«انىقتالعان اقاۋلار بويىنشا مەردىگەر مەن تەحنيكالىق قاداعالاۋ مەكەمەلەرىنە حاتتاما تولتىرىلدى. تەحنيكالىق قاداعالاۋشىنىڭ بىرەۋىنە ايىپپۇل سالىندى. مەردىگەر ەسەبىنەن 1,4 ملن تەڭگەگە جول جابىنى قايتا توسەلدى. سونىمەن قاتار بىلتىر مەگاپوليستەگى جالپى ۇزىندىعى 227 كم بولاتىن 310 كوشەدە كۇردەلى جانە ورتاشا جوندەۋ جۇرگىزىلدى. قۇرىلىس جۇمىستارىنىڭ ناتيجەسىندە 247 كوشە مەن 1 كوپىر پايدالانۋعا بەرىلدى. قازىر قالا جولدارىنىڭ جاقسى جانە قاناعاتتانارلىق جاعدايى 75%-عا جەتتى», دەيدى «جول اكتيۆتەرى ساپاسىنىڭ ۇلتتىق ورتالىعى» رمك شىمكەنت قالالىق فيليالىنىڭ ءبولىم باسشىسى قايرات شاكىروۆ.
مەكەمە انىقتاعان اقاۋلار – اسفالتبەتون قوسپاسىنىڭ ناشارلىعى, اسفالتبەتون جابىنىنىڭ تىعىزدالۋ كوەففيتسيەنتى مەن سۋعا توزىمدىلىگىنىڭ تالاپقا ساي بولماۋى, جول بەلگىلەرى, جول قۇرىلىسىنداعى تەمىربەتون بۇيىمدارىن پايدالانۋداعى ولقىلىقتار مەن جول نەگىزىندەگى تىعىزدىقتىڭ جەتكىلىكسىزدىگى.
ماماننىڭ ايتۋىنشا جول-قۇرىلىس ماتەريالدارىنىڭ تالاپقا ساي كەلمەۋىنە بىرنەشە جاعداي اسەر ەتەدى. ءبىرىنشى سەبەپ – قۇرىلىس تەحنولوگياسىنىڭ دۇرىس ورىندالماۋى مەن ماتەريالدارعا كىرىس باقىلاۋدىڭ جۇرگىزىلمەۋى. ال كىرىس باقىلاۋدى جۇرگىزۋگە مەردىگەر مەكەمەنىڭ جەكە زەرتحانالارى جاۋاپتى. ەگەر وزدەرىندە بولماسا باسقا كەز كەلگەن شارت جاساسقان جەكە زەرتحانادا تەكسەرۋگە مۇمكىندىك بار. مەكەمەنىڭ تەحنيكالىق باقىلاۋ ءبولىمى نەمەسە تەحنيكالىق قاداعالاۋ ۇيىمى دا كىرىس باقىلاۋىن جۇرگىزە الادى.
مىسالى, قيىرشىق تاس پەن قۇم نەگىزىنەن كارەردە وندىرىلەدى. كارەردى باسقاراتىن فيرما ءونىمىن ساتۋ ءۇشىن ونىڭ ساپاسىن ۇنەمى تەكسەرىپ وتىرۋى قاجەت. ودان بولەك, كارەردەن قۇرىلىس ماتەريالىن ساتىپ العان مەردىگەر كومپانيا جەكە زەرتحاناسىندا ءونىمدى قابىلداماي تۇرىپ سىناقتان وتكىزىپ الۋى كەرەك. قۇرىلىسقا ارنالعان ءونىمدى بەلگىلى ءبىر جوباعا قولدانار الدىندا تەحنيكالىق قاداعالاۋ مەكەمەسى ونى قايتا تەكسەرىستەن وتكىزەدى. وسىلايشا, باقىلاۋ تىزبەگى ۇزىلمەي, قاتاڭ تۇردە جالعاسىن تاپسا جول-قۇرىلىس ماتەريالدارى مىندەتتى تۇردە ساپالى بولماق.
