«مارحابات بايعۇتتىڭ تۋعانىنا 80 جىل» جوباسىنىڭ جەتەكشىسى, «مەدياكراتيا» قوعامدىق بىرلەستىگىنىڭ توراعاسى عالىمجان ەلشىبايدىڭ ايتۋىنشا, بۇل قالامگەردىڭ 80 جىلدىعى اياسىنداعى دۇنيەلەردىڭ باستاماسى عانا. قالامىنان قانشاما كوركەم شىعارما تۋعان جازۋشى اتىن ۇرپاقتار جادىندا ساقتاۋ ءۇشىن باستامانىڭ ماڭىزى ەرەكشە. جۋرنال ۇلت ادەبيەتى مەن مادەنيەتىنىڭ دامۋىنا سەپتىگىن تيگىزىپ, تاقىرىپتا, جاڭاشىل شىعارمالار جاريالاۋعا دەن قويادى. سونىمەن بىرگە ادەبيەت, رۋحانيات تاقىرىبىنداعى ماسەلەلەردى قاۋزاپ, تانىلماي جۇرگەن جاس تالانتتارعا قولداۋ بىلدىرەدى.
Markhabat.kz اقپاراتتىق پورتالىندا جازۋشىنىڭ جەكە ءفوتوارحيۆى, سۇحباتتارى, اڭگىمە, پوۆەستەرى, قالامگەر تۋرالى جازىلعان دۇنيەلەر جاريالانادى. استاناداعى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە بەلگىلى عالىم, اكادەميك, الاشتانۋشى ديحان قامزابەك ۇلى جەتەكشىلىك جاسايتىن ديسسەرتاتسيالىق كوميسسيادا مارحابات بايعۇتتىڭ شىعارماشىلىعىن زەرتتەۋگە ارنالعان ەكى كانديداتتىق ديسسەرتاتسيا قورعالدى. بۇل دا كوڭىلدى جادىراتارلىق جاڭالىق. ياعني مارحاباتتانۋ جولعا قويىلدى دەۋگە نەگىز بار. «الداعى ۋاقىتتا قازاق ادەبيەتىندەگى ىرگەلى سالانىڭ بىرىنە اينالاتىنىنا سەنىمىمىز مول» دەدى جوبا جەتەكشىسى ع.ەلشىباي.
«مارحابات» جۋرنالىنىڭ باس رەداكتورى بولىپ بەلگىلى قالامگەر, جۋرناليست ورالحان ءداۋىت تاعايىندالدى. باسىلىم رەداكتورىنىڭ ايتۋىنشا, «مارحابات» بۇعان دەيىن جارىق كورىپ كەلگەن «تۇران-تۇركىستان» جۋرنالىنىڭ جالعاسى. سەبەبى «تۇران-تۇركىستاننىڭ» دۇنيەگە كەلىپ, وقىرمانعا جول تارتۋىنا جازۋشى مارحابات بايعۇت تىكەلەي اتسالىسقان. جۋرنالدىڭ ءار ءنومىرى 2 مىڭ دانامەن تارايدى.
كەشتە شىمكەنت قالالىق ءماسليحاتىنىڭ توراعاسى باحادىر نارىمبەتوۆ ءسوز الىپ, قالامگەردىڭ قازاق ادەبيەتىنە عانا ەمەس, تۇركى ادەبيەتىنە دە وزىندىك قولتاڭباسىن قالدىرعانىن اتاپ ءوتتى. كەزىندە مارحابات بايعۇتتىڭ قولاستىندا قاراپايىم مامان بولىپ جۇمىسىن باستاعان ول ماحاڭنىڭ شاراپاتىن كوپ كورگەنىن جەتكىزدى. ءماسليحات توراعاسى جازۋشىنىڭ وركەنيەتتى جاستار كوبەيىپ كەلەدى, بىراق كوركەم نيەتتى جاستار ازايىپ بارادى دەگەن ءسوزىن مىسالعا كەلتىرىپ, وسكەلەڭ ۇرپاقتىڭ نيەتى كوركەم بولۋ ءۇشىن قالامگەردىڭ اڭگىمەلەرىن وقۋعا شاقىردى.
