وڭىرلىك جوسپاردى حالىققا تانىستىرۋ, جۇمىسشى ماماندىقتار جىلىنا وراي اتقارىلاتىن شارۋالاردى جاريالاۋ ماقساتىندا قالا اكىمىنىڭ ورىنباسارى سارسەن قۇرانبەكتىڭ توراعالىعىمەن القالى جيىن ءوتتى. كەلەلى كەڭەسكە زيالى قاۋىم وكىلدەرى, جوعارى, ارناۋلى وقۋ ورىندارىنىڭ باسشىلارى, جاستار قاتىستى. س.قۇرانبەك بيىلعى اتاۋلى جىلى قولعا الىناتىن جوسپارلار مەن اتقارىلاتىن ءىس-شارالاردى ءمالىم ەتتى.
جۇمىسشى ماماندىقتارى جىلى – پرەزيدەنتتىڭ سايلاۋالدى باعدارلاماسىمەن ۇندەسەتىن باستاما. مەملەكەت باسشىسىنىڭ يدەياسىمەن «ادال ازامات», «ادىلەتتى قازاقستان» تۇجىرىمدامالارى ىسكە اسىپ جاتىر. قاراپايىم جۇمىسشىلاردىڭ ەڭبەگى قاشان دا ادال, جۇمىسشى ادامدار تازا ەڭبەكپەن نان تاپقىسى كەلەدى, بارلىق جەردە ادىلەتتىلىكتىڭ بولعانىن قالايدى. سول تۇرعىدا جۇمىسشى ماماندىقتارىنىڭ قادىرىن ارتتىرۋىمىز كەرەك. بۇل جۇمىستار مەگاپوليستە وتكەن جىلدان باستاپ قولعا الىندى. شاھارداعى 40 كوللەدجدىڭ ديرەكتورلارىمەن بولعان باسقوسۋدا سۇرانىسقا يە ماماندىقتاردى دايارلاۋ ماسەلەسىن تالقىلادىق. قالادا سۇرانىسقا يە ماماندىقتار جەتەرلىك. ماسەلەن, شىمكەنتتە تەاترلار, باسقا دا مادەني نىسانداردىڭ سانى جيىرمادان اسادى. ولارعا دەكوراتور, تاعى سول سەكىلدى جۇمىسشى ماماندار وتە كەرەك. بۇرىنعى قىزمەتكەرلەردىڭ الدى قازىر زەينەت جاسىنا تاياپ قالدى. كوللەدجدەر بيىل ليتسەنزيا الىپ, وسى ماماندىقتاردى وقىتا باستايدى. قالادا 50 مىڭعا جۋىق جاس كوللەدجدە وقيدى. بىلتىر 11 500 گرانت ءبولىندى. ونىڭ كوپشىلىگى, 67%-ى جۇمىسشى ماماندىقتارىنا بەرىلدى. وسى ماسەلە جونىندە كاسىپكەرلەرمەن دە جيىن وتكىزدىك. كاسىپكەرلىك, بيزنەس وكىلدەرى كەيبىر قاجەتتى مامانداردى سىرتتان اكەلەتىنىن ايتادى. جۇمىسشى ماماندىقتارى جىلى – قوعامداعى وسى تۇيتكىلدى شەشۋدىڭ ماڭىزدى ءبىر تەتىگى, دەر كەزىندە قولعا الىنعان باستاما. بيىلعى ءىس-شارالار جوسپارى اياسىندا ءبىلىم ۇيالارىندا جۇمىسشى ماماندىقتارعا باۋليتىن كابينەتتەر اشىپ, ۇزدىك ەڭبەككەرلەردى وقۋشى, ستۋدەنتتەرگە ناسيحاتتايتىن بولامىز. سونداي-اق حالىقارالىق دەڭگەيدە 2 مەموراندۋم جاساسىپ, الەمنىڭ وزىق تاجىريبەلەرىن وزىمىزگە ەنگىزەمىز. 1410 ستۋدەنت جۇمىس بەرۋشى وتىنىشىمەن جۇمىسقا ورنالاسادى. بۇگىندە قالاداعى 9 جوعارى وقۋ ورنىندا 82 مىڭنان استام ستۋدەنت ءبىلىم الىپ جاتىر. 1 قىركۇيەكتەن باستاپ باكالاۆرياتتا وقيتىن ستۋدەنتتەر شاكىرتاقىسى 20%, ماگيسترانت, دوكتورانتتار ستيپەندياسى 15% وسپەك. سونىمەن بىرگە الەۋمەتتىك وسال توپتارعا دا كوپتەگەن جەڭىلدىكتەر قاراستىرىلادى. ايتالىق, جاڭا وقۋ جىلىندا جەتىم, اتا-اناسىنىڭ قامقورلىعىنسىز قالعان ستۋدەنتتەرگە شاكىرتاقى 30%, مۇگەدەكتىگى بار جاندارعا 50% كوبەيتىلەدى», دەدى س.قۇرانبەك.
