فوتو: ۆەدومستۆو, تەلەگرام
ۆەدومستۆونىڭ ءباسپاسوز قىزمەتىنىڭ مالىمەتىنشە سونداي-اق, 201 جوبا بويىنشا جوبالاۋ-سمەتالىق قۇجاتتاما ازىرلەنىپ جاتىر. جوبا اياسىندا 700 مىڭ گەكتاردان استام سۋارمالى جەردى قالپىنا كەلتىرۋ-جاقسارتۋ جۇمىستارى جاسالادى, سونداي-اق جالپى ۇزىندىعى 7000 شاقىرىم كانال سالىنىپ رەكونسترۋكتسيالانادى.
سۋ رەسۋرستارىن رەتتەۋ, قورعاۋ جانە پايدالانۋ كوميتەتى توراعاسىنىڭ ورىنباسارى گۇلميرا يماشەۆانىڭ ايتۋىنشا اتالعان جۇمىستار سۋ رەسۋرستارىن باسقارۋ جۇيەسىن دامىتۋدىڭ 2024-2030 جىلدارعا ارنالعان تۇجىرىمداماسىنا جانە سۋ سالاسىن دامىتۋدىڭ 2024-2028 جىلدارعا ارنالعان كەشەندى جوسپارىنا ساي جۇرگىزىلەدى.
«بۇدان بولەك, اتالعان قۇجاتتاردا ءونىمسىز شىعىنداردى ازايتۋ جانە قوسىمشا سۋ كولەمىن جيناۋ بويىنشا دا كوپتەگەن ءىس-شارالار قاراستىرىلعان. مىسالى, 2024 جىلى اقتوبە سۋ قويماسىن رەكونسترۋكتسيالاۋ جۇمىستارى اياقتالدى. تۇركىستان وبلىسىنداعى بايدىبەك-اتا جانە قاراقۋىس سۋ قويمالارىنىڭ قۇرىلىسى, سونداي-اق قاپشاعاي جانە كيروۆ سۋ قويمالارىن رەكونسترۋكتسيالاۋ باستالدى», دەدى گ.يماشەۆا.
