سپۋتنيكتىك ينتەرنەت ازىرگە «استانا-الماتى» باعىتى بويىنشا جۇرەتىن №3/4 پويىزدارىنىڭ جولاۋشىلارىنا قولجەتىمدى. العاشقى ساپاردا 500 جولاۋشى ينتەرنەتكە قوسىلۋ مۇمكىندىگىن قولداندى. ولار جاڭا قىزمەت ارقىلى «WhatsApp»-تا بەينەقوڭىراۋ جاساپ, «YouTube»-تان بەينەجازبالار كوردى.
«قتج پويىزىندا تومەن وربيتالىق «Eutelsat-OneWeb» سپۋتنيكتىك تەحنولوگياسىن قولدانۋ ارقىلى قاناتقاقتى جوبانىڭ ىسكە قوسىلۋى – كولىكتى تسيفرلاندىرۋ باعىتىنداعى ماڭىزدى قادام. ارىپتەستەرىمىزبەن اتقارىلعان جۇمىستىڭ ناتيجەسىندە كۇردەلى جاعدايلاردا دا جولاۋشىلارعا تۇراقتى ءارى جوعارى جىلدامدىقتى (50–100 مب/س) ينتەرنەت قولجەتىمدى بولماق», دەدى تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ.
وسى جوبانىڭ ارقاسىندا ينتەرنەت ۇستامايتىن شالعاي ايماقتاردا دا ينتەرنەت تۇراقتى ءارى جىلدام بولماق.
«پويىزداردا ينتەرنەت قوسۋ – جولاۋشىلار تاسىمالىن دامىتۋ جولىنداعى ماڭىزدى قادام. الداعى ۋاقىتتا وسى قىزمەتتى كەڭەيتىپ, الدىمەن «تالگو» پويىزدارىنىڭ بارلىق 15 باعىتىنا ينتەرنەت قوسۋدى جوسپارلاپ وتىرمىز», دەدى «جولاۋشىلار تاسىمالى» اق باسقارما توراعاسى ءانۋار احمەتجانوۆ.
