سۋرەتتەردى تۇسىرگەن – يگور بۋرگاندينوۆ
ءباسپاسوز – سەنىمدى دەرەككوز
«كازپراۆدانىڭ» العاشقى ءنومىرى 1920 جىلى 1 قاڭتاردا جارىق كوردى. گازەت «يزۆەستيا كيرگيزسكوگو كرايا» دەپ اتالدى. ۋاقىت وتە كەلە ەلمەن بىرگە ءباسپاسوز دە وزگەردى. «ستەپنايا پراۆدا», «سوۆەتسكايا ستەپ» دەگەن اتپەن شىقتى. ال 1932 جىلدان باستاپ «كازاحستانسكايا پراۆدا» بولدى. ارينە, گازەت اتاۋلارى عانا ەمەس, سونىمەن قاتار فورماتى, تيراجى, تاقىرىبى, مازمۇنى دا وزگەردى.
گازەتتىڭ تاريحىنان سىر شەرتكەن «قازاق گازەتتەرى» سەرىكتەستىگىنىڭ باس ديرەكتورى, اكادەميك ديحان قامزابەك ۇلى ءىس-شارانى جۇرگىزىپ, «كازپراۆدانىڭ» قازىرگى كۇنگە دەيىن ءجۇرىپ وتكەن جولىن ايتىپ ءوتتى.
– 2021 جىلدىڭ ناۋرىزىندا ەكى جەتەكشى رەسپۋبليكالىق گازەت – «Egemen Qazaqstan» مەن «كازاحستانسكايا پراۆدا» بىرىكتىرىلدى, 2023 جىلى قاڭتاردا ەكەۋى دە «قازاق گازەتتەرى» جشس-عا كىرەدى. بارشا جۇرت قادىرلەيتىن گازەت تۋرالى وي دا, نيەت تە شەكسىز. بىراق ءبىز تۇجىرىمداپ ايتايىق: بىرىنشىدەن, «كازاحستانسكايا پراۆدا» گازەتى – ەلىمىزدىڭ بەرەكە-بىرلىگىنە, قوعامدىق كەلسىمىنە ايانباي اتسالىسىپ كەلە جاتقان باسىلىم. ەكىنشىدەن, بۇل باسىلىمنىڭ كىندىگى اسا اۋىر تاريحي كەزەڭدە 1920 جىلى كەسىلسە دە, ونىڭ تۇڭعىش رەداكتورى – الاش زيالىلارىمەن تىعىز بايلانىستا بولعان, ءى مەملەكەتتىك دۋما دەپۋتاتى تيموفەي يۆانوۆيچ سەدەلنيكوۆ. ۇشىنشىدەن, «كازاحستانسكايا پراۆدا» گازەتى – قازاقستانداعى ءورىستىلدى باق-تىڭ اتاسى جانە كوشباسشىسى. تورتىنشىدەن, ول – قالام ۇستاعان ساراپشىلاردىڭ, عالىمداردىڭ, ويلى ازاماتتاردىڭ, جۋرناليستەردىڭ پىكىر الاڭى, شەبەرلىك مەكتەبى, – دەدى د.قامزابەك ۇلى.
كونفەرەنتسيا بارىسىندا سەنات توراعاسى ماۋلەن اشىمباەۆتىڭ قۇتتىقتاۋىن سەناتور نۇرتورە ءجۇسىپ, ءمəجىلىس توراعاسى ەرلان قوشانوۆتىڭ قۇتتىقتاۋىن دەپۋتات اسحات ايماعامبەتوۆ, مەملەكەتتىك كەڭەسشى ەرلان قاريننىڭ قۇتتىقتاۋىن پرەزيدەنت كەڭەسشىسى باۋىرجان وماروۆ جەتكىزدى.
