بىلتىر عانا جۇمىسىن باستاعان «جومارت جان» رەسپۋبليكالىق ورتالىعى «مەكتەپكە جول», «جۇرەكتەن جۇرەككە», «مەيىرىم» جانە «قامقور» قايىرىمدىلىق جوبالارىن ءساتتى جۇزەگە اسىرعان. بىلتىر كوكتەمگى سۋ تاسقىنى تۇسىندا بەلسەندىلەر 1 700 توننادان اسا ەڭ قاجەتتى تاۋارلاردى تاسىمالداپ, قايىرىمدىلىققا 800 ملن تەڭگەدەن اسا قاراجات جيناعان. وسىلايشا ءتۇرلى الەۋمەتتىك جوبالار مەن مۇقتاج جاندارعا جالپى سوماسى 1 ملرد 300 ملن تەڭگە كولەمىندە كومەك كورسەتىلگەن. دوستىق ۇيىندە ۇيىمداستىرىلعان ءىس-شارادا ورتالىقتىڭ ەندىگى باعىت-باعدارى ايقىندالدى.
– نەگىزگى ماقسات – حالىقتىڭ الەۋمەتتىك وسال توپتارىنا جاردەم بەرۋ, مۇقتاج جانداردى جارىلقاۋ, جالپى قايىرىمدىلىق قىزمەتىن دارىپتەۋ. بيىل دا بۇل ۇردىستەن جاڭىلماي, يگى ىستەردى جالعاستىرامىز. الەۋمەتتىك ينفراقۇرىلىمدى جاقسارتۋ باعىتىندا دا بىرقاتار جۇمىس جوسپارلانىپ وتىر. وڭىرلەردە سپورت الاڭدارىن دامىتۋ, جاستار ورتالىقتارىن قۇرۋعا باسا ءمان بەرىلەدى. ونىڭ ۇستىنە قحا-نىڭ 30 جىلدىعىنا وراي وتكىزىلەتىن ءىس-شارالارعا بەلسەندى اتسالىسامىز. بۇعان قوسا مەملەكەت باسشىسى قاسىم-جومارت توقاەۆ بەكىتكەن جۇمىسشى ماماندىقتار جىلىندا قوعامدا جۇمىسشىلاردىڭ مارتەبەسىن كوتەرۋگە, ادال ەڭبەك, كاسىبيلىك سەكىلدى قاسيەتتەردى وسكەلەڭ ۇرپاققا ناسيحاتتاۋعا ۇلەس قوسامىز. سونىمەن قاتار ناۋرىز مەيرامىن, جەڭىستىڭ 80 جىلدىعىن تويلاۋعا ەرەكشە كوڭىل بولىنەدى, – دەدى «جومارت جان» رەسپۋبليكالىق ورتالىعىنىڭ باسشىسى ەۆگەني بولگەرت.
باسقوسۋعا سەنات دەپۋتاتى زاكيرجان كۋزيەۆ, مادەنيەت جانە اقپارات ۆيتسە-ءمينيسترى ەۆگەني كوچەتوۆ, مادەنيەت جانە اقپارات مينيسترلىگى ەتنوسارالىق قاتىناستاردى دامىتۋ كوميتەتىنىڭ توراعاسى عالىم شويكين, قحا «جومارت جان» وڭىرلىك ورتالىقتارىنىڭ توراعالارى, ەتنومادەني بىرلەستىكتەر مەن قوعامدىق قۇرىلىمداردىڭ مۇشەلەرى قاتىستى.
– قازاقستان حالقى اسسامبلەياسىنىڭ 30 جىلدىعى قارساڭىندا ەل ۇكىمەتى اۋقىمدى ءىس-شارالار جوسپارىن بەكىتتى. بۇل – 150-دەن اسا ءىرى ءىس-شارالار مەن 5 مىڭعا جۋىق ءتۇرلى باستامالاردى قامتيدى. ونىڭ ارقايسىسى مەيىرىمدىلىك, قايىرىمدىلىق, تۇراقتىلىق, بىرلىك قۇندىلىقتارىن ناسيحاتتاۋعا باعىتتالادى. مەرەكەنىڭ مەرەيىن كوتەرۋدە قايىرىمدىلىق ناۋقاندار, اسسامبلەيانىڭ 24-سەسسياسى, كەڭەيتىلگەن وتىرىستار, سونداي-اق عىلىمي-تاجىريبەلىك كونفەرەنتسيالار مەن فورۋمدار وتكىزىلەدى. اسسامبلەيا ءوز قىزمەتىن پاريجدەگى يۋنەسكو-نىڭ شتاب-پاتەرىندە تانىستىرۋدى جوسپارلاپ وتىر. تاعى ءبىر ايتا كەتەرلىگى, «بىرلىك» بي ءانسامبلىنىڭ گاسترولدىك ساپارى ۇيىمداستىرىلادى, – دەدى ە.كوچەتوۆ.
ال تالقىلاۋعا Zoom پلاتفورماسى ارقىلى قاتىسقان وبلىستىق «جومارت جان» ورتالىقتارىنىڭ, قحا ەتنومادەني بىرلەستىكتەرى مەن قوعامدىق قۇرىلىمدارىنىڭ توراعالارى بۇل مەرەيتوي تەك مەرەكە ەمەس, ەتنوسارالىق كەلىسىمدى ودان ءارى نىعايتۋعا سەرپىن بەرەتىنىن باسا ايتتى.
