ەلدىڭ الەۋمەتتىك-ەكونوميكالىق تۇرعىدا ورىستەۋى سول قوعامداعى ادامي فاكتورمەن تىكەلەي بايلانىستى. جان-جاقتى دامىعان, ءوز ءىسىن جەتىك بىلەتىن قابىلەتتى ازاماتتار تۇتاس مەملەكەتتىڭ ىلگەرىلەۋىنە ۇلەس قوسا الادى. ءارى بۇل مامانداردى قوعامدا, اسىرەسە جاستار اراسىندا مەيلىنشە ناسيحاتتاۋ كەمەل كەلەشەكتىڭ قابىرعاسىن قالاعانمەن تەڭ.
پرەزيدەنت قاسىم-جومارت توقاەۆ 2025 جىلدى «جۇمىسشى ماماندىقتارى جىلى» دەپ جاريالادى. وسىلايشا ەلدە بيىل قۇرىلىس, اۋىل شارۋاشىلىعى, ونەركاسىپ سىندى قاراپايىم ەڭبەك ادامدارىنا ەرەكشە كوڭىل بولىنەدى. وسى ماقساتتا «جاستار رۋحى» جاستار قاناتى قوستانايدىڭ جوعارى وقۋ ورىندارى مەن كوللەدج ستۋدەنتتەرىن جيىپ, ديالوگ الاڭىن ۇيىمداستىردى. كەزدەسۋدە جۇمىسشى مامانداردى ناسيحاتتاۋ, ءوندىرىس سالاسىن جاڭعىرتۋ, شەتەلدىك ينۆەستيتسيالار تارتۋ جانە زاماناۋي جابدىقتاردى ەنگىزۋ جايى تالقىلاندى.
– ستۋدەنتتەر قازىر وسى جۇمىسشى ماماندىقتاردى وقي وتىرىپ, ديپلوم العان سوڭ ءوز ماماندىعى بويىنشا قىزمەت ەتۋى ءۇشىن وسىنداي الاڭ ۇيىمداستىرىپ وتىرمىز. ءبىزدىڭ وسى جىلعا قويعان ماقسات – مەملەكەت باسشىسى بەكىتكەن جۇمىسشى ماماندىقتارىنىڭ مەرەيىن اسىرۋ, ولاردىڭ قىزمەتىن قوعامدا كەڭىنەن تانىتۋ ءۇشىن ءىس-شارالاردى كوپتەپ وتكىزۋ, – دەدى «جاستار رۋحى» قوستاناي وبلىستىق فيليالىنىڭ توراعاسى ارۋجان سارسەمباەۆا.
سپيكەر رەتىندە شاقىرىلعان دانەكەرلەۋ تسەحىنىڭ مەنەدجەرى دميتري پارفەنوۆ جۇمىس بەرۋشىلەردىڭ جاستارمەن ءوزارا ءىس-قيمىلىن جاقسارتۋعا كوڭىل ءبولۋ كەرەك ەكەنىن ايتىپ قالدى.
– جۇمىسشى ماماندىقتارىنا ءبىلىم بەرۋ جۇيەسىنە, جاستاردى وندىرىسكە تارتۋ بويىنشا جۇمىس بەرۋشىلەردىڭ تاسىلىنە دە ۇلكەن نازار اۋدارۋ كەرەك. سەبەبى قازىرگى ءوندىرىس الاڭدارى بۇرىنعىعا قاراعاندا الدەقايدا زاماناۋي جانە بەلگىلى ءبىر بىلىكتىلىك داعدىلارى مەن ءبىلىمدى قاجەت ەتەدى, – دەدى د.پارفەنوۆ.
اقتاۋدا دا «Bir tolqynda» ديالوگتىق الاڭى ۇيىمداستىرىلىپ, كەزدەسۋدە تۋريزم جانە قوعامدىق تاماقتانۋ سالالارىنىڭ ماڭىزدىلىعىنا توقتالدى.
– ءبىزدىڭ ەكونوميكامىز جۇمىسشى ماماندىقتارىنا تاۋەلدى. بۇل تەك دانەكەرلەۋشىلەر, مونتاجشىلار نەمەسە قۇرىلىسشىلار ەمەس, سونداي-اق قوعامدىق تاماقتانۋ سالاسىنىڭ وكىلدەرى, اسپازدار, باسقارۋشىلار دا بار. اقتاۋ تۋريستىك ءوڭىر بولىپ ەسەپتەلەتىندىكتەن, بۇل سالا ماڭىزدى. سول سەبەپتى ستۋدەنتتەرگە قوعامدىق تاماقتانۋ جانە قوناقۇي بيزنەسىن باسقارۋ سالاسىندا جۇمىس ىستەۋدىڭ ارتىقشىلىقتارىن تۇسىندىرگەن رەستوراتوردى شاقىردىق, – دەدى «جاستار رۋحى» ماڭعىستاۋ وبلىستىق فيليالىنىڭ توراعاسى ابزال مارات. ال وسكەمەندە قاتىسۋشىلار جاڭا وقۋ باعدارلامالارى مەن تەحنولوگيالاردىڭ دامۋىنا زەيىن قويدى. بۇل ستۋدەنتتەرگە قاجەتتى داعدىلاردى تەزىرەك مەڭگەرۋگە مۇمكىندىك بەرەدى. شىعىس قازاقستان وبلىسى كاسىپوداقتار بىرلەستىگى توراعاسىنىڭ ورىنباسارى ايجان گاسانوۆا كاسىپوداقتاردىڭ بۇل باستامانى قولدايتىنىن جانە جۇمىسشىلاردىڭ قۇقىقتارىن قورعاۋدا بەلسەندى جۇمىس جۇرگىزىپ جاتقانىن جەتكىزدى.
تاراز قالاسى دا بۇل باستامادان تىس قالمادى. الاڭدا كاسىبي دامۋمەن قاتار, «وتباسى بانكى» ارقىلى تۇرعىن ءۇي الۋ جانە كولىك ماسەلەلەرى ءسوز بولدى.
– «Amanat» پارتياسى جانىندا جاستاردى قولداۋ جونىندەگى وڭىرلىك كەڭەس جۇمىس ىستەيدى. بۇل الاڭدا جاستارعا قاتىستى ءتۇرلى پروبلەما كوتەرىلەدى. ءبىز وسى كەزدەسۋدە تالقىلانعان ماسەلەلەردى الداعى كەڭەس وتىرىسىندا قاراستىرامىز. «Bir tolqynda» باستاماسى جۇمىسشى ماماندىقتارىنىڭ ەلىمىزدىڭ تۇراقتى دامۋى ءۇشىن ماڭىزدىلىعىن كورسەتىپ, ولاردى جاستار اراسىندا دارىپتەپ, ءارتۇرلى سالالارداعى مانساپتىق ءوسۋ كەلەشەگىن ايقىنداۋدا ماڭىزدى ءرول اتقارادى, – دەدى جامبىل وبلىسىنداعى «Amanat» پارتياسى جاستار قاناتىنىڭ توراعاسى ەرعالي رۇستەم ۇلى.