سەنات توراعاسىنىڭ قۇتتىقتاۋىندا قازاقستان جۋرناليستيكاسىنداعى ءدال وسى كۇننىڭ ماڭىزى, ەلىمىزدىڭ اقپاراتتىق كەڭىستىگىن دامىتۋ, قوعامدىق پىكىردى قالىپتاستىرۋ جانە ۇلتتىق مۇددەنى قورعاۋعا قوسقان گازەتتىڭ ۇلەسى اتالدى.
«كازاحستانسكايا پراۆدا» گازەتى عاسىردان اسا ۋاقىت بويى ەل ومىرىندەگى اسا ماڭىزدى وقيعالاردىڭ جارشىسى بولىپ كەلەدى. ۇجىم ءاردايىم جوعارى ساپامەن, جاۋاپكەرشىلىكپەن جانە ءجۋرناليستىڭ بيىك مادەنيەتىمەن ەرەكشەلەنە ءبىلدى. «كازاحستانسكايا پراۆدا» – تاۋەلسىز قازاقستاننىڭ قالىپتاسۋ كەزەڭى مەن تاريحي جاڭعىرتۋلار جانە ەلىمىزدىڭ ءوسىپ-وركەندەۋى جولىندا قابىلدانعان ماڭىزدى شەشىمدەر شەجىرە بولىپ قاتتالعان ىرگەلى باسىلىم. گازەت ۇجىمى قازىرگى تسيفرلىق تەحنولوگيا داۋىرىندە دە كاسىبي بىلىكتىلىكتىڭ بيىگىنەن كورىنىپ وتىر. سونداي-اق قوعامنىڭ وزەكتى ماسەلەلەرىنە ءجىتى نازار اۋدارىپ, سەنىمدى اقپارات كوزى رەتىندە ۇلتقا قىزمەت ەتىپ كەلەدى», دەلىنگەن م.اشىمباەۆتىڭ قۇتتىقتاۋىندا.
ءماجىلىس توراعاسى ەرلان قوشانوۆ ءوز قۇتتىقتاۋىندا باسىلىمنىڭ ەلىمىزدىڭ قالىپتاسۋى مەن دامۋىنىڭ بارلىق ماڭىزدى كەزەڭىن قامتي وتىرىپ, قازاقستان تاريحىنىڭ شىنايى شەجىرەشىسىنە اينالعانىن اتاپ وتكەن.
«پرەزيدەنت قاسىم-جومارت توقاەۆ: «گازەت شىعارۋ ۇدەرىسى مەن ولاردى وقۋ مادەنيەتى ەشقاشان ۇزىلمەۋگە ءتيىس. ءبىز بۇل ىستە ساباقتاستىقتى ساقتاۋىمىز كەرەك», دەگەن ەدى. ەلىمىزدىڭ باستى گازەتتەرىنىڭ ءبىرى رەتىندە «كازاحستانسكايا پراۆدا» ۇزاق ۋاقىت ءوز وقىرماندارىن جاڭا جانە وزەكتى اقپاراتپەن, رەپورتاجدارمەن, ەكسكليۋزيۆتى سۇحباتتارمەن قۋانتاتىنىنا سەنىمدىمىن. بۇگىنگى تاڭدا «كازپراۆدا» جاڭا قوعامنىڭ قالىپتاسۋىنا ەلەۋلى ۇلەس قوسا وتىرىپ, جۋرناليستىك شەبەرلىكتىڭ جوعارى دەڭگەيىن جالعاستىرىپ كەلەدى. پارلامەنت ءماجىلىسىنىڭ زاڭ شىعارۋ قىزمەتى مەن جۇمىسىن ءاردايىم تەرەڭ جانە مۇقيات جاريالاعانى ءۇشىن جەكە العىسىمدى بىلدىرگىم كەلەدى», دەلىنگەن ە.قوشانوۆتىڭ قۇتتىقتاۋ حاتىندا.
