اتام قازاقتا «ۇرى باسىنىپ ۇرلايدى» دەيتۇعىن ۇعىم بار. ابدەن دانىككەن سۋىققول سۇعاناقتار مال سۇمەسىمەن كۇن كورگەن مومىن حالىقتى باسىنىپ-اق تۇر. ءتۇن قاتىپ, وڭاي ولجا كوزدەگەن ۇرىلار 59 باس جىلقىنى تەبىندە جۇرگەن جەرىنەن ايداپ الىپ كەتكەن. ۇرلىق كوپ ۇزاماي اشىلدى. استانا–پەتروپاۆل باعىتىنداعى كۇرە جولدىڭ بويىندا پوليتسيا قىزمەتكەرلەرى اۆتوكولىكتى توقتاتقان كەزدە جۇك سالعىشىنان جاڭا سويىلعان جىلقىنىڭ بۋى بۇرقىراپ جاتقان ىشەك-قارنى مەن قانعا بوككەن تەرىسى تابىلعان. كولىك يەلەرىنىڭ ەشبىر قۇجاتتارى جوق. ىشەك-قارنى بولعانىمەن ەتى كوزگە تۇسپەگەن سوڭ كۇدىك تۋعان. جەدەل ىزدەستىرۋ بارىسىندا ستەپنوگور قالاسىنىڭ ماڭىنداعى قىرىققۇدىق اۋىلىنىڭ جىلقىسى بولىپ شىقتى. ۇرىلار ايدارلى اۋىلىنىڭ ماڭىنداعى قورادا جىلقىنىڭ بىرنەشەۋىن سويىپ, ساتا باستاعان. قىلمىستىق ءىس قوزعالىپ, وڭاي ولجاعا دانىككەندەر جازاسىن تارتاتىن بولدى.
ەرەيمەنتاۋ اۋدانىندا دا مال ۇرلىعى ورىن العان. جەرگىلىكتى تۇرعىندار 13 باس جىلقىسى جوعالعانىن قۇقىق قورعاۋ ورگاندارىنا حابارلاپتى. جابىرلەنۋشىنىڭ ايتۋىنا قاراعاندا, «گازەل» اۆتوكولىگىن مىنگەن بەلگىسىز بىرەۋلەر ەرەيمەننىڭ ەتەگىندە جايىلىپ جۇرگەن ءبىر ءۇيىر جىلقىنى ۇپتەپ كەتكەن. مالساق قاۋىمعا كەلتىرىلگەن شىعىن – 8,5 ملن تەڭگە توڭىرەگىندە. وقىس وقيعادان دەر كەزىندە حابارلانعان پوليتسيا قىزمەتكەرلەرى جەدەل ىزدەستىرۋ جۇمىستارىن ۇتىمدى ۇيىمداستىرۋدىڭ ارقاسىندا كوپ ۋاقىت وتپەي, ۇرىلاردى قولعا ءتۇسىردى. ولار ەكى جىلقىنى سويىپ ساتىپ ۇلگەرىپتى. قالعان 11 باس يەسىنە قايتارىلدى.
زاڭ قانشالىقتى قاتايعانىمەن, مال ۇرلىعى تولاستاماي تۇر. ايتسە دە, قۇقىق قورعاۋ ورگاندارى قىزمەتكەرلەرىنىڭ ءجىتى قيمىلداۋى ارقىلى قىلمىستىڭ ءىزى سۋىماي اشىلىپ جاتىر. بۇل ورايدا مالساق قاۋىمدى ساقتاندىرۋ دا ءىشىنارا جەمىسىن بەرىپ جاتىر. 2003 جىلى 79 مال ۇرلىعى ورىن السا, 2024 جىلى مۇنداي شەتىن وقيعالار 37 رەت بولعان. دەمەك مال ۇرلىعى 54 پايىزعا ازايدى دەگەن ءسوز. ۇرلىق جاساعان 25 ادام قولعا ءتۇسىپ, ءۇش قىلمىستىق توپتىڭ جولى كەسىلگەن.
ايتسە دە, مال يەلەرى ءالى كۇنگە دەيىن البىرت. وزدەرىنىڭ ماڭداي تەرىمەن ءوسىرىپ وتىرعان ءتورت ت ۇلىگىنە يە بولا الماي وتىر. كۇرە جولعا جاقىن ورنالاسقان اۋىلداردىڭ مالى جول ۇستىنە شىعىپ كەتىپ, جول-كولىك وقيعاسىنا سەبەپ بولادى. مۇنداي جايلار دا از ەمەس. 2 564 مال يەسىنە ءتورت ت ۇلىك مال باعۋ ەرەجەسىن بۇزعانى ءۇشىن اكىمشىلىك شارا قولدانىلعان. 229 ادام مال ونىمدەرىن زاڭسىز تاسىمالداعانى ءۇشىن جاۋاپقا تارتىلعان.
اقمولا وبلىسى
