سۋرەتتى تۇسىرگەن – ەرلان ومار, «EQ»
باسقوسۋ بارىسىندا ەكى ەلدىڭ بايلانىسىن ارتتىرۋدىڭ ءبىر جولى باق سالاسىنداعى ىنتىماقتاستىقتى نىعايتۋ ەكەنى ايتىلدى. جابەر ابدۋللا قازاقستان مەن يراك تاريحى تامىرلاس, سەنىمى مەن رۋحاني قۇندىلىقتارى ورتاق ەلدەر ەكەنىن تىلگە تيەك ەتتى.
«قازاقستان ءۇشىن دە, يراك حالقى ءۇشىن دە مارتەبەسى مەن مەرەيى ۇستەم عۇلامالارىمىز از ەمەس. ماسەلەن, باعداد قالاسىندا ءال-فارابي اتىنداعى ۋنيۆەرسيتەت كوللەدجى بار. بۇل كىسىنىڭ تۇركى حالقىنان شىققان, سونىڭ ىشىندە قازاق جەرىندە ومىرگە كەلگەن الەمدىك دەڭگەيدەگى ۇلى عۇلاما ەكەنىن بىلەمىز. ونى اراب حالقى دا ماقتان تۇتادى. وسى سەكىلدى ءماشھۇر عۇلامالارىمىز بەن ورتاق قۇندىلىقتارىمىز ءبىزدىڭ ەلدەرىمىزدىڭ اراسىنداعى التىن كوپىر ىسپەتتەس», دەدى ول.
سونداي-اق ديپلوماتتىڭ ايتۋىنشا, بيىل باعداد قالاسى اراب مادەنيەتىنىڭ استاناسى بولىپ جاريالانىپتى.
«قازاق گازەتتەرى» سەرىكتەستىگىنىڭ باس ديرەكتورى ديحان قامزابەك ۇلى ەلىمىزدىڭ باس گازەتىنە ارنايى كەلىپ, ءوز مەملەكەتى جايىندا ماڭىزدى اقپاراتتارمەن ءبولىسىپ جاتقان يراكتىق رەسمي مەيمانعا العىسىن ءبىلدىرىپ, قازاق حالقىنىڭ تاريحي, مادەني, ءدىني ومىرىندە يراك, باعداد ولكەلەرىنىڭ تەرەڭ ءىزى قالعانىن تىلگە تيەك ەتتى.
اڭگىمە سوڭىندا يراكتىڭ ۋاقىتشا سەنىمدى وكىلى قازاق پەن اراب حالىقتارىن تەك تاريحي, مادەني بايلانىستار عانا ەمەس, ءدىني ۇستانىمى دا تۇتاستىراتىنىن جەتكىزدى. ماسەلەن, ول ورتالىق ازيادان شىققان ءحاديسشى يمام ءال-ءبۇحاريدى بۇكىل اراب دۇنيەسى قۇرمەت تۇتاتىنىن, حانافي ءمازھابىنىڭ نەگىزىن قالاعان يمام ءابۋ حانيفا يراكتا جەرلەنگەنىن ايتتى.
«جاقىندا مەن تۇركىستان قالاسىنداعى قوجا احمەت ياساۋي مازارىنا زيارات ەتتىم. ءبىز حالىقتار اراسىن جالعاستىراتىن وسىنداي ورتاق بابالارىمىزدى قۇرمەت تۇتىپ, ۇرپاققا قالدىرعان ەڭبەگىن ۇمىتپاۋىمىز كەرەك», دەدى ءال-ءتاميمي.
كەزدەسۋ سوڭىندا تاراپتار الداعى ۋاقىتتا يراك ەلشىلىگى مەن «Egemen Qazaqstan» گازەتى اراسىندا اقپاراتتىق-مادەني بايلانىستى ارتتىرۋعا ۋاعدالاستى.
