋ ماقساتىندا «قازاقستان رەسپۋبليكاسىنىڭ اۋىلدىق اۋماقتارىن دامىتۋدىڭ 2023 – 2027 جىلدارعا ارنالعان تۇجىرىمداماسىن بەكىتۋ تۋرالى» № 270 قاۋلىسىنا جانە قازاقستان رەسپۋبليكاسى قارجى ءمينيسترىنىڭ 2015 جىلعى 25 اقپانداعى «نىسانالى دامۋ ترانسفەرتتەرىن قاراۋ جانە ىرىكتەۋ قاعيدالارىن بەكىتۋ تۋرالى» № 126 بۇيرىعىنا ءتيىستى تولىقتىرۋلار مەن وزگەرىستەر ەنگىزۋگە ىقپال ەتۋىڭىزدى سۇرايمىز» دەدى م.ەسكەندىروۆ.
