كەزدەسۋدە ۆيتسە-مينيستر «كەلەشەك» بىرىڭعاي ەرىكتى جيناقتاۋ جۇيەسى جايىندا ءسوز قوزعادى. ونىڭ «ۇلتتىق قور – بالالارعا» جوباسىنان ايىرماشىلىعى جونىندە ايتىپ بەردى. بۇل تاقىرىپ اتا-انالاردى كوبىرەك قىزىقتىردى. وسى ورايدا جوعارى بىلىمگە جاۋاپتى مامان ءتيىستى اقپاراتتى مينيسترلىك سايتىنان الۋعا بولاتىنىن جەتكىزدى. سونىمەن بىرگە ت.ەشەنقۇلوۆ جوعارى ءبىلىمدى قولجەتىمدى ەتۋدىڭ ماڭىزى مەن وزىق كادرلىق ساياساتتى جۇزەگە اسىرۋ, ۇزدىك ءبىلىم جۇيەسىن دامىتۋ سەكىلدى ماسەلەلەرگە توقتالدى. بۇدان بولەك, ول اتالعان مينيسترلىكتىڭ العا قويعان ماقساتتارى مەن جوبالارى تۋرالى كەڭىنەن اڭگىمەلەدى.
اسىرەسە جوعارى ءبىلىم ءىسىنىڭ ارتىقشىلىقتارى مەن باسىمدىقتارىن ارنايى ءسوز ەتتى.
«بىلتىر عىلىم جانە جوعارى ءبىلىم مينيسترلىگى ءۇشىن ناتيجەلى جىل بولدى. كوپتەگەن اۋقىمدى ءارى ماڭىزدى جوبالار مەن ءىس-شارالاردى جۇزەگە اسىردىق. ماسەلەن, جوعارى بىلىمگە قولجەتىمدىلىكتى قامتاماسىز ەتۋ ماقساتىندا 2023 جىلمەن سالىستىرعاندا گرانتتار سانى 5 مىڭعا ارتتى. ياعني وتكەن جىلى 93 مىڭ گرانت ءبولىندى. سونداي-اق دوكتورانتۋرا مەن باكالاۆرياتقا بولىنگەن گرانت سانى دا ەداۋىر ءوستى. ايتا كەتۋ كەرەك, وتكەن جىلدا تالاپكەرلەر سانى كوپ بولدى, سونىمەن بىرگە ولاردىڭ ءبىلىم ساپاسى دا جوعارى دەڭگەيدى كورسەتتى. وسىعان وراي باسەكەلەستىك كۇشەيىپ, كەيبىر ماماندىقتارعا ءتۇسۋدىڭ بالدىق كورسەتكىشى جوعارىلادى. جوعارى وقۋ ورنىنا قابىلدانۋدى وڭايلاتۋ ءۇشىن قاناتقاقتى جوبا رەتىندە ەكى ءتۇرلى گرانتتى ۇسىندىق. ونىڭ ءبىرى – سارالانعان, ياعني ديففەرەنتسيالدى, ەكىنشىسى – جەڭىلدەتىلگەن نەسيە تۇرىندە بەرىلگەن گرانتتار. وسى ورايدا 2024 جىلى سارالانعان 300 گرانت بولدىك. ونى الۋعا 30 مىڭ تالاپكەر قۇجات تاپسىردى. جالپى, سارالانعان گرانت جوبامىزدى تالاپكەرلەر وتە جاقسى قابىلدادى. سونىمەن بىرگە «كەلەشەك» بىرىڭعاي ەرىكتى جيناقتاۋ جۇيەسىن جاسادىق. ونىڭ زاڭ جوباسى پارلامەنتكە ۇسىنىلىپ, دەپۋتاتتار تاراپىنان قولداۋ تاپتى. ودان بولەك, مەملەكەتتىك «سەرپىن» باعدارلاماسىن جەتىلدىرۋ باعىتىندا رەسپۋبليكانىڭ 8 وڭىرىندە ارنايى جوبالىق كەڭسەلەر قۇرىلدى. بۇل رەتتە جوعارى وقۋ ورىندارى, جەرگىلىكتى اكىمدىك پەن كاسىپورىندار تاراپىنان دايىندالعان جوسپارلار وسى جوبالىق كەڭسەدە قارالادى. مۇندا كوزدەلگەن ماقسات – ستۋدەنتتەردىڭ ءبىلىمىن جاقسارتۋ, وقۋ باعدارلاماسىنىڭ ساپاسىن كۇشەيتۋ, وقۋ بىتىرگەن جاس مامانداردىڭ جۇمىسقا ورنالاسىپ, ەلگە پايداسىن تيگىزۋ», دەدى ت.ەشەنقۇلوۆ.
جوعارى ءبىلىم سالاسىنا جاۋاپتى ماماننىڭ ايتۋىنشا, بىلىكتى جاس كادرلاردى دايارلاۋ وقۋ باعدارلاماسىنىڭ ساپاسى مەن ۋنيۆەرسيتەتتەردىڭ وقىتۋشى-پروفەسسورلىق قۇرامىنىڭ جوعارى دەڭگەيىنە بايلانىستى. وسى ەكى ماسەلەنى شەشۋ جولىندا مينيسترلىك بىلتىر وقۋ باعدارلاماسىنىڭ 90% جاڭارتقان. سونىڭ ناتيجەسىندە بولاشاق كادرلاردى دايارلاۋ ءىسى ەكونوميكا مەن ءوندىرىس سالاسىنداعى