اۋدان ورتالىعىنان 80 شاقىرىم شالعايدا جاتقان قاراوبا اۋىلىنداعى قايبۋشەۆتار اۋلەتىن اۋىلداستارى جاقسى بىلەدى. تالاي جىلدان بەرى قايىرىمدىلىق پەن قامقورلىقتىڭ, قاراپايىمدىلىقتىڭ ۇلگىسىن كورسەتىپ جۇرگەن وتباسىنىڭ ىزگى ءىسى اتادان بالاعا جالعاسىپ كەلە جاتىر. وسى اۋىلدىڭ اتىمتاي-جومارتى اتانعان, «اقبوتا» شارۋا قوجالىعىنىڭ جەتەكشىسى, مارقۇم مەرەكە ەرمەك ۇلى دا ەڭبەكقور جۇمىسشىلارىن ۇنەمى قولداپ, ءتىپتى اۆتوكولىك مىنگىزىپ تە جىبەرەتىن. اۋىلداعى مۇقتاج جاندار, ارداگەرلەر ءاردايىم مەرەكە قايبۋشەۆتىڭ كوز قىرىندا, قامقورلىعىندا جۇرەتىن. مىنە, وسى ۇلگى بۇگىندە قۋانىش مەرەكە ۇلىنا دا جۇعىپتى.
اۋىل شارۋاشىلىعىندا تالاي جىلدان بەرى تەر توگىپ جۇرگەن قاراپايىم ەڭبەك ادامى سەرىكقالي سارسەنعالي ۇلى ءۇشىن 2025 جىل ۇلكەن قۋانىشپەن باستالدى. قوجالىق جەتەكشىسى قىزمەتكەرىنىڭ ۇزاق جىلعى ادال ەڭبەگىن باعالاپ, اۆتوكولىك سىيعا تارتتى. ۇجىمدا ون جىل قىزمەت اتقارعان ارايلىم ەرماعانبەتقىزى بۇل كۇنى سۋ جاڭا جاتىن بولمە جيھازىنا يە بولدى.
كوپشىلىك جاقسى بىلەدى, اۋىل شارۋاشىلىعىندا دەمالىس بولمايدى. ماۋسىمدىق جۇمىستار بىرىنەن سوڭ ءبىرى الماسىپ كەلەدى دە وتىرادى. ءدال قازىر شارۋا قوجالىعى قىستىڭ قىسىمىنان امان شىعۋ ءۇشىن بارىن سالىپ جاتىر. وتكەن جازدىڭ قۋاڭشىلىعى, ەسەپسىز كوبەيگەن اقبوكەننىڭ سالدارىنان مال ازىعىنىڭ تاپشى بولۋى اۋىلداعى اعايىنعا وڭاي ءتيىپ وتىرعان جوق. سوعان قاراماستان, قاراپايىم جۇمىسشىلاردى قولداپ, ەڭبەگىن باعالاپ وتىرعان قوجالىق جەتەكشىسىنە حالىق ەرەكشە ريزا بولدى.
قازتالوۆ اۋداندىق ماسليحاتىنداعى «Amanat» پارتياسى فراكتسياسىنىڭ مۇشەسى, «ەر-قانات» شارۋا قوجالىعىنىڭ جەتەكشىسى قۋانىش قايبۋشەۆ بيىل پرەزيدەنت باستاماسىمەن جاريالانعان «جۇمىسشى ماماندىقتار جىلىن» وسىنداي باستامامەن اشىپ وتىر.
باتىس قازاقستان وبلىسى
