فوتو: مادەنيەت جانە اقپارات مينيسترلىگى ءباسپاسوز قىزمەتى
اشىلۋ سالتاناتىنا مادەنيەت جانە اقپارات ءمينيسترى ايدا بالاەۆا, الماتى قالاسىنىڭ اكىمى ەربولات دوساەۆ, ءانشىنىڭ اعاسى مۇرات سەركەباەۆ پەن ۇلى بايعالي سەركەباەۆ, سونداي-اق شىعارماشىلىق زيالى قاۋىم وكىلدەرى, قالا تۇرعىندارى مەن قوناقتارى قاتىستى.
ەسكەرتكىش ابىلاي حان داڭعىلىنىڭ بويىندا, قۇرمانعازى اتىنداعى قازاق مەملەكەتتىك اكادەميالىق حالىق اسپاپتارى وركەسترى عيماراتىنىڭ الدىندا ورناتىلعان. مينيستر ايدا بالاەۆا ەسكەرتكىشتىڭ اشىلۋى ەلىنىڭ ۇلى پەرزەنتىنە دەگەن قۇرمەتى ەكەنىن اتاپ ءوتىپ, ەرمەك سەركەباەۆتىڭ باي رۋحاني مۇراسى ۇلت جادىندا ماڭگى ساقتالاتىنىنا سەنىم ءبىلدىردى.
«ەرمەك سەركەباەۆ – سيرەك كەزدەسەتىن تالانت يەسى, كاسىبي شەبەرلىگى جوعارى مۋزىكانت. ول ميلليونداعان ونەر سۇيەر كورەرمەننىڭ شىنايى ماحابباتىنا بولەندى. بۇگىنگى قازاق وپەراسىن ەرمەك سەركەباەۆسىز ەلەستەتۋ قيىن. ونىڭ عيبراتتى عۇمىرى – مادەنيەتىمىزدىڭ تاريحىنداعى تۇتاس ءبىر تاراۋ. كوپشىلىك بىلمەۋى مۇمكىن, بىراق ول قوعامدىق-ساياسي ومىردە دە بەلسەندىلىك تانىتىپ, تاۋەلسىزدىگىمىزدىڭ قالىپتاسۋى مەن نىعايۋىنا زور ۇلەس قوستى. سونىمەن قاتار, ەرمەك بەكمۇحامەد ۇلى دارىندى مۋزىكانتتار اۋلەتىنىڭ نەگىزىن قالادى. بالالارى مەن نەمەرەلەرى ونىڭ ءىسىن لايىقتى جالعاستىرىپ, قازاق ونەرىن الەمنىڭ ءار تۇكپىرىندە دارىپتەۋدە», دەدى مادەنيەت جانە اقپارات ءمينيسترى.
ۆەدومستۆو باسشىسى ەرمەك سەركەباەۆتىڭ بەينەسىن قولادان سومداعان مۇسىنشىلەر – ايدوس بۇركىتباەۆقا, تيمۋر ەرمۇحامەتوۆكە, اقىلبەك ورمانبەكوۆكە جانە قۋانىش اسىلبايعا ەرەكشە العىس ءبىلدىردى.