ال مەملەكەتتىك كەڭەسشى ە.قاريننىڭ قۇتتىقتاۋىندا: «وسى ۋاقىت ىشىندە باسىلىم قازاق جۋرناليستيكاسىنىڭ تەمىرقازىعىنا, ۇلت ءباسپاسوزىنىڭ ۇستىنىنا اينالدى. مۇندا قالامگەرلەرىمىزدىڭ بىرنەشە بۋىنى شەبەرلىگىن شىڭدادى. گازەت بەتتەرىندە ءبىرتۋار پەرزەنتتەرىمىزدىڭ قولتاڭباسى قالدى. بۇگىندە ىرگەلى ۇجىم حالىق مۇددەسىنە, ەل يگىلىگىنە قىزمەت ەتۋدىڭ وزىق ۇلگىسىن كورسەتىپ وتىر. مەملەكەتتىك ساياساتتىڭ ءمان-ماڭىزىن تۇسىندىرۋگە اتسالىسىپ, تىڭ باستامالار مەن جاڭا رەفورمالاردى جۇزەگە اسىرۋعا ۇلەس قوسىپ كەلەدى. پرەزيدەنتىمىز قاسىم-جومارت توقاەۆ بۇقارالىق اقپارات قۇرالدارىن دامىتۋعا ايرىقشا ءمان بەرەدى. جۋرناليستەردى الەۋمەتتىك قولداۋ ماسەلەسىن دە ۇدايى نازاردا ۇستايدى. سىزدەر ءوز مىندەتتەرىڭىزدى ءمىنسىز اتقارىپ, مارتەبەلى ماماندىققا دەگەن ادالدىقتىڭ وزىق ۇلگىسىن كورسەتىپ جۇرسىزدەر. الداعى ۋاقىتتا دا ەلىمىزدى وركەندەتۋ جولىندا قاجىرلى ەڭبەك ەتە بەرەسىزدەر دەپ سەنەمىز», دەلىنگەن.
سونداي-اق جيىندا مادەنيەت جانە اقپارات ءمينيسترى ايدا بالاەۆانىڭ, قازاقستان حالقى اسسامبلەياسى توراعاسىنىڭ ورىنباسارى مارات ءازىلحانوۆتىڭ, «روسسيسكايا گازەتا» باسىلىمى, «بەلارۋس سەگودنيا» باسپا ءۇيى, قازاقستاننىڭ ستراتەگيالىق زەرتتەۋلەر ينستيتۋتى, پرەزيدەنت مۇراعاتى, ت.ب. ۇيىم باسشىلارىنىڭ قۇتتىقتاۋلارى وقىلدى.
ءىس-شارادا «ەگەمەن قازاقستان» رەسپۋبليكالىق گازەتى» اق-نىڭ 2000-2016 جىلدارداعى پرەزيدەنتى, مەملەكەتتىك سىيلىقتىڭ لاۋرەاتى ساۋىتبەك ابدراحمانوۆ ارنايى بايانداما جاساپ, ءباسپاسوز قازىرگى جۋرناليستيكانىڭ كلاسسيكاسى ەكەنىن اتاپ ءوتتى.
– ءباسپاسوز ماتەريالداردىڭ بەدەلى مەن ساپاسىن قامتاماسىز ەتەدى. بۇل گازەت پەن جۋرنال ماقالالارىن تاريحي قۇجات رەتىندە ساقتاۋعا مۇمكىندىك بەرەدى. گازەت جۋرناليستيكاسىندا تەرەڭ مازمۇن بار. ءباسپاسوز كوبىنەسە ينتەرنەت-رەسۋرستارمەن سالىستىرعاندا بەدەلدى جانە سەنىمدى اقپارات كوزى رەتىندە قابىلدانادى. قاعازدان وقۋ ماتىنگە تەرەڭىرەك ەنۋگە ىقپال ەتەتىنى دە كۇمان تۋدىرمايدى. ادامداردىڭ قاعازدا وقىلعان اقپاراتتى جاقسى ەستە ساقتايتىنى بۇرىننان دالەلدەنگەن, – دەپ ءباسپاسوزدىڭ ەرەكشەلىگىنە توقتالدى.
