سۋرەت: unian.net
بانكتەر كليەنتتىڭ تولەم تاپسىرمالارىن اقپاراتتىق جۇيەلەردىڭ جۇمىس كەستەسىنە سايكەس ادەتتەگى رەجىمدە, ەش شەكتەۋسىز جانە كىدىرىسسىز قابىلداپ جاتىر. جاڭا ستاندارت تولەمدەردى وڭدەۋ ءىسىن اۆتوماتتاندىرۋعا, سونداي-اق ەسەپ ايىرىسۋداعى جىلدامدىق پەن قاۋىپسىزدىكتى ارتتىرۋعا ىقپال ەتەدى. ISO 20022 ستاندارتىنىڭ ەرەكشەلىگى – تولەم نەمەسە مامىلە تۋرالى قوسىمشا مالىمەتتەردى بەرۋ مۇمكىندىگىندە. بۇل سايكەستەندىرۋ ۇدەرىسىن جەڭىلدەتىپ, قاتەلىكتەردى ازايتادى جانە كليەنتكە كورسەتىلەتىن قىزمەت ساپاسىن ارتتىرادى.
«ISO 20022 ستاندارتى قولدانىلعاندا وسى ادىستەمەنى پايدالاناتىن ءارتۇرلى اقپاراتتىق جانە تولەم جۇيەلەرى اراسىندا جاھاندىق ۇيلەسىمدىلىك قامتاماسىز ەتىلەدى. قازاقستان ورتالىق ازيا ەلدەرى اراسىندا العاشقىلاردىڭ ءبىرى بولىپ حالىقارالىق ستاندارتتى پايدالاناتىن مەملەكەتتەردىڭ قاتارىنا كىردى. ەندى ەۋروپالىق وداق پەن وڭتۇستىك-شىعىس ازيا ەلدەرىمەن بىرگە ترانسشەكارالىق تولەمدەردى جەڭىلدەتىپ, حالىقارالىق ساۋدا-ساتتىقتىڭ دامۋىنا ىقپال ەتەدى», دەلىنگەن ۇلتتىق بانك مالىمدەمەسىندە.
ISO 20022 ستاندارتىنىڭ ەنگىزىلۋى قارجى ينستيتۋتى مەن تۇتىنۋشى اراسىنداعى ءوزارا ارەكەتتەسۋدىڭ تيىمدىلىگىن ارتتىرىپ قانا قويماي, قارجى نارىعىنداعى تەحنولوگيالىق وزگەرىستەرگە بىرىڭعاي ەرەجە مەن راسىمدەر نەگىزىندە تەز بەيىمدەلۋگە مۇمكىندىك بەرەدى.
