وتاندىق ادەبي پورتال جاڭا اۋديوكىتاپتارمەن تولىقتى

پورتالعا مەملەكەت باسشىسى قاسىم-جومارت توقاەۆتىڭ «اكە تۋرالى وي-تولعاۋ» اۋديوكىتابى ەنگىزىلگەن. كىتاپ قازاق ادەبيەتىندەگى دەتەكتيۆ جانرىنىڭ نەگىزىن قالاۋشى كەمەل توقاەۆتىڭ ءومىر جولىنا ارنالعان.

اۆتور اكەسىنىڭ ءومىرى مەن شىعارماشىلىعى تۋرالى جەكە ەستەلىكتەرىمەن ءبولىسىپ, كەمەل توقاەۆتىڭ قيىندىققا تولى بالالىق شاعى, ونىڭ مايدانداعى جاستىق كەزى مەن سوعىستان كەيىنگى شىعارماشىلىق جولى تۋرالى اڭگىمەلەيدى. اۆتور اناسى – تۇرار شابارباەۆاعا ارنايى ءبولىم ارناعان. اناسى جازۋشىنىڭ ومىرلىك ادال سەرىگى, وتباسىنىڭ ۇيىتقىسى بولعانىن ايتادى. ءوزىنىڭ اتا-اناسىنا جانە جاقىندارىنا دەگەن سۇيىسپەنشىلىك سەزىمىن تەرەڭ جەتكىزەدى.

«پرەزيدەنتتىڭ وتباسى قۇندىلىقتارى, بورىش پەن جاۋاپكەرشىلىك, اعا ۇرپاقتىڭ مۇراسى تۋرالى وي-تولعاۋلارى كىتاپتا ايقىن كورىنىس تاپقان. قاسىم-جومارت توقاەۆتىڭ بۇل تۋىندىدا بايانداعان شىنايى تولعانىستارى جاس ۇرپاق تاربيەسى ءۇشىن ءمانى تەرەڭ, ماڭىزى زور. كەمەل توقاەۆ حح عاسىرداعى وتاندىق ادەبيەتتە جارقىن ءىز قالدىردى. شىعارمالارى قالامداستارى, سىنشىلار مەن وقىرمان تاراپىنان جوعارى باعالانىپ, قازاقستان مەن كەڭەس وداعىندا بەستسەللەرگە اينالدى», دەلىنگەن مادەنيەت جانە اقپارات مينيسترلىگىنىڭ حابارلاماسىندا.

پرەزيدەنتتىڭ اۋديوكىتابى Kitap.kz, Topiq.kz, Kazneb.kz قوسىمشالارىندا دا قولجەتىمدى بولادى.

جاقىن ۋاقىتتا ۇلى جەڭىستىڭ 80 جىلدىعىن مەرەكەلەۋ اياسىندا adebiportal.kz پورتالىندا مايدانگەر-جازۋشىلاردىڭ اۋديوكىتاپتارى ورنالاستىرىلادى. بۇل قاتاردا باۋىرجان مومىش ۇلى «ارتىمىزدا موسكۆا, تاحاۋي احتانوۆ «قاھارلى كۇندەر», ءابدىجامىل نۇرپەيىسوۆ «كۇتكەن كۇن», ءازىلحان نۇرشايىقوۆ «اقيقات پەن اڭىز», كەمەل توقاەۆ «سولدات سوعىسقا كەتتى», قاسىم امانجولوۆ «اقىن ءولىمى تۋرالى اڭىز» تۋىندىلارى بار.