سونداي-اق پرەزيدەنت جانىنداعى ادام قۇقىقتارى جونىندەگى كوميسسيانىڭ توراعاسى, گازەتتىڭ بەلسەندى اۆتورى, كورنەكتى زاڭگەر يگور روگوۆ گازەت 100 جىلدان بەرى وتاندىق جۋرناليستيكانىڭ تەمىرقازىعى بولىپ كەلە جاتقانىن ايتتى.
– باسىلىمنىڭ قازاقستاننىڭ ۇلتتىق يدەياسىن ىسكە اسىرۋداعى, مەملەكەت باسشىسىنىڭ ساياساتىن ناسيحاتتاۋ مەن تۇسىندىرۋدەگى, مادەني-گۋمانيتارلىق, مورالدىق-ادامگەرشىلىك جانە باسقا دا قۇندىلىقتاردى دامىتۋ مەن تاراتۋداعى ءرولىن ەرەكشە اتاپ وتكەن ءجون. باسىلىم كونستيتۋتسيوناليزمنىڭ يدەيالارى مەن قاعيداتتارىن جۇزەگە اسىرۋعا ايتارلىقتاي ۇلەس قوسىپ كەلەدى. ونىڭ رەسۋرستارى ارقىلى تەوريا مەن پراكتيكانىڭ ءوزارا بايلانىسى, رەسپۋبليكانىڭ پروۆيزيالىق جۇيەسىنە ەنگىزىلگەن «نوۆەللالاردى» تەرەڭ جانە جان-جاقتى زەرتتەۋ قامتاماسىز ەتىلەدى. «كازپراۆدانىڭ» ءاردايىم سۇرانىسقا يە بولۋىنىڭ سەبەبى ونىڭ اتاۋىندا جاتىر, تاراتاتىن اقپاراتىنا سايكەس كەلەدى, – دەدى ي.روگوۆ.
تۇلعالار شىققان تاريحي باسىلىم
كونفەرەنتسيا بارىسىندا ءسوز العان قازاقستاننىڭ حالىق جازۋشىسى, گازەت ارداگەرى ليۋبوۆ شاشكوۆا «كازاحستانسكايا پراۆدا» باسىلىمىنىڭ قازىرگى كۇن ءۇشىن ماڭىزى زور وزىندىك تاريحي, ايرىقشا تاجىريبەسى بار ەكەنىن اتاپ ءوتتى.
– قولىنا قالام ۇستاعان, ءوزىنىڭ ادەبي بولاشاعىنا بەيجاي قارامايتىن وقىرمان ءۇشىن بۇل گازەت نەسىمەن تارتىمدى؟ باسىلىم جوعارى بىلىكتى كاسىبي ماماندارىمەن وقىرماندى قىزىقتىرىپ, ءوز بەتتەرىنە ەلدەگى جارقىن, بىرەگەي, تانىمال تۇلعالاردى تارتا ءبىلدى. ولەڭدەرىمەن ەلگە ەسىمى ايگىلى بولعان اقىن ولجاس سۇلەيمەنوۆ وسى گازەتتە ەڭبەك جولىن باستادى. ولەگ ميتسكەۆيچ, گەننادي تولماچەۆ, ۆالەري بۋرەنكوۆ سىندى جازۋشىلار ەڭبەك ەتتى. بۇل گازەتتىڭ تاريحي تاجىريبەسى مەن قالامى قارىمدى جۋرناليستەرى كىتاپ وقيتىن ۇلت جاساۋ جولىندا ءوزىنىڭ ۇلكەن قولداۋ بىلدىرەتىنىنە سەنەمىن, – دەدى ول.
جازۋشى وسى ورايدا اقىن و.سۇلەيمەنوۆتىڭ الداعى ون جىلدىقتار كىتاپ پەن ۇلت اراسىنداعى سانالى تۇردەگى ءوزارا تاۋەلدىلىك ۋاقىتى بولۋى قاجەتتىگى تۋرالى ايتقان ءسوزىن كەلتىردى.
