دەۆيد و’سالليۆان ەلدىڭ رەسمي وكىلدەرىمەن بولعان كەزدەسۋدە باتىس ەلدەرىنىڭ رەسەيگە قاتىستى ەنگىزگەن سانكتسيالارىن اينالىپ وتۋگە جول بەرمەۋ ءۇشىن قازاقستان قانداي شارالار قابىلداپ جاتقانىن تالقىلاعانىن ايتتى.
– قازاقستان – ەۋرووداقتىڭ, سونداي-اق ەو قازاقستاننىڭ ەڭ ماڭىزدى سەرىكتەستەرىنىڭ ءبىرى. ءبىزدىڭ ساۋدا بايلانىسىمىز جاقسى دامىپ كەلەدى. جىل سايىنعى تاۋار اينالىم 40 ملرد ەۋرونى قۇرايدى. قازاقستاننىڭ 38 پايىز ەكسپورتى بىزگە تيەسىلى. وسى جىلى ءبىز بىرنەشە حالىقارالىق كەزدەسۋ وتكىزەمىز, ونىڭ ءبىرى ناۋرىز ايىندا اشحابادتا وتەدى. ال ساۋىردە ەۋرووداق – ورتالىق ازيا ءسامميتىن وتكىزەمىز دەپ جوسپارلاپ وتىرمىز, – دەدى د.و’سالليۆان.
– قازاقستان ۇكىمەتىمەن كەزدەسۋىمىز ستراتەگيالىق ماڭىزدى تاۋارلاردىڭ رەسەي نارىعىنا ەنۋىنە جول بەرمەۋگە باعىتتالعان. اسىرەسە اسكەري الەۋەتتى ارتتىراتىن تاۋارلار – ەرەكشە نازاردا. وسىنداي تاۋارلاردىڭ زاڭسىز ەكسپورتىنا جول بەرمەۋىمىز قاجەت. مەن وسىمەن قازاقستانعا ءتورتىنشى رەت كەلىپ وتىرمىن. كەلىسسوزدەر ناتيجە بەرىپ كەلەدى, قازىر ءبىز ەداۋىر العا باسۋدى, ەكسپورت كولەمىنىڭ ايتارلىقتاي تومەندەگەنىن كورىپ وتىرمىز.
جالپى, ءبىز زاڭسىز ساۋدامەن اينالىسىپ, سانكتسيالىق تاۋارلاردى رەسەيگە جونەلتەتىن كومپانيالاردى انىقتاۋ جۇمىسىن ودان ءارى جۇرگىزە بەرەمىز. انىقتالعان مۇنداي كومپانيالار دەرەۋ تىزىمگە ەنگىزىلەدى. وسىنىڭ ناتيجەسىندە ولار ەۋروپالىق كومپانيالارمەن جانە ءۇشىنشى ەلدەرمەن بيزنەس ورناتا المايدى. مىسالى, ءۇندىستاندا, يراندا, قىتايدا زاڭسىز ارەكەت ەتكەن كومپانيالار تىركەلدى. بۇل جەردە اتاپ وتكىم كەلەتىنى ولار تىزىمگە تەك زاڭسىز ساۋداعا قاتىسقانى جانە ىقپال ەتكەنى ءۇشىن ەنگىزىلەدى, – دەدى ەو وكىلى.
د.و’سالليۆاننىڭ ايتۋىنشا, ەۋروپا جانە ۇلكەن جەتىلىك ەلدەرىندە شىعارىلعان تاۋارلاردى عانا رەسەيگە تاسىمالداۋعا تىيىم سالىنعان. سونداي-اق ول اسكەري تاۋارلار قازاقستانداعى جالپى اينالىم تاۋارىنىڭ ءبىر پايىزىنان از كولەمدى قۇراپ وتىرعانىن جانە ەكونوميكالىق تۇرعىدان اسا ماڭىزدى ەمەس بولعانىمەن, اسكەري-ونەركاسىپتىك كەشەن ءۇشىن بومبا, زىمىراندار وندىرىسىندە ۇلكەن ماڭىزعا يە ەكەنىن اتاپ ءوتتى.
«جالپى, جۇرگىزىلگەن كەلىسسوزدەرگە كوڭىلىمىز تولادى», دەدى و’سالليۆان. ونىڭ ايتۋىنشا, ەو «قازاقستاننىڭ سانكتسيالارعا قوسىلماۋ تۋرالى شەشىمىن تولىعىمەن قۇرمەتتەيدى». ء«بىز قازاقستاننان سانكتسيالارىمىزدى قابىلداۋدى سۇرامايمىز. قازاقستان مەن رەسەي اراسىنداعى ۇزاق ۋاقىتتان بەرى جالعاسىپ كەلە جاتقان, ءالى دە جالعاساتىن زاڭدى ساۋداعا كەدەرگى جاساۋعا نيەتتى ەمەسپىز. الايدا ەۋرووداق «جوسىقسىز سۋبەكتىلەر قازاقستاندى سانكتسيالاردان جالتارۋ جانە ەۋروپالىق وداق سانكتسيالاعان تاۋارلاردى قايتا ساتۋ ماقساتىنداعى پلاتفورما رەتىندە پايدالانۋعا ۇمتىلۋى مۇمكىن» دەپ الاڭدايدى» دەدى ول.
قازىر ەۋروپالىق كوميسسيا رەسەي – ۋكراينا قاقتىعىسى باستالعاننان بەرى وعان قارسى قولدانىلاتىن شەكتەۋ شارالارىنان جالتارۋدى بولدىرماۋ نەمەسە ءتىپتى ولاردى اينالىپ وتۋىنە مۇمكىندىك بەرمەۋ ءۇشىن بىرقاتار ەلدەرمەن جوعارى دەڭگەيدەگى ۇزدىكسىز كەزدەسۋلەر جۇرگىزىپ جاتىر. وسىعان وراي ولار كەلىسسوزدەر جۇرگىزۋ ماقساتىندا سانكتسيالاردى جۇزەگە اسىرۋ جونىندەگى ەو حالىقارالىق ارنايى وكىلى لاۋازىمىن قۇردى. كوميسسيانىڭ بۇرىنعى باس حاتشىسى جانە ەو-نىڭ اعا ديپلوماتى دەۆيد و’سالليۆان 2022 جىلدىڭ قاڭتارىنان باستاپ ەو-نىڭ سانكتسيالاردى جۇزەگە اسىرۋ جونىندەگى حالىقارالىق ارنايى وكىلى بولىپ تاعايىندالدى.
