ارينە, بۇل جەتىستىككە جەتۋ جاس جاۋىنگەرگە وڭاي بولعان جوق. ءوزىنىڭ ايتۋىنشا, ول بالا كەزىنەن سپورتقا قىزىعۋشىلىق تانىتىپتى. سپورت ونىڭ اسكەري قىزمەتتەگى جەتىستىكتەرىنە نەگىز قالادى دەسەك, بولادى. بۇعان دەيىن دە جاس سارباز جىل بويى ۇيىمداستىرىلاتىن اسكەري-سپورتتىق جارىستارعا بەلسەنە قاتىسىپ, ءۇشسايىس پەن كوپسايىستاردا, ءتۇرلى تۋرنيرلەردە جۇلدەگەر مەن جەڭىمپاز اتانىپ ءجۇردى. اسىلبەكتىڭ ومىرىندەگى باستى جەتىستىگى قويان-قولتىق ۇرىس بويىنشا بۇكىل ارميا جارىستارىندا باق سىناپ, ءوزىنىڭ جاۋىنگەرلىك قارىم-قابىلەتى مەن جوعارى كاسىبيلىگىن كورسەتۋى بولدى.
ونىڭ قول جەتكىزگەن جۇلدەلەرىنىڭ ىشىندە «قارۋلى كۇشتەر ۆزۆودىنىڭ ۇزدىك سەرجانتى–2024» اتالىمى بويىنشا العان ماراپاتىنىڭ ورنى ەرەكشە. ول بۇكىل ارميا اراسىندا وتكەن سول اسكەري-سپورتتىق بايقاۋدا جۇزدەن جۇيرىك شىعىپ جۇلدەلى ورىندى جەڭىپ العان ەدى. اسىلبەكپەن بىرگە قىزمەت اتقاراتىن ارىپتەستەرى مەن اسكەري جاۋاپتى ماماندار ونىڭ بويىندا كوشباسشىلىق قاسيەت بارىن ايتتى, سونداي-اق ەڭ قيىن جاعدايلاردا سالقىنقاندىلىق تانىتىپ, دۇرىس شەشىم قابىلداي الاتىن قابىلەت پەن مىنەزىن دە ماقتادى. ال جوعارىدا ايتىپ وتكەن اسكەري-سپورتتىق بايقاۋعا ول تىڭعىلىقتى دايىندالدى. كونكۋرستىڭ ءاربىر كەزەڭى تەك فيزيكالىق كۇشتى عانا ەمەس, سونىمەن قاتار سابىرلىق پەن پسيحيكالىق بايىپتىلىقتى, تۋرا تاكتيكا مەن دۇرىس ستراتەگيا قالىپتاستىرۋدى قاجەت ەتەتىنى انىق.
«مەنىڭ جەتىستىگىمنىڭ قۇپياسى – ءتارتىپ, تاباندى جاتتىعۋلار جانە ارىپتەستەرىم مەن كومانديرلەرىمنىڭ قولداۋى دەر ەدىم. مەنىڭ ويىمشا, سپورتتىڭ مىندەتى – ادامدى فيزيكالىق كۇشتى ەتۋ, وزگەلەردەن ارتىق قىلۋ ەمەس. سپورت ءبىرىنشى كەزەكتە كەز كەلگەن جاندى كوشباسشى بولۋعا ۇيرەتەدى, سونداي-اق كوماندامەن بىرلەسىپ جۇمىس ىستەۋگە, ءوزىڭدى ءبىر وتباسىنىڭ مۇشەلەرىندەي سەزىنۋگە تاربيەلەيدى. كۇندەلىكتى ءومىرى جاتتىعۋ زالىندا ءوتىپ جاتقان مەن سەكىلدى ءاربىر ادام سپورتتىڭ نەگىزگى ماقساتى مەن بويىمىزداعى جاقسى قاسيەتتەردى اشۋعا كومەكتەسەتىن وسىنداي كەرەمەت مۇمكىندىكتەرى بارىن ەستەن شىعارماسا ەكەن دەيمىن. «اسكەر تارلانى–2024» بايقاۋىنداعى جەڭىس – تەك ءبىر مەنىڭ ەمەس, سونىمەن قاتار ارىپتەستەرىمنىڭ دە جەڭىسى. ويتكەنى ولار مەنىڭ وسى بيىك ماقساتقا جەتۋىمە تىلەكشى بولىپ, قولدان كەلگەنشە بارىنشا قولداۋ كورسەتىپ وتىردى. بۇعان قوسا اسكەري جارىستاعى زور جەتىستىگىم – ەڭ الدىمەن بۇكىل وتباسىمنىڭ ماقتانىشى. مەنىڭشە, ءوز ورتاڭنىڭ, تۋعان-تۋىستارىڭنىڭ اراسىندا ادال ەڭبەگىڭمەن ابىرويعا بولەنۋدەن ارتىق قۇرمەت جوق», دەدى مەرگەندەر ۆزۆودىنىڭ سەرجانتى ا.قاراباي اعىنان جارىلىپ.
قورىتا ايتقاندا, اعا سەرجانت اسىلبەك – بىرگە اسكەري قىمەت اتقارىپ جۇرگەن ارىپتەستەرى ءۇشىن ناعىز ۇلگى الاتىن ازامات. سونىمەن قاتار ونىڭ سپورتتىق جارىس جولىنداعى باعىندىرعان بەلەستەرى قول استىندا اسكەري بورىشىن وتەپ جاتقان مەرزىمدى قىزمەت ساربازدارىنا شابىت سىيلايدى. جالپى, جەڭىس – اسكەري تىلمەن ايتقاندا ءوز شەبىندە قايتپاي تۇرىپ الاتىندارعا, قايسار مىنەز, ءور رۋح ارقىلى ارتقا قايتۋدى بىلمەيتىندەرگە عانا بەرىلەتىن سىي. سونىڭ جارقىن مىسالى مەن ايقىن كورىنىسى – اعا سەرجانت اسىلبەك قارابايدىڭ سپورتتاعى ەرلىكتەرى.
شىمكەنت