– اقىن قازىرگى وركەنيەت وقىرماندى تىڭدارمان مەن كورەرمەنگە اينالدىرىپ جاتقانىن, ادامزات بالاسى جازۋ پايدا بولعانعا دەيىنگى تاس عاسىرىندا وسىنداي بولعانىن جەتكىزگەن ەدى. «ەگەر العاشقى جازۋ تاڭبالارىن ۇيرەنە باستاعان, ۇستىنە تەرى جامىلعان ءبىزدىڭ ارعى بابالارىمىزدىڭ الدىندا دامۋ كەلەشەگى بولسا, قازىرگى وركەنيەت – قۇلدىراۋدىڭ باستاۋى, مادەنيەتتىڭ توقىراۋى» دەدى اقىن. مەنىڭ ويىمشا, بۇل ايتىلىپ وتىرعان سوزدەر بۇگىنگى گازەتتەرگە دە قاتىسى بار. ەگەر ءبىز وقيتىن ۇلتتى قالىپتاستىرا الساق, بۇل دامىعان ەل قۇرۋدىڭ ءبىر تەتىگى بولاتىنى ءسوزسىز, – دەپ ويىن جالعادى جازۋشى.
قازاقستان ستراتەگيالىق زەرتتەۋلەر ينستيتۋتىنىڭ ءبولىم باسشىسى, ساياساتتانۋشى جانار تولەندينوۆا زاماناۋي تالاپتارعا ساي جاڭا مەديانىڭ دامىپ جاتقانىنا قاراماستان, ءداستۇرلى بۇقارالىق اقپارات قۇرالدارىنىڭ ورنى قوعام ءۇشىن ءالى دە زور ەكەنىن تىلگە تيەك ەتتى. ونىڭ ايتۋىنشا, قازىرگى تاڭدا ەلىمىزدەگى 5,5 مىڭعا جۋىق تىركەلگەن وتاندىق باق-تىڭ كوپشىلىگى – ءباسپاسوز قۇرالدارى.
– بۇل بۇگىندە ايتىلىپ جۇرگەن «گازەت-جۋرنالدىڭ كۇنى ءبىتتى» دەگەن اڭگىمەنى جوققا شىعارادى. دەگەنمەن مەديا تۇتىنۋ كورسەتكىشتەرىنە نازار سالساق, وتانداستارىمىزدىڭ جارتىسىنان كوبى, ياعني 57 پايىزى اقپاراتتى الەۋمەتتىك جەلىدەن الاتىنىن ايتقان. ال ءباسپاسوزدى وقيتىندار قاتارى 4 پايىزدى عانا قۇرايدى. بىراق بۇل ەلىمىزدە ءباسپاسوزدىڭ بەدەلى تومەندەدى دەگەندى بىلدىرمەيدى. ويتكەنى گازەت پەن جۋرنال ەڭ سەنىمدى دەرەككوز سانالادى. مەملەكەت باسشىسى جاڭا جىلدى گازەتتەرگە سۇحبات بەرۋدەن باستاۋى تەگىن ەمەس. ماسەلەن, بىلتىر قاڭتاردىڭ باسىندا «Egemen Qazaqstan» گازەتىندە پرەزيدەنتتىڭ ء«بىز وزىق ويلى ۇلت رەتىندە تەك قانا العا قاراۋىمىز كەرەك» دەگەن تاقىرىپپەن سۇحباتى جاريالانسا, بيىل «Ana tili» گازەتىندە «ماقساتىم – ەكونوميكانى جانە ەگەمەندىكتى نىعايتۋ» اتتى سۇحباتى جارىق كوردى. سونداي-اق وتكەن جىلى شىۇ ءسامميتى قارساڭىندا «كازاحستانسكايا پراۆدا» گازەتىندە پرەزيدەنتتىڭ باعدارلامالىق ماقالاسى شىققانىن بىلەسىزدەر. بۇعان قاراپ, مەملەكەت باسشىسى ەلدىڭ باس يدەولوگى رەتىندە كەلەشەككە ارناعان ءوز ويلارىن نەگىزىنەن ءباسپاسوز ارقىلى ءبىلدىرىپ كەلە جاتقانىن كورەمىز, – دەدى ج.تولەندينوۆا.
