اسكەريلەردىڭ ايتۋىنشا, ورال قالاسىنداعى «زەنيت» زاۋىتىندا جاسالعان «سارىارقا» زىمىران-ارتيللەريالىق كەمەسىنىڭ زاماناۋي قارۋ-جاراق جانە ناۆيگاتسيا جۇيەسىمەن جاراقتاندىرىلۋى اسكەري-تەڭىز كۇشتەرى فلاگماندارىنىڭ بىرىنە كاسپي تەڭىزىنىڭ قازاقستاندىق سەكتورىنىڭ اكۆاتورياسىن قورعاۋ جونىندەگى مىندەتتەردى ويداعىداي شەشۋگە مۇمكىندىك بەرەدى.
– «سارىارقا» كەمەسىنىڭ تەحنولوگيالىق مۇمكىندىكتەرى جانە جەكە قۇرامدى دايارلاۋدىڭ جوعارى دەڭگەيى ابىرويلى قىزمەتتىڭ ماڭىزدى قۇرامداس بولىگى بولىپ تابىلادى. كەمە ەكيپاجى ەل اۋماعىندا دا, ودان تىس جەرلەردە دە وتكىزىلگەن وقۋ-جاتتىعۋلارعا قاتىسىپ, حالىقارالىق ارميا ويىندارىنىڭ بىرنەشە دۇركىن جۇلدەگەرى بولدى, دەيدى «سارىارقا» زىمىران-ارتيللەريالىق كەمەسىنىڭ كومانديرى 3-دارەجەلى كاپيتان دامير ماتاەۆ.
كەمە بورتىندا اسكەري-تەڭىز كۇشتەرىنىڭ دامۋىنا ەلەۋلى ۇلەس قوسقان جۇزدەگەن اسكەري قىزمەتشى دايارلىقتان ءوتتى. سونداي-اق «سارىارقا» زىمىران-ارتيللەريالىق
كەمەسىن جاساۋ ەلدىڭ قورعانىس قابىلەتىن نىعايتۋ جونىندەگى اۋقىمدى باعدارلامانىڭ ءبىر بولىگىنە اينالعان. كاسىپقويلىقتىڭ جوعارى دەڭگەيى جانە اسكەري تەڭىزشىلەردىڭ جانقيارلىق قىزمەتى اسكەري كومانداعا ديۆيزيون قۇرامىنداعى ەڭ جاقسى ارتەكتى كەمەلەردىڭ ءبىرى مارتەبەسىن بەردى.
قاۋىپسىز قورعانىسقا قۋاتتى قۇرال-جابدىق كەرەك دەسەك, اسكەري تەڭىزشىلەردىڭ وڭ باعاسىنا يە بولعان «سارىارقا» زىمىران-ارتيللەريالىق كەمەسى تەڭىز بەتىندە ءوزىنىڭ ەكىنشى ونجىلدىعىنىڭ ءىزىن سالىپ باستادى.
ماڭعىستاۋ وبلىسى