تۇركىستان وبلىسى اكىمىنىڭ ورىنباسارى ەرتاي التاەۆ اكىمدىك تاراپىنان جازۋشىنىڭ 80 جىلدىعىن اتاپ وتۋگە بايلانىستى ءىس-شارالار جوسپارى قابىلدانعانىن ايتتى. سونداي-اق تۇركى دۇنيەسىنە تانىمال شىعارمالارىن «مارحابات» جۋرنالى ارقىلى ناسيحاتتاۋدىڭ, دارىپتەۋدىڭ مۇمكىندىگى تۋعانىن مالىمدەدى. اكىم ورىنباسارى ءسوز سوڭىندا وبلىس اكىمدىگى اتىنان جازۋشىنىڭ جارى قىزداركۇل اپامىزعا قۇرمەت كورسەتىپ, يىعىنا قامزول, باسىنا ورامال جاپتى.
جامبىل وبلىسى ش.مۇرتازا اتىنداعى رۋحانيات جانە تاريحتانۋ ورتالىعىنىڭ ديرەكتورى جاسۇلان ابدىحالىق جاڭا باسىلىمنىڭ جارىق كورۋىنە وراي ءوڭىر باسشىسى ەربول قاراشوكەەۆتىڭ قۇتتىقتاۋ حاتىن جەتكىزدى. ورتالىق جەتەكشىسى ءوز سوزىندە وبلىستا قولعا الىنعان «اۋليەاتا – كىتاپ وقيتىن ءوڭىر» جوباسى اياسىندا قالامگەر شىعارمالارى دا بايگەگە قوسىلاتىنىن باياندادى. شىعارماشىلىقتا شەكارا بولمايدى دەگەن ول ۇلتتىق دەڭگەيگە كوتەرىلگەن شەرحان مۇرتازا مەن مارحابات بايعۇتتاي قوس جازۋشىنىڭ شىعارمالارىن بىردەي ناسيحاتتاۋ كەرەك دەگەن وي ءبىلدىردى.
شىمكەنت قالاسى اكىمىنىڭ ورىنباسارى سارسەن قۇرانبەك وڭتۇستىكتەن شىققان تالانتتى قالامگەر مارحابات بايعۇت ىزگىلىكتىڭ, ادىلدىكتىڭ ۇلگىسىن كورسەتكەن, تۋىن تىككەن دارىندى تۇلعا بولعانىن اتاپ ءوتتى.
«قارىمدى قالامگەردىڭ 80 جىلدىعىنا وراي قالالىق اكىمدىك اۋقىمدى ءىس-شارالار جوسپارىن ازىرلەپ وتىر. سونىڭ ىشىندە جازۋشىنىڭ ءومىرى مەن شىعارماشىلىعىنا ارنالعان عىلىمي كونفەرەنتسيا دا بار. پرەزيدەنت قاسىم-جومارت توقاەۆتىڭ باستاماسىمەن ىسكە اسىپ جاتقان «ادىلەتتى قازاقستان», «ادال ازامات» تۇجىرىمدامالارىن ءتۇسىندىرۋ ءۇشىن كوركەمسوز شەبەرى مارحابات بايعۇتتاي جازۋشىنىڭ شىعارمالارىن وقىتۋ كەرەك. ماحاڭ كوزى تىرىسىندە ەلىم دەپ ەڭىرەپ, جۇرتىم دەپ تولعانىپ وتكەن ءبىرتۋار ازامات ەدى» دەدى قالا اكىمىنىڭ ورىنباسارى س.قۇرانبەك.
جيىندا سونداي-اق قالامگەردىڭ جارى قىزداركۇل اپامىز ءسوز سويلەپ, ماحاڭنىڭ ۇيدە دە, تۇزدە دە وزگەرمەيتىن بىرقالىپتى قاراپايىم بيازىلىعى تۋرالى وي تولعادى. جازۋشىنىڭ زامانداسى, اقىن نارماحان بەگالى دا دارابوز قالامگەردىڭ ادەبيەتكە سىڭىرگەن ەڭبەگى تۋرالى ايتتى.
مارحابات بايعۇت جازۋشىلىعىمەن قاتار كوپتەگەن تىڭ باستامالاردىڭ, قوعامدا كەڭىنەن قولداۋ تاپقان تاماشا يدەيالاردىڭ اۆتورى, باستاماشىسى بولدى. ماسەلەن, «ىرىس الدى – ىنتىماق» جوباسى وڭتۇستىك وڭىردەگى ەڭ ايتۋلى رۋحاني جوبالاردىڭ ءبىرى رەتىندە تانىلدى. «تاۋپىستەلى تاعىلىمى», «بوزارىقتان بوزتورعايعا دەيىن» سەكىلدى ءىس-شارالارى دا قوعامدىق وي-پىكىردىڭ ءدۇر سىلكىنۋىنە ۇلكەن قوزعاۋ سالدى.
شىمكەنت
