ساراپشى ۇكىمەتتىڭ كەڭەيتىلگەن وتىرىسىندا پرەزيدەنت قاسىم-جومارت توقاەۆ ماقتاۋدان گورى سىندى كوبىرەك ايتقانىن اتاپ ءوتتى.
«ۇكىمەتتىڭ 2024 جىلى اتقارعان جۇمىسىنا كوڭىلى تولمايتىنداي اسەر قالدىردى. ۇكىمەتكە جۇمىستى جەتىلدىرۋگە بايلانىستى ءبىراز ناقتى تاپسىرمالار بەرىلدى. ول اسىرەسە ەكونوميكانىڭ دامۋ قارقىنى, ينفلياتسيانىڭ جوعارى دەڭگەيى جانە حالىقتىڭ تابىسىنىڭ وسۋىنە قاتىستى ناقتى ماسەلەلەردى كوتەردى. ارينە بۇل ماسەلەلەر وزەكتىلىگىن جويمايدى, ەلىمىزدىڭ دامۋى ءۇشىن, حالىقتىڭ جاعدايىن جاقسارتۋعا باعىتتالعان شارالاردى ىسكە اسىرۋدا ناتيجە بەرەتىن ناقتى مەحانيزمدەر كەرەك. قازىرگى جاھاندىق جانە ىشكى جاعدايعا بايلانىستى رەفورمالاردى جەدەلدەتۋ قاجەت», دەيدى ول.
جاقسىبەك جيەناليەۆتىڭ ايتۋىنشا, قازىرگى تاڭدا حالىقتىڭ ءومىر ءسۇرۋ دەڭگەيىن كوتەرۋ, جۇمىس ورىندارىن اشۋ, اۋىل شارۋاشىلىعىن قولداۋ, وتاندىق ءوندىرىستى دامىتۋ باستى مىندەتتەردىڭ ءبىرى.
«پرەزيدەنتتىڭ سىني ەسكەرتۋلەرى ۇكىمەتتىڭ ناقتى ناتيجەگە جۇمىس ىستەۋىن تالاپ ەتەدى. ەگەر بۇل تاپسىرمالار ۋاقتىلى ءارى ساپالى ورىندالسا, ەلدەگى تۇراقتىلىق پەن دامۋ ايتارلىقتاي جاقسارادى دەپ ويلايمىن. سونداي-اق, كادر ماسەلەسىن قوزعادى, شەنەۋنىكتەرگە بوس مالىمەتتەر مەن كوزبوياۋشىلىق ەسەپتەردەن اۋلاق بولۋ كەرەكتىگىن ەسكەرتتى. شىنىمەن دە, مەملەكەتتىك باسقارۋدا شىنايىلىق پەن جاۋاپكەرشىلىك قاجەت, ءوز بەتىنشە شەشىم قابىلداۋدان قورىقپايتىن, سالاعا جاڭاشىلدىق اكەلەتىن كريزيس مەنەدجەرلەردى لاۋازىمدى قىزمەتتەرگە تاعايىنداۋ وتە وزەكتى», دەيدى ساراپشى.
سونداي-اق ول ۇكىمەتتىڭ 2024 جىلعى جۇمىسىنا ورتاشا باعا بەرۋگە بولاتىنىن ايتىپ ءوتتى.
«قابىلدانعان شەشىمدەر كەيبىر سالالاردا وڭ وزگەرىستەرگە ىقپال ەتسە دە, حالىقتىڭ ءال-اۋقاتىن جاقسارتۋ ءۇشىن جۇيەلى ءارى باتىل رەفورمالار جەتكىلىكسىز بولدى. ينفلياتسيا جوعارى دەڭگەيدە قالدى, باعانىڭ ءوسۋى حالىقتىڭ تۇرمىس ساپاسىنا اسەر ەتتى. شاعىن جانە ورتا بيزنەستى دامىتۋدا اكىمشىلىك كەدەرگىلەر ءالى دە بار. سىبايلاس جەمقورلىققا قارسى كۇرەس تولىق ناتيجە بەرىپ جاتىر دەپ ايتۋ قيىن», دەيدى ج.جيەناليەۆ.
ونىڭ ايتۋىنشا, جەتىستىكتەرىنىڭ ءبىرى رەتىندە اۋىل شارۋاشىلىعىنىڭ بيىلعى رەكوردتىق ءونىم الۋ كورسەتكىشتەرىن اتاپ وتۋگە بولادى.
