ساپار اياسىندا ەرلان قوشانوۆ ساتباەۆ قالاسىنداعى №1 جىلۋ ستانساسىنىڭ جۇمىسىمەن تانىسىپ, ەڭبەك ۇجىمىمەن جانە قالا جۇرتشىلىعىمەن كەزدەسىپ, ولارمەن ەكولوگيا جانە «قارا قار» ماسەلەلەرىن تالقىلادى.
ءماجىلىس سپيكەرى اتاپ وتكەندەي, ساتباەۆتاعى ەكولوگيالىق ماسەلەلەردىڭ باستى سەبەبى – كومىر ساپاسى مەن جىلۋ ەلەكتر ستانساسىنداعى فيلترلەردىڭ ناشار جۇمىس ىستەۋى. سونداي-اق ول مەملەكەت باسشىسىنىڭ بۇل جاعدايدان حاباردار ەكەنىن جانە قالانىڭ ەكولوگياسىن لاستاۋدىڭ جۇيەلى سەبەپتەرىن جويۋ ءۇشىن كەشەندى تەكسەرۋ جۇرگىزۋدى تاپسىرعانىن اتاپ ءوتتى. ە.قوشانوۆ وبلىس اكىمدىگى مەن «قازاقمىس» كومپانياسىنىڭ وكىلدەرىنە جاعدايدى جاقسارتۋ جانە ەكولوگيالىق پروبلەمالاردى, سونىڭ ىشىندە ساتباەۆتاعى جىلۋ ەلەكتر ستانساسىن گازعا كوشىرۋ بويىنشا كەشەندى شارالاردى شۇعىل تۇردە قابىلداۋ تۋرالى تالاپ قويدى.
– ەسكى فيلترلەر ساپاسىز كومىردەن شىققان كۇل قالدىقتارىن ۇستاپ تۇرۋعا شاماسى جەتپەي وتىر. بۇل قالا ەكولوگياسىنا جانە تۇرعىنداردىڭ دەنساۋلىعىنا كەرى اسەر ەتىپ جاتىر. مۇنداي ماسەلەنى قىسقا مەرزىمدە شەشۋ مۇمكىن ەمەس ەكەنى تۇسىنىكتى. بىراق قازىر بارلىق سەبەپتى تولىق انىقتاپ, كەلەسى جىلىتۋ ماۋسىمىنا دەيىن ناقتى شارالار قابىلداۋىمىز قاجەت. كاسىپورىن باسشىلىعى, ەنەرگەتيكا مينيسترلىگى جانە اكىمدىك بۇل ماسەلەنى بىرلەسىپ, ۋاقىت سوزدىرماي شەشۋگە ءتيىس. «قارا قار» سياقتى كەلەڭسىز قۇبىلىستاردان تۇبەگەيلى ارىلۋعا بار كۇشىمىزدى سالۋىمىز قاجەت. ءوز كەزەگىندە ءماجىلىس دەپۋتاتتارى جاعدايدى باقىلاۋدا ۇستايدى, – دەدى ءماجىلىس توراعاسى.
كەزدەسۋ قورىتىندىسى بويىنشا وبلىس اكىمدىگى مەن «قازاقمىس» كومپانياسىنىڭ باسشىلىعى كەلەسى جىلىتۋ ماۋسىمىنا دەيىن ساتباەۆ جىلۋ ستانساسىنىڭ تازارتۋ جۇيەلەرىن جاڭعىرتۋ بويىنشا بارلىق جوسپارلانعان جۇمىستى اياقتاۋعا مىندەتتەمە الدى. ءىس-شاراعا قاتىسقان ەنەرگەتيكا مينيسترلىگىنىڭ وكىلدەرى ۇلىتاۋ وبلىسىندا جىلۋ ەلەكتر ستانساسىن جاڭعىرتۋدا «ينۆەستيتسيا ورنىنا تاريف»» ءتاسىلى ارقىلى قولداۋ كورسەتۋگە دايىن ەكەنىن حابارلادى.