ساراپشى كەيىنگى جىلدارى «حالىق ۇنىنە قۇلاق اساتىن مەملەكەت» تۇجىرىمداماسى جۇزەگە اسىپ جاتقانىن, بۇل تۇرعىدا ماسس-مەديا – بيلىك پەن حالىق اراسىنداعى التىن كوپىر ءرولىن اتقاراتىنىن جەتكىزدى. «كازاحستانسكايا پراۆدا» گازەتى بۇل تۇرعىدا ۋاقىت تالابىنا ساي ءوز قىزمەتىن جوعارى دارەجەدە اتقارىپ جاتقانىن, باسىلىم بەتتەرىندە قوعامداعى ەڭ وزەكتى تاقىرىپتار مەن ماسەلەلەر قوزعالىپ جۇرگەنىن ايتتى. بيلىك تاراپىنان حالىققا جەتۋگە ءتيىس اقپاراتتار دا, حالىقتىڭ جوعارى جاققا بىلدىرگىسى كەلەتىن ويلارى دا عاسىردان اسا عۇمىرى بار گازەتتەن كورىنىس تاۋىپ جاتىر. باسىلىمنىڭ زاماناۋي اقپارات قۇرالدارىنان ەرەكشەلىگى – اتالعان اقپاراتتىڭ ءبارى الەۋمەتتىك جەلى مەن كەيبىر ينتەرنەت-رەسۋرستارداعى سەكىلدى حايپسىز, بايىپتى تۇردە كوتەرىلىپ, جازىلىپ جاتقانىن اتاپ ءوتتى.
ماراپات – ادال ەڭبەكتىڭ ەسەسى
قازاقستان حالقى اسسامبلەياسىنىڭ «شاڭىراق» كافەدرالار قاۋىمداستىعىنىڭ توراعاسى, ەۇۋ پروفەسسورى ناتاليا كالاشنيكوۆا ءبىزدىڭ ەلىمىزدە گەنەتيكالىق تۇرعىدا ۇلكەنگە قۇرمەت ءداستۇرى بار ەكەنىن جانە بۇل قۇرمەت تەك ادامدار اراسىندا عانا ەمەس, تاريحى عاسىردان اسقان باسىلىمعا دا كورسەتىلىپ جاتقانىن جاسىرمادى.
– 1920 جىلدان باستاپ «يزۆەستيا كيرگيزسكوگو كرايا», كەيىن «ستەپنايا پراۆدا» بولىپ جارىق كورگەن گازەت 1932 جىلى بارىمىزگە ەتەنە تانىس «كازاحستانسكايا پراۆدا» اتاۋىن يەلەندى. ول بار نازارىن پورترەتتى تاقىرىپقا اۋداراتىن ءباسپاسوزدىڭ ۇزدىك ءداستۇرىن ساقتاپ قالدى. قازىرگى تاڭدا باسىلىم جاڭا قازاقستاندى قۇرۋ جولىندا ونىڭ ماڭىزدى مىنبەرىنىڭ ءبىرى رەتىندە ءوز قىزمەتىن ءساتتى اتقارىپ كەلەدى, – دەدى ول.
ن.كالاشنيكوۆا قازاقستان حالقى اسسامبلەياسى مەن «كازاحستانسكايا پراۆدا» گازەتى بىرلەسىپ بىرقاتار يگىلىكتى ءىس اتقارعانى جايىندا دەرەكتەردى كەلتىردى. ماسەلەن, سونىڭ ءبىرى – «قازاقستان: بەيبىتشىلىك پەن كەلىسىم اۋماعى» (2010) كىتابى. بۇل ەڭبەك گازەت جۋرناليستەرىنىڭ ماتەريالدارى نەگىزىندە ازىرلەنگەن. سونداي-اق ول «قحا-عا 20 جىل: ءبىر ەل – ءبىر تاعدىر», «قازاقستان حالقى اسسامبلەياسى: ەكى ونجىلدىقتىڭ تاريحى», « ۇلى وتان سوعىسى جىلدارىنداعى حالىقتار دوستىعى: مايدان گازەتتەرى بەتتەرى نەگىزىندە» اتتى بىرلەسىپ شىعارىلعان كىتاپتارعا توقتالدى.
