اياگوز پوليتسيا ءبولىمىنىڭ جەدەل قىزمەتكەرلەرى ينتەرنەتتەگى الاياقتىققا قاتىستى ادەتتەن تىس وقيعانىڭ بەتىن اشتى.
جەدەل-ىزدەستىرۋ شارالارى بارىسىندا 32 جاستاعى قالا تۇرعىنى ءوزىنىڭ قۇربىسىنىڭ جەكە دەرەكتەرىن پايدالانىپ, ەلىمىزدەگى ءىرى بانكتەردىڭ بىرىنەن 600 مىڭ تەڭگە كولەمىندە ونلاين نەسيە العانى انىقتالدى.
«وقيعا 2024 جىلدىڭ 26 تامىزىندا بولدى. كۇدىكتى دوسىنىڭ دەرەكتەرىن پايدالانىپ, بانكتى الداپ, ايتارلىقتاي قارجىلىق شىعىن كەلتىرىپ, نەسيە العان. تەرگەۋ بارىسىندا پوليتسەيلەر ءىس بويىنشا ماڭىزدى ايعاق بولعان جونەلتۋ تۇبىرتەكتەرى مەن حات-حابارلاردىڭ سكرينشوتتارىن تاركىلەدى», دەلىنگەن حابارلامادا.
اسا ءىرى كولەمدەگى الاياقتىق دەرەگى بويىنشا سوتقا دەيىنگى تەرگەۋ باستالدى.
پوليتسيا ازاماتتاردى جەكە مالىمەتتەرىن بەرۋ كەزىندە اباي بولۋعا شاقىرىپ, قارجىلىق مىندەتتەمەلەر تۋرالى اقپاراتتى ۇنەمى تەكسەرىپ تۇرۋدى ۇسىنادى.