سونداي-اق ءماجىلىس سپيكەرى حالىقتى جىلۋمەن ۇزدىكسىز قامتاماسىز ەتۋ كەيىنگى جىلدارداعى ەڭ ماڭىزدى ماسەلەنىڭ ءبىرى ەكەنىنە نازار اۋداردى. ينجەنەرلىك ينفراقۇرىلىمنىڭ جاعدايى – مەملەكەت باسشىسىنىڭ ۇدايى باقىلاۋىندا. ەلدەگى توزىعى جەتكەن قازاندىقتاردى, ينجەنەرلىك-كوممۋنالدىق جەلىلەردى جاپپاي جاڭعىرتۋ جۇمىستارى ەش پافوسسىز جانە كوزبوياۋشىلىقسىز ءجۇرىپ جاتىر. ول تۋرالى قاسىم-جومارت توقاەۆ جاقىندا «Ana tili» گازەتىنە بەرگەن سۇحباتىندا ايتتى.
ءماجىلىس دەپۋتاتتارى جەزقازعان قالاسىنداعى گيدروتسەحتاعى جۇمىس بارىسىمەن دە تانىستى. ەرلان قوشانوۆ اتاپ وتكەندەي, جەزقازعاندى اۋىزسۋمەن قامتاماسىز ەتۋ ءالى كۇنگە دەيىن ەڭ وزەكتى ماسەلەنىڭ ءبىرى بولىپ وتىر. 2021 جىلى مەملەكەت باسشىسى بۇل تۇيتكىلدى شەشۋدى تاپسىرعان ەدى. قازىرگى ۋاقىتقا دەيىن بىرقاتار شارۋا اتقارىلعانىمەن, ءالى دە كوپتەگەن ماسەلە بار.
– جەزقازعان تۇرعىندارى ساپالى اۋىزسۋعا مۇمكىندىگىنشە تەزىرەك قول جەتكىزۋى كەرەك. ول حالىقتىڭ دەنساۋلىعى مەن وڭىردەگى احۋالعا تىكەلەي اسەر ەتەدى. بۇل – بارلىق تاراپتىڭ, مينيسترلىكتەر مەن اكىمدىكتىڭ ورتاق مىندەتى. ءوز كەزەگىندە دەپۋتاتتار دا وسى جۇمىسقا بەلسەنە اتسالىسۋعا دايىن, – دەدى ە.قوشانوۆ.
پالاتا سپيكەرى جەزقازعاندى اۋىزسۋمەن قامتاماسىز ەتۋ ماسەلەسىن جەراستى سۋ كوزدەرىن پايدالانۋ ارقىلى ەكى سۋ قۇبىرى – ەسقۇلا جانە ءۇيتاس-ايدوس سۋ جۇيەلەرى ەسەبىنەن شەشۋ جوسپارلانىپ وتىرعانىن اتاپ ءوتتى. بۇگىنگى تاڭدا قاجەتتى جوبالىق قۇجاتتاردىڭ ءبارى ازىرلەنىپ, ناقتى جۇمىس كولەمى بەلگىلەنگەن, باستاپقى قارجى بولىنگەن. كەزدەسۋ بارىسىندا سۋ رەسۋرستارى جانە يرريگاتسيا مينيسترلىگى مەن وبلىس باسشىلىعى وكىلدەرىنىڭ قاتىسۋىمەن بارلىق ماسەلە جان-جاقتى تالقىلاندى. كەزدەسۋ قورىتىندىسى بويىنشا ءماجىلىس توراعاسى 2025 جىلى بارلىق ماسەلەنى شەشۋگە جانە جەزقازعاندى اۋىزسۋمەن قامتاماسىز ەتۋگە باعىتتالعان ناقتى قادامدار جاسالۋعا ءتيىس ەكەنىن ەرەكشە اتاپ ءوتتى.
ساپار بارىسىندا دەپۋتاتتار ساتباەۆ قالاسىنداعى وقۋشىلار سارايىنىڭ جۇمىسىمەن تانىسىپ, جەزقازعاندا سالىنىپ جاتقان دەنەشىنىقتىرۋ-ساۋىقتىرۋ كەشەنىندە وبلىس بەلسەندىلەرىمەن, سونداي-اق جەزقازعان جۇرتشىلىعىمەن كەزدەستى.