جول سالۋدا كەمشىلىكتەرگە جول بەرگەن كومپانيالاردىڭ كەيبىرىن مىسالعا كەلتىرسەك. ماسەلەن, ا-2 اۆتوموبيل جولىن قايتا قۇرۋ جوباسىنىڭ شىمكەنت شەكاراسىنان بايدىبەك بي داڭعىلى قيىلىسىنا دەيىنگى ارالىقتى قامتيتىن جول قۇرىلىسىنىڭ VII كەزەڭىندە تەحنيكالىق قاداعالاۋشى – «تۇران قۇرىلىس» جشس; وسى تاس جول قۇرىلىسى جوباسىنىڭ مەگاپوليستى اينالىپ وتەتىن VIII كەزەڭىندە جۇمىسىن ساپالى اتقارماعان «الەم ترانس جول» جشس جاۋاپقا تارتىلدى.
قايرات شاكىروۆتىڭ ايتۋىنشا, جول ساپاسىنىڭ تەز ناشارلاۋىنىڭ نەگىزگى سەبەبى – جولعا قولدانىلاتىن ءار ماتەريالدىڭ ءوز كەزەڭىمەن جەكە-جەكە تەكسەرىلمەۋىندە.
«ەكىنشىدەن, اسفالتبەتون دايىندايتىن زاۋىتتار ءوز قىزمەتىن دۇرىس اتقارسا قۇرىلىس ماتەريالدارى دا تالاپقا ساي بولىپ شىعار ەدى. وسى رەتتە زەرتحانالىق باقىلاۋدان وتكەن اسفالتبەتون قوسپاسىن بەكىتىلگەن نۇسقاۋلىقپەن شىعارۋ وتە ماڭىزدى. ماسەلەن, تەحنيكالىق شارت بويىنشا اسفالتبەتون قوسپاسىنىڭ زاۋىتتان شىققان كەزدەگى تەمپەراتۋراسى شەكتى نورماسىن ساقتاۋ كەرەك. ىستىق اسفالتتار ءۇشىن ول ورتا ەسەپپەن 150وس اينالاسىندا بولادى. سونىمەن بىرگە اسفالتتى جولعا توسەۋ بارىسىندا دا تەحنولوگيالىق تالاپتاردى ساقتاۋ ساپاعا تىكەلەي اسەر ەتەدى. قىسقاسى تىعىزداۋشى تەحنيكانىڭ ماسسالارى, ءجۇرۋ جىلدامدىعى, ءجۇرۋ سانى, اسفالتتوسەگىش ماشينانىڭ توسەگىش پليتاسىنىڭ قىزدىرۋ تەمپەراتۋراسى, اسفالتبەتون قاباتتارىنىڭ اراسىنا شاشىلاتىن بيتۋمدى ەمۋلسيانىڭ ساپاسى, قورشاعان ورتا تەمپەراتۋراسى مەن اۋا رايى سەكىلدى كوپتەگەن جاعداي جول قۇرىلىسىنىڭ بارىسىنا ءوز اسەرىن تيگىزەدى. سوندىقتان مەردىگەر كومپانيا مەن تەحنيكالىق قاداعالاۋشى مەكەمە وسى اتالعان سەبەپتەردىڭ بارلىعىن ءبىلىپ, ءاردايىم جاعدايعا قاراي ەسكەرىپ وتىرۋلارى شارت», دەيدى.
2025 جىلى جولعا قاتىستى 15 نىسان بويىنشا قۇرىلىس پەن قايتا جاڭعىرتۋ جۇمىستارى قولعا الىنادى. 2 نىساندا كۇردەلى قۇرىلىستار جوسپارلانىپ وتىر. 37 كوشە ورتاشا جوندەۋدەن وتكىزىلەدى دەپ جوسپارلانعان.
شىمكەنت
