سۋ تاسقىنىنا قارسى ءىس-شارالاردا تاجىريبەسى بار قارۋلى كۇشتەردىڭ دەسانتتىق-شابۋىلداۋ اسكەرلەرىنىڭ اسكەري قىزمەتشىلەرى اۋىل تۇرعىندارىنا كومەككە كەلدى.
جارمۇحامبەت اۋىلىندا شامامەن 10 000 ادام تۇرادى. وتكەن اپتادا اۋا-رايى جىلى بولعاندىقتان وزەندەگى سۋ دەڭگەيى ەداۋىر كوتەرىلدى. كەي جەرلەردە ول تۇرعىن ۇيلەردىڭ اۋلالارىنا جايىلدى. ىلە اۋدانىنىڭ اكىمى وتكىزگەن شۇعىل كەڭەستەن كەيىن قارۋلى كۇشتەردىڭ دەسانتتىق-شابۋىلداۋ اسكەرلەرى قولباسشىسىنىڭ كومەگىنە جۇگىنۋ تۋرالى شەشىم قابىلداندى.
– گەنەرال-مايور الماز جۇماكەەۆ اۋىل تۇرعىندارىنا وزەننىڭ جاعاسىن نىعايتۋ جۇمىستارىن جۇرگىزۋ ءۇشىن 43 دەسانتشى-اسكەري قىزمەتشىنى كومەككە جىبەردى. ساربازدار تىنىمسىز وتە جىلدام جۇمىس ىستەدى. جارمۇحامبەت اۋىلىنىڭ تۇرعىندارى ولارعا كومەك كورسەتكەنى ءۇشىن شىن جۇرەكتەن العىستارىن ءبىلدىرىپ جاتىر, – دەدى الماتى وبلىسى ىلە اۋدانى اكىمىنىڭ ورىنباسارى الماس بوكەناەۆ.
ەكى كۇندە تۇرعىن ءۇي الاپتارىن سۋ باسۋىنا جول بەرمەۋ ماقساتىندا 800 مەتردەن استام سۋ بوگەۋ قۇرىلىستارى, ونىڭ ىشىندە 2500-دەن استام قاپشىق توسەلدى.
ەستەرىڭىزگە سالا كەتسەك, وتكەن جىلدىڭ كوكتەمىندە دەسانتتىق-شابۋىلداۋ اسكەرلەرىنىڭ اسكەري قىزمەتشىلەرى باتىس قازاقستان وبلىسىندا سۋ تاسقىنىنا قارسى ءىس-شارالارعا قاتىستى. 300 دەسانتشى جايىق, شاعان, دەرقۇل وزەندەرىنىڭ جاعالاۋلارىن جانە ولاردىڭ چاپاەۆ, جايىق, تەرەكتى, دارين جانە باسقا دا قالا ماڭىنداعى اۋداندارداعى سالالارىن نىعايتتى.
