سۋرەتشىگە تالانت پەن شەبەرلىكتەن بولەك شىنايىلىق تا كەرەك. جانسىز كارتينا كوڭىلدى قوزعامايدى. ال شىنايىلىقتى قانداي تۇستەرمەن, قانداي دەتالدارمەن بەرەتىنىن ناعىز سۋرەتشى ءسوزسىز بىلەدى. ورال تاڭسىقباەۆتىڭ اتىن اسپانعا شىعارىپ, قولتاڭباسىن تانىتقان دا وسى شىعارمالارىنداعى نازىك شىنايىلىق. اسەم تابيعات پەن ولكە تىنىسى, ىستىق كۇننىڭ نۇرى اۆتور قىلقالامىندا وزگەشە بەينەلەندى. بىرىمەن-ءبىرى تالاسقان بوياۋلار تولقىنىنا ەرەكشە ءبىر جىلىلىق, اۋەزدى اۋەن قوسىلدى. ەڭ باستىسى, ارقاشان ءوز زامانىنىڭ كەلبەتى مەنمۇندالايدى: مالىن باققان باقتاشى, ءونىم تەرگەن ماقتاشى, قاربىز ەككەن, كەتپەن كوتەرگەن ديقانىن سالدى. سۋرەتتەرىنەن سول ۋاقىتتىڭ لەبى, ادامداردىڭ جان تولقىنىسى, كوڭىل كۇيى سەزىلىپ تۇرادى. بايقاساڭىز, كلاسسيك كەسكىندەمەشىنىڭ ءاربىر كوركەم تۋىندىسىندا رەڭ, بوياۋ ۇندەستىگى, فورما, كولەم, پلاستيكالىق اناتوميا, اۋقىمدى كەڭىستىك زاڭدىلىقتارى قاتاڭ ساقتالعان. شەبەردىڭ شەبەرلىگىنە تالاس جوق. بوياۋ قانىقتىلىعى, رەڭدەردىڭ ۇندەستىك نيۋانستارى, بايلانىس قۇپياسىن ءدال تاۋىپ, كوركەمدىككە ۇلاستىرىپ, ۇيلەستىرە ءبىلۋى دە تەك وزىنە ءتان اۆتورلىق ستيلگە اينالدى. العاشقىدا تۇرمىستىق جانردا, ەڭبەك تاقىرىبىندا سۋرەتتەر سالىپ باستاسا, قىرقىنشى جىلداردان پەيزاج جانرىنا ءبىرجولا بەت بۇرىپ, تابيعاتتىڭ ءار كۇيىنە, ءار ساتىنە, ءار تۇسىنە تەرەڭدەي قارادى. ءار تەرەڭدەگەن سايىن قىلقالامى دا ۇشتالا بەردى. پەيزاج سەرياسىنداعى جۇمىستارى «تاڭسىقباەۆتىڭ تابيعاتى» دەيتىندەي اۆتورلىق دەڭگەيگە جەتتى.
ءيا, تابيعاتپەن شىن تالانت قانا تالاسا السا كەرەك. وسىنداي شىعارماشىلىق ىزدەنىستەن تۋعان ءبىر تۋىندى – «مەنىڭ ءانىم». اۆتوردىڭ 1972 جىلى سالعان كارتيناسى تابيعات كورىنىسىمەن قاتار ءومىردىڭ ءوزىن جىرلايدى. جالپى, ادام جانىن تەبىرەنتىپ, ويىن تەڭىزدەي تولقىتاتىن كەز كەلگەن شىعارمانىڭ بويىندا نازىك ءبىر يىرىمگە ىلەسكەن اۋەن بولادى دەيمىز. بالكي, بۇل سۋرەتكەردىڭ كوڭىل تۇكپىرىنەن سىزىلىپ جاتقان ءوز مۋزىكاسى شىعار. تابيعاتتىڭ قۇشاعىنا ەنىپ, تىنىشتىق پەن تالانتتىڭ تۇيىسكەن تۇسىندا الگى اۋەز كەنەپ بەتىنە بويالا ءتۇسۋى تاڭعاجايىپ كۇي ەمەس پە؟ تابيعاتتان تولقىنىس, تىنىشتىقتان ءان ىزدەگەن سۋرەتشىنىڭ قىلقالامى دا مۇنداي ساتتە تاۋدان تۇسكەن بۇلاقتاي جۇيتكي جونەلەرى حاق.
ءومىر دەگەن ۇيلەسىم دەپ جاتامىز. ماحاببات پەن عاداۋات, ساتتىلىك پەن ساتسىزدىك, باقىت پەن قايعى قاتار جۇرەتىن تىرشىلىكتىڭ ۇيلەسىمىن ساقتاۋىمىز كەرەك-ءتى. كەڭ پولوتنوعا تولى «مەنىڭ انىمە» زەردەلەي قاراساق, وسى ۇيلەسىم زاڭدىلىعى ەرىكسىز ەسكە تۇسەدى. سۋرەتشىنىڭ كەمەلدەنگەن شاعىندا سالعان بۇل جۇمىسىندا قابات-قابات ماعىنا بارداي. تۇستەردىڭ, اسپان مەن جەردىڭ, تاۋ مەن تاستىڭ, قيۋلاسقان تاعدىردىڭ, ۇمىتكە تولى ءومىردىڭ ۇيلەسىمى كورىنەدى. «مەنىڭ ءانىم» – ورال تاڭسىقباەۆتىڭ ءومىر, مەيىرىم مەن ىزگىلىك ءھام ءوزى تۋرالى سوڭعى وداسى. سۋرەتشى ءۇشىن تابيعات – تىنىشتىق ستيحياسى. سول ۇنسىزدىكتە جارىققا تولى پوەتيكالىق پەيزاج بەينەلەدى. جۇمىستىڭ جالپى كولوريتى كۇنگە كومكەرىلگەن تاۋ شىڭدارىنداعى كوكشىل تۇستەردەن باستاپ, شاتقالدا كوكتەگەن كوك شالعىنعا دەيىن سۋىق تۇستەردە سالىنعان. كارتينانىڭ شىنايىلىعى سونشالىق, قارسى الدىندا تۇرىپ, تاۋدان ەسكەن كوكتەمگى سامال جەلدى سەزىپ تۇرعانداي كۇي كەشەسىڭ. كومپوزيتسيا قۇرۋدا اۆتوردىڭ اۋا اتموسفەراسىن بەرۋدەگى وزىندىك ءتاسىلى دە بىردەن بايقالادى. اشىق سارى گۇلدەردىڭ فونداعى تاۋلارمەن كونتراستى, شەبەرلىكپەن تۇسكەن كۇن ساۋلەسى, ءيىرىم جول, ارتقى فونداعى تاۋلار مەن زەڭگىر اسپان – كارتينانىڭ بوياۋىن ۇستەپ, تەرەڭگە تارتادى.
جالپى, ورال تاڭسىقباەۆتىڭ سوڭعى پەيزاجدارى كەڭىستىكتىڭ كەڭدىگىمەن, شەكسىزدىگىمەن ەرەكشەلەنەدى. مۇندا دا سول ستيل, سول قولتاڭبا. تاۋ مەن اسپاننىڭ ۇشتاسقان تۇسىندا ماڭگىلىك مەكەن بارداي. ماڭگىلىك مەكەندە ماڭگىلىك مۋزىكا ىڭىلدايدى. تابيعاتتىڭ ىشكى اۋەنىن تىڭداي الاتىن سۋرەتشى سول اۋەزدى شىعارمالارىندا دا بەينەلەي الدى. ءوزىنىڭ انىنە اينالدىردى.
