اۋداندىق سوتتا قىلمىستىق كودەكستىڭ “ابايسىزدا 5 بالانىڭ ولىمىنە اكەپ سوقتىرعان ءورت قاۋىپسىزدىگى تالاپتارىن بۇزۋ” بابى بويىنشا ايىپتالۋشىعا قاتىستى قىلمىستىق ءىس قارالدى.
- سوتتالۋشى بالالارىن قاراۋسىز قالدىردىپ, ۇلكەن ۇلىنا ءۇيدىڭ ءىشى سالقىنداعان جاعدايدا پەشكە وت سالۋدى تاپسىرعان. ۇلى پەشتە وتىن, كومىر جانە تۇرمىستىق قوقىستاردى جاعادى, سونداي-اق پەش جانىندا بەلگىسىز سۇيىقتىقپەن جاتقان پلاستيكالىق بوتەلكەنى وتقا سالادى. ناتيجەسىندە پەشتەگى جالىننىڭ جانىپ, ورتكە اينالۋىنا سەبەپ بولدى. ءورت سالدارىنان بەس بالا قايتىس بولدى. سوتتالۋشىنىڭ كىناسى ونىڭ مويىنداۋ ايعاقتارىمەن, كۋاگەرلەردىڭ ايعاقتارىمەن, وقيعا بولعان جەردى تەكسەرۋ حاتتاماسىمەن جانە سوت ساراپتامالارىنىڭ قورىتىندىلارىمەن دالەلدەندى, — دەلىنگەن جەتىقارا اۋداندىق سوتىنىڭ حابارلاماسىندا.
سوتتالۋشى ءوز كىناسىن تولىق مويىنداپ, ىستەگەن ىسىنە وكىنىش ءبىلدىرىپ, باس بوستاندىعىنان ايىرماۋدى وتىنگەن.
سوت شەشىمىمەن ايىپتالۋشىعا 5 جىلعا باس بوستاندىعىنان ايىرۋ جازاسى تاعايىندالدى. ايەلدىڭ جاس بالاسىنىڭ بولۋىنا بايلانىستى جازانى ورىنداۋ كەيىنگە قالدىرىلدى.
ۇكىم زاڭدى كۇشىنە ەنگەن جوق.