شىمكەنتتەگى جوو-دا شەتەلدەن, ەلىمىزدىڭ تۇكپىر-تۇكپىرىنەن ستۋدەنتتەر كەلىپ وقيدى. سوندىقتان جاتاقحانامەن قامتاماسىز ەتۋ – كۇن تارتىبىندە تۇرعان ماسەلەنىڭ ءبىرى. شاھارداعى جاتاقحانالار سىيىمدىلىعى 10 مىڭنان استام ورىندى قۇراپ, ستۋدەنتتەر ۇيىنە بايلانىستى تاپشىلىق قازىردە ايتارلىقتاي پروبلەما تۋىنداتىپ تۇرعان جوق. دەگەنمەن قالا اكىمدىگىنىڭ جوسپارىنا سايكەس 2025–2029 جىلدارى 5 مىڭ ورىنعا ارنالعان جاڭا جاتاقحانالار سالىنادى.
قالا اكىمىنىڭ ورىنباسارى بىرىڭعاي ەرىكتى جيناقتاۋشى جۇيەسىنىڭ پايداسى, تيىمدىلىگى تۋرالى دا ايتىپ بەردى. ونىڭ ەڭ ءبىرىنشى ارتىقشىلىعى, جاستارعا ءبىلىم الۋعا نەمەسە بولاشاقتا باسپانا سالۋعا قاراجات قورى بولادى. ءارى قاراجات جيناعان جاستارعا قارجىلىق ساۋاتتىلىقتى ارتتىرۋعا مۇمكىندىك بەرەدى. قازىرگى تاڭدا كوپشىلىك اتا-انا بالالارىن قاي ماماندىققا گرانت كوپ, سوعان تۇسۋگە ماجبۇرلەيدى. بىرىڭعاي ەرىكتى جيناقتاۋشى جۇيە جاستاردىڭ جۇرەك قالاۋىمەن ماماندىق تاڭداۋىنا كومەكتەسەدى. ءتىپتى وسى قور ارقىلى جاستار شەتەلدە دە ءبىلىم الا الادى. س.قۇرانبەك وسى تىڭ باستامانى اتا-انالارعا تانىستىرىپ, جان-جاقتى ۇگىت-ناسيحات جۇرگىزۋگە شاقىردى.
ەلۋ مىڭعا جۋىق كوللەدج ستۋدەنتىنىڭ 30%-ى بىلتىر وقۋ بىتىرگەن. سول تۇلەكتەردىڭ كوبىسى, شامامەن 80%-ى جۇمىسقا ورنالاستى. بۇل ەلدەگى ەڭ جوعارى كورسەتكىش بوپ ەسەپتەلەدى. سونداي-اق ارناۋلى وقۋ ورنىنا تۇسەتىن ستۋدەنتتەردىڭ سانى دا ءبىرشاما ارتقان. بىلتىر 49 200 بالا كوللەدجدە ءبىلىم السا, بيىلعى وقۋ جىلىندا وقۋعا تۇسكەن تالاپكەرلەر سانى 49 780-ءدى قۇراعان. بۇل دا بولسا وڭىردە جۇمىسشى ماماندىقتارعا قىزىعۋشىلىقتىڭ ارتىپ كەلە جاتقانىن كورسەتەدى.
شىمكەنت
