فوتو: توتەنشە جاعدايلار مينيسترلىگى
قايتىس بولعاندار جوق, ەشكىم زارداپ شەكپەگەن. قۇتقارۋشىلار اۆتوجولداردا قاۋىپسىزدىكتى قامتاماسىز ەتە وتىرىپ, تاۋلىك بويى جۇمىس جۇرگىزۋدى جالعاستىرىپ جاتىر.
قاراعاندى وبلىسىندا بۇگىن تۇندە قاتتى بوران جاعدايىندا قۇتقارۋشىلار جۇكتى ايەلدى اۋداندىق اۋرۋحاناعا جەتكىزۋگە كومەكتەستى (جەدەل جاردەم كولىگى قولايسىز اۋا رايىنان جولدى جالعاستىرا الماعان). توتەنشەلىكتەر ونى وساكاروۆكا كەنتىنە ترەكول تەحنيكاسىمەن جەتكىزىپ, دارىگەرلەرگە تاپسىرعان.
جامبىل وبلىسىندا 21 قاڭتارعا قاراعان ءتۇنى جۋالى اۋدانىندا تەمپەراتۋراسى جوعارى كوتەرىلگەن 7 جاسار بالا تۋرالى حابارلاما كەلىپ ءتۇستى. قۇتقارۋشىلار جەدەل جاردەم قىزمەتكەرلەرىمەن بىرلەسىپ ترەكول جول تالعامايتىن كولىگىمەن جولعا شىققان, قازىرگى ۋاقىتتا بالانى ورتالىق اۋداندىق اۋرۋحانا دارىگەرلەرى باقىلاۋىنا العان.
اقتوبە وبلىسىنداعى «سامارا-شىمكەنت» تاس جولىندا وزبەكستاننان رەسەيگە بارا جاتقان شاعىن اۆتوبۋس بۇزىلىپ قالىپ, جۇرگىزۋشى كومەك سۇراپ, قۇتقارۋشىلار 9 جولاۋشىنى, ونىڭ ىشىندە 1 بالانى جىلىتۋ پۋنكتىنە ەۆاكۋاتسيالادى, ولارعا ىستىق تاماق ۇيىمداستىرىلدى.
ماڭعىستاۋ وبلىسىنىڭ قاراقيا اۋدانىندا جاۋىن-شاشىننىڭ مول تۇسۋىنە بايلانىستى «قازاقستان-تۇرىكمەنستان» تاس جولىندا 52 جۇك كولىگى بالشىقتا تۇرىپ قالعان. قۇتقارۋشىلار ۆاحتادا جۇرگىزۋشىلەردىڭ جىلىنۋىنا جاعداي جاساپ, جەرگىلىكتى بيلىكتىڭ كومەگىمەن كولىكتەردى جولدىڭ تازارتىلعان ۋچاسكەلەرىنە سۇيرەپ شىعارعان.
اقمولا وبلىسىندا قاتتى بوران كەزىندە ەلدى مەكەنگە جاياۋ بارا جاتقان 13 ادامدى ەلوردالىق قۇتقارۋشىلار بايقاپ, ازاماتتاردىڭ قاۋىپسىزدىگى ءۇشىن ولار تجم ۆاحتاسىندا جاقىن ماڭداعى ەلدى مەكەنگە جەدەل جەتكىزىلدى.
ۇلىتاۋ وبلىسىنداعى «جەزقازعان-ساتباەۆ» اۆتوجولىندا 1200-دەن استام كولىكتىڭ كەپتەلىسى بولدى. تجم قۇتقارۋشىلارى پوليتسيا جانە جەرگىلىكتى اتقارۋشى ورگانداردىڭ قىزمەتكەرلەرىمەن بىرلەسىپ, جاقىن ماڭداعى ەلدى مەكەندەرگە دەيىن اۆتوكولوننانى قاۋىپسىز الىپ ءجۇرۋدى ۇيىمداستىردى. وپەراتسيا بارىسىندا 24 ازاماتقا كومەك كورسەتىلىپ, 8 كولىك سۇيرەپ شىعارىلعان. بارلىق ادامدار قاۋىپسىز جەرگە جەتكىزىلدى.
