جاڭالىعى مول ونىمدەر

«Freedom Insurance» سك» اق باسقارما توراعاسى ازامات كەرىمباەۆتىڭ ايتۋىنشا, «Halyk Life» ساقتاندىرۋ كومپانياسى 2024 جىلدىڭ 7 ايىندا ەڭ كوپ سىيلىقاقى جيناپ, رەيتينگتە 166 ملرد تەڭگەمەن 1-ورىنعا شىقتى. «بۇل كورسەتكىش وتكەن جىلدىڭ سايكەس كەزەڭىمەن سالىستىرعاندا 40%-عا ارتىق. تىكەلەي ساقتاندىرۋ سىي­لىق­اقىلارى دا ءوسىپ جاتىر – 7 ايدا كو­ميس­­سيالىق تولەمدەر بويىنشا 825 ملرد تەڭگە, بۇل 2023 جىلدىڭ سايكەس كە­زەڭى­مەن سالىستىرعاندا 37%-عا كوپ», دەيدى ا.كەرىمباەۆ.

ايتۋىنشا, اينالىمداعى ساقتاندىرۋ شارتتارىنىڭ سانى 9,8 ملن-عا جەتتى. ساراپ­شىنىڭ تۇسىندىرۋىنشە, بۇعان اۆتو­نارىقتا ەرىكتى ساقتاندىرۋ پوليس­تەرىن ساتۋ كولەمىنىڭ ءوسۋى اسەر ەتتى. كەلىسىمشارتتار سانىنىڭ وسۋىنە ءومىردى ساقتاندىرۋ كومپانيالارى دا ءوز ۇلەسىن قوستى. 2024 جىلدىڭ جەتى ايىندا 192 ملرد تەڭگەگە زەينەتاقى اننۋيتەتى شارتتارى جاسالدى. ساقتاندىرۋدىڭ بۇل ءتۇرى بويىنشا ءوسىم 200%-دى قۇرادى.

وسىدان بىرنەشە جىل بۇرىن عانا يپوتەكا, اۆتوكولىكتى ساقتاندىرۋ نارىعىمەن عانا بايلانىستىرىپ قارايتىن نارىق بۇگىن ميلليارد ەمەس, تريلليوندارمەن ەسەپتەيتىن دەڭگەيگە جەتتى. 2024 جىلعى قىركۇيەكتىڭ قورىتىندىسىندا ساقتاندىرۋ ۇيىمدارىنىڭ جيىنتىقتى اكتيۆتەرى 2,8 ترلن تەڭگەدەن استى. قارجى نارىعىن رەتتەۋ جانە دامىتۋ اگەنتتىگى توراعاسىنىڭ ورىنباسارى ماريا حادجيەۆانىڭ ايتۋىنشا, 2024 جىلى اينالىمعا ەنگەن ونىمدەردىڭ ءبىرى – «ارنايى الەۋمەتتىك تولەم» ء(اات). تولەمنىڭ بۇل ءتۇرى ساقتاندىرۋ كومپانيالارى ەسەبىنەن زياندى ەڭبەك جاع­داي­لا­رىندا قىزمەتكەرلەرگە ءاات تولەۋدى زاڭداستىردى. ونى الۋ ءۇشىن زياندى جۇمىس اتقاراتىن ادامنىڭ جاسى 55-كە تولۋى جانە بجزق-دا كەمىندە 7 جىل كاسىپتىك زەينەتاقى اۋدارىمدارىنىڭ بولۋى مىندەتتى. تولەم ەكونوميكانىڭ 19 سالاسىندا جۇزەگە اسىرىلادى.

بجزق مالىمەتىنشە, ءاات تاعايىنداۋ ءۇشىن مىندەتتى شارتتارعا 2024 جىلى – 37 مىڭنان, 2030 جىلى – 58 مىڭنان, 2035 جىلى 95 مىڭنان استام جۇمىسكەر ۇمىتكەر بولا الادى. سونداي-اق كەيىنگە قال­دىرىلعان زەينەتاقى اننۋيتەتى ازا­­ماتتارعا 45 جاستان اننۋي­تەت كەلىسىم­شارتىن بەكىتۋگە مۇمكىندىك بەرەدى.

«مىسالى, ەرىنىڭ زەينەتاقى جيناعى كوپ, ايەلىنىكى تىم از بولسا, بىرىكتىرگەن سوڭ, جۇبايلار 55 جاستان كەيىن ەكەۋى دە ءومىر بويى ءارى تۇراقتى زەينەتاقى اننۋيتەتى تولەمدەرىن الا الادى. مۇنىڭ سىر­تىندا ولارعا مەملەكەت تە زەينەتاقى تولەيدى», دەيدى م.حادجيەۆا.

بۇل ءونىم دە سۇرانىسقا يە. 2024 جىلدىڭ 1 قاراشاسىنداعى جاعداي بويىنشا ەلدە جالپى ساقتاندىرۋ سىيلىقاقىسى 655,4 ملن تەڭگەنى قۇرايتىن 106 مىڭ زەينەتاقى اننۋيتەتى شارتى بەكىتىلىپتى. تاعى ءبىر ءونىم – 2024 جىلدىڭ 23 قازانىندا مە­ديتسينا قىزمەتكەرلەرىنىڭ كاسىبي جاۋاپ­كەرشىلىگىن ساقتاندىرۋ ەنگىزىلدى. قازاق­ستان قارجىگەرلەرى قاۋىمداستىعى ساقتاندىرۋدى دامىتۋ ورتالىعىنىڭ ديرەكتورى باۋىرجان ناعمانوۆتىڭ ايتۋىن­شا, 2025 جىلى پارلامەنت مىندەتتى اۆتو­ساقتاندىرۋ تۋرالى زاڭ ايا­سىندا تۇ­زە­تۋلەردىڭ ۇلكەن پاكە­تىن قابىلداۋى مۇم­كىن.

«بۇل ءونىم سوڭعى 15 جىلدا عالامدىق وزگەرىستەرگە ۇشىراعان جوق, بۇعان ونلاين-ساق­تاندىرۋدى ەنگىزۋمەن بايلانىستى تو­لىق­تىرۋلار قوسىلمايدى. جاقىندا وسى­­عان بايلانىستى بىرقاتار ۇسىنىس ەن­گىزىلدى», دەيدى ول.

ايتۋىنشا, 2024 جىلدىڭ باسىنان باستاپ وڭىرلىك كوەففيتسيەنتتەرگە جىل سايىنعى تۇزەتۋ ەنگىزىلدى. ياعني جول-كولىك وقيعاسىنا ءجيى تۇسەتىن وڭىرلەردىڭ جۇرگىزۋشىلەرى ساقتاندىرۋ ءۇشىن كوبى­رەك تولەيتىن بولادى. ەڭ شىعىندى وڭىر­لەر­دە تاريفتەر كوتەرىلە باستادى, ال كەي­بىرەۋ­لەرىندە تومەندەپ جاتىر. بىراق تاريف­تەردىڭ دەڭگەيى نارىقتىڭ دامۋىنا كەرى نەمەسە وڭ اسەر ەتە المايدى. بىزگە انا­عۇرلىم دەربەستەندىرىلگەن ءتاسىل قاجەت دەيدى ساراپشى.

الماتى