القاپ كولەمى ۇلعايادى

مەجە تولىق ورىندالسا, كولەم 2024 جىلعىدان 52,9 مىڭ گەكتارعا ارتىق بولادى دەگەن بولجام بار. بۇل ەگىس القاپتارىن ءارتاراپتاندىرۋ ناتيجەسىندە مۇمكىن بولماقشى.

«بارلىق ەگىس القابىنىڭ 974,0 مىڭ گەكتارى نەمەسە 94 پايىزى استىق داقىلدارى بولادى. بيىل مايلى داقىلداردىڭ ەگىس تانابى 3 پايىزعا ءوسىپ, 360,9 مىڭ گەكتارعا, كارتوپ القابى 4 پايىزعا ارتىپ, 25,7 مىڭ گەكتارعا جەتەدى دەپ كۇتىلىپ وتىر. ال كوكونىس جانە باقشا داقىلدارى وتكەن جىلدىڭ كولەمىندە – 8,8 مىڭ گەكتار بولىپ قالا بەرەدى. بۇعان قوسا اۋدانداردا مىقتى جەم-ءشوپ بازاسىن قۇرۋ جۇمىستارى جۇرگىزىلىپ جاتىر. وسىعان وراي بيىل جەم-ءشوپ داقىلدارىنىڭ الاڭىن بىردەن 18,8 مىڭ گەكتارعا ارتتىرۋ جوسپارلانىپ, جالپى سەبۋ اۋماعى 300 مىڭ گەكتارعا جەتكىزىلەدى», دەيدى وبلىستىق اۋىل شارۋاشىلىعى باسقارماسى باسشىسىنىڭ ورىنباسارى تولەگەن كوشەرباەۆ.

الداعى ەگىسكە 164,4 مىڭ توننا تۇقىم دايىندالىپ قويعان. تۇقىم بويىنشا وڭىردە ماسەلە جوق, ءتىپتى ءداندى داقىلدار بويىنشا ونىڭ كولەمى 7,5 مىڭ تونناعا كوپ.

ەگىن شارۋاشىلىعىن قولداۋعا 2025 جىلى جالپى سوماسى 4,1 ملرد تەڭگە سۋبسيديا قاراستىرىل­عان. اتاپ ايتقاندا, تۇقىم شارۋاشى­لىعىن قولداۋعا – 1 ملرد تەڭگە, مينەرالدى تىڭايتقىشتار مەن پەستيتسيدتەردىڭ قۇنىن سۋبسي­ديالاۋعا – 2,7 ملرد تەڭگە, فەرمەرلەرگە سۋ جەتكىزۋ قىزمەتتەرىنىڭ قۇنىن سۋبسيديالاۋعا 300 ملن تەڭگە بولىنگەلى وتىر. دەمەۋ قارا­جاتتىڭ كولەمى وتكەن جىلمەن سالىستىرعاندا 5,4 ملرد تەڭگەگە كەمىگەنىن دە اتاپ ءوتۋ كەرەك.

قازىر ءىرى شارۋاشىلىقتار قار توقتاتۋ ءىس-شارالارىنا كىرىسە باستاعان. تازا ءسۇرى جەردە قار جامىلعىسىنىڭ بيىكتىگى 14 سم, ال ىقتىرمادا 15 سم-دەي بولادى. قار توقتاتۋدىڭ العاشقى كەزەڭى 74,4 مىڭ گەكتاردا جۇرگىزىلگەن.

كوكتەمدە قۇرىلىسى ءبىراز ۋاقىتقا سوزىلعان ەرتىس-ۋسپەن سۋ ارناسى ىسكە قوسىلادى دەپ جوسپارلانعان. ونىڭ قۇرىلىسى كەڭەس زامانىندا قولعا الىنىپ, كەيىن توقتاپ قالعان ەدى. ۇزاق جىلدار تۇرىپ قالۋىنا بايلانىستى تۇبىنە ءشوپ ءوسىپ, سالىنعان بەتون پليتالارىن ەل-جۇرت تاراتىپ الىپ كەتكەن. 2020 جىلى سۋ قۇرىلىسى قايتادان قولعا الىندى. كانال العاشقى بەتتە 1,4 مىڭ گەكتار سۋارمالى ەگىستىكتى تىرشىلىك نارىمەن قامتاماسىز ەتەدى. تەحنيكالىق قىزمەت كورسەتەتىن پاۆلودار اۋدانىنىڭ ەكى شارۋاشىلىعى وعان قازىردىڭ وزىندە قوسىلىپ, قاجەتتى تەحنيكالىق جاعدايلار جاسالعان. ەرتىس-ۋسپەن كانالىنان تاعى 12 فەرمەر سۋ الۋعا نيەتتى. بولاشاقتا كانال 10 مىڭ گەكتار جەردى سۋارۋعا مۇمكىندىك بەرەدى دەگەن جوسپار بار. جوبا بويىنشا كانالدىڭ ۇزىندىعى – 13 شاقىرىم. شارۋاشىلىقتار ونىڭ كومەگىمەن قوسىمشا 500 مىڭ توننا اۋىلشارۋاشىلىق داقىلدارىن وسىرە الادى.

قازىرگى ۋاقىتتا ءوڭىر اۋما­عىندا 171 مىڭ گەكتار سۋارىلاتىن جەر بار. ءىس جۇزىندە بۇل اۋماقتىڭ تەك 72 مىڭ گەكتارى عانا سۋارىلادى. كەلەشەكتە وبلىستا جالپى كولەمى 300 مىڭ گەكتاردى جەردى سۋارمالى القاپقا اينالدىرۋ جوسپارى تۇر.

پاۆلودار وبلىسى