فوتو: اقوردا
«ۇكىمەتتىڭ جانە اكىمدەردىڭ قىزمەتى ءوز حالقىمىزعا دا, سىرتقى الەمگە دە اشىق ءارى تۇسىنىكتى بولۋى كەرەك. ءبىرىنشى باسشىلار ازاماتتاردى جەكە قابىلداۋعا ءتيىس. بۇل – وتە ماڭىزدى. اسىرەسە, ايماق, قالا, اۋدان باسشىلارى حالىقپەن تىكەلەي بايلانىستا جۇمىس ىستەۋى قاجەت. دەگەنمەن مەملەكەت پەن قوعامنىڭ سەرىكتەستىگى ازاماتتارعا دا زور جاۋاپكەرشىلىك جۇكتەيدى. سوڭعى كەزدە زاڭ ۇستەمدىگىنە جانە قوعامدىق ءتارتىپتىڭ ساقتالۋىنا باسىمدىق بەرۋ قاجەتتىگى دامىعان ەلدەردە, ءتىپتى, اقش-تىڭ وزىندە ءجيى ايتىلا باستادى. ءبىز مۇنداي پايىمعا الدەقاشان كەلگەنبىز», دەدى قاسىم-جومارت توقاەۆ.
مەملەكەت باسشىسى «زاڭ مەن ءتارتىپ» قاعيداسى حالىقتىڭ ساناسىنا تەرەڭ ورنىعۋعا ءتيىس ەكەنىنە نازار اۋداردى. ول ءۇشىن كەز كەلگەن قۇقىق بۇزۋشىلىققا «مۇلدەم توزبەۋشىلىك» قاعيداسىن بەرىك ۇستانۋى قاجەت. ق.توقاەۆ بۇل باعىتتاعى جۇمىستاردىڭ بارلىق دەڭگەيدە ۇيىمداستىرىلۋىن ايماق اكىمدەرىنە جۇكتەدى.
«بىراق شەكتەۋلەر مەن ايىپپۇلدارعا قاتىستى مەملەكەتتىڭ دە, قوعام بەلسەندىلەرىنىڭ دە ۇستانىمى كوڭىلگە قونىمدى بولۋعا ءتيىس. ماجبۇرلەۋ شارالارى بولماسا, ءتارتىپ ورناتۋ مۇمكىن ەمەس ەكەنىن الەمدىك تاجىريبە كورسەتىپ وتىر. سوندىقتان مەملەكەتتىڭ ءىس-ارەكەتتەرىنە تۇسىنىستىكپەن قاراعان ءجون. بۇل ورايدا ديالوگ ارقىلى قوعامدىق كەلىسىمگە كەلۋ كەرەك. قالاي دەسەك تە, مەملەكەت زاڭ ءتارتىبىن قامتاماسىز ەتۋ ءۇشىن قابىلدايتىن شارالار ءوز ەلىن كۇستانالاۋعا سەبەپ بولماۋعا ءتيىس», دەدى پرەزيدەنت.
قاسىم-جومارت توقاەۆ كەيبىر ازاماتتاردىڭ ەلىمىزدى مازاق قىلۋعا اۋەستەنىپ بارا جاتقانىن سىنادى.
«مىسالى, وزگە ەلدەردىڭ وكىلدەرى جوق جەردەن «كەرەمەت جەتىستىكتەردى, تابىستاردى» تاۋىپ الىپ, ونى شەتەلگە جان-جاقتى ناسيحاتتاپ جاتادى. ال ءبىزدىڭ ازاماتتار, ولاردىڭ ىشىندە شوۋ-بيزنەس وكىلدەرى, ءوزىن ءوزى «قوعام بەلسەندىسى» سانايتىن جاستار, ءتىپتى, دەپۋتاتتار دا بار, قازاقستانعا نەشە ءتۇرلى لاقاپ ات قوياتىن بولدى. بۇل ەندى مۇلدەم تۇسىنىكسىز, اقىلعا سىيمايتىن نارسە», دەدى مەملەكەت باسشىسى.
