فوتو: Mostafa Alkharouf/Anadolu via Getty Images
اقش-تىڭ جاڭادان سايلانعان پرەزيدەنتى دونالد ترامپ ءوزىنىڭ الەۋمەتتىڭ جەلىسىندە العاشقىلاردىڭ ءبىرى بولىپ ويىن ءبىلدىردى.
«كەلىسىم تارماعىنداعى تاياۋ شىعىستاعى كەپىلدەگى ادامداردى بوساتۋ تۋرالى ماسەلە ءبىزدىڭ نازارىمىزدا بولدى. ولاردى جاقىندا بوساتادى», دەپ جازىلعان حابارلامادا.
ال فرانتسيا پرەزيدەنتى ەممانۋەل ماكرون الدىمەن گازاداعى 15 اي بويى قيىن كۇن كەشكەن بەيبىت تۇرعىنداردىڭ جاعدايىنا توقتالدى. ول حالىقارالىق قاۋىمداستىقتى جاعدايدى باقىلاۋعا ۇستاۋعا شاقىردى.
«كەلىسىمنىڭ ساقتالۋى قاتاڭ قاداعالانۋى كەرەك. كەپىلدەگى تۇتقىندار بوساتىلۋعا ءتيىس. گازا تۇرعىندارى بەيبىت ءومىر سۇرۋگە قۇقىلى. بۇل كەلىسىم ساياسي دۇرىس شەشىم دەپ ويلايمىن», دەدى ە.ماكرون.
بىرىككەن ۇلتتار ۇيىمىنىڭ باس حاتشىسى انتونيۋ گۋتەرريش تە بۇل پىكىردى قوستادى. ول ءوز سوزىندە كەلىسىم شارتتارىنا سايكەس ەكى تاراپ بەكىتىلگەن شارتتاردى بۇزباي ارەكەت ەتۋگە ءتيىس دەدى. سونداي-اق ول بۇل كەلىسىمنىڭ ءساتتى جۇزەگە اسۋىنا اتسالىسقان ەگيپەت, قاتار, اقش وكىلدەرىنە العىسىن ءبىلدىردى.
«بىرىككەن ۇلتتار ۇيىمى بۇل كەلىسىمدى قولداۋعا دايىن. ەڭ ماڭىزدى جايت - ايماققا گۋمانيتارلىق كومەكتىڭ كەدەرگىسىز كىرۋىن قامتاماسىز ەتۋ. وسى ورايدا ەكى تاراپتى دا بۇل ماسەلەگە بەي-جاي قاراماۋعا شاقىرامىن», دەدى ا.گۋتەرريش.
ال دجو بايدەن بۇل كەلىسىمنىڭ ارقاسىندا تۇتقىنداعى ادامدار بوساپ, ءوز وتباسىمەن قاۋىشا الاتىنىن اتاپ ءوتتى. ساياساتكەر ءوز سوزىندە ەكى تاراپتى كەلىسىمگە كەلتىرۋگە ۇلكەن ديپلوماتيالىق كۇش-جىگەر جۇمسالعانىن ايتتى.
«بىرەر كۇننەن سوڭ كەلىسىم رەسمي تۇردە كۇشىنە ەنەدى. قاقتىعىستى كەزەڭ-كەزەڭىمەن توقتاتۋ ارقىلى تاياۋ شىعىستاعى جاعداي بىرتىندەپ رەتتەلەتىنىنە سەنەمىن», دەدى د.بايدەن.