كونفەرەنتسيانىڭ جارىسسوزىندە گازەتتىڭ بۇرىنعى باسشىلارى الەكساندر تاراكوۆ, ۆلاديمير كۋرياتوۆ, ءماجىلىس دەپۋتاتى ەكاتەرينا سمىشلياەۆا, پرەزيدەنت ءارحيۆى ديرەكتورىنىڭ ورىنباسارى روزا كارىبجانوۆا, وزگە دە قوناقتار ءسوز الىپ, مەرەيلى مەرەيتويىن اتاپ ءوتىپ جاتقان باسىلىمنىڭ قازاق ءباسپاسوزى ايدىنىنداعى ورنى جايىندا ويلارىمەن ءبولىستى.
جيىندا «كازاحستانسكايا پراۆدا» گازەتىنىڭ بىرقاتار قىزمەتكەرى ادال ەڭبەگى مەن جوعارى كاسىبي بىلىكتىلىگى ءۇشىن ماراپاتقا يە بولدى. اتاپ ايتقاندا, مادەنيەت جانە اقپارات ءمينيسترىنىڭ بۇيرىعىمەن «اقپارات سالاسىنىڭ ۇزدىگى» توسبەلگىسىمەن گازەتتىڭ تۇركىستان وبلىسى مەن شىمكەنت قالاسىنداعى مەنشىكتى ءتىلشىسى ليۋبوۆ دوبروتا, گازەتتىڭ ەكونوميكا ءبولىمىنىڭ رەداكتورى يۋري فومەنكو, الماتى قالالىق قوسىنىنىڭ اعا ءتىلشىسى ايگۇل تۇرىسبەكوۆا ماراپاتتالدى. سونداي-اق گازەتتىڭ ارناۋلى ءتىلشىسى مارينا دەمچەنكو, قوعام ءبولىمىنىڭ ءتىلشىسى اسەت سىزدىقوۆ, ديزاينەر-كوركەمدەۋشى پاۆەل تسەديلين مادەنيەت جانە اقپارات ءمينيسترىنىڭ العىسحاتىنا يە بولدى.
ايتا كەتسەك, «كازاحستانسكايا پراۆدا» گازەتىندە بايىرعى داستۇرگە ساي ءتۇرلى تاقىرىپتا قالام تەربەپ, كىتاپتارى جارىق كورىپ جاتقان قالامگەرلەر از ەمەس. سونىڭ ءبىرى اسەت سىزدىقوۆ وتكەن جىلى «الماتينسكوە چۋدو» كىتابىن جارىققا شىعارعان ەدى. بۇل ەڭبەك قازاق قوعامىندا كوپ تالقىعا سالىنىپ, وقىرماندار تاراپىنان جوعارى باعاسىن الدى. اۆتوردىڭ مالىمدەۋىنشە, الداعى ۋاقىتتا كىتاپتىڭ مەملەكەتتىك تىلدەگى نۇسقاسى دا وقىرمان قولىنا تيەدى. كونفەرەنتسيانىڭ ەكىنشى بولىمىندە باسىلىم ارداگەرلەرى مەن ولاردىڭ ءىزىن باسقان رەداكتسيا قىزمەتكەرلەرى پىكىر الماسىپ, ءباسپاسوزدىڭ دامۋ بارىسى تۋرالى ويىن ورتاعا سالدى.
گۇلنار جولجان,
ەسكەندىر زۇلقارناي,
«Egemen Qazaqstan»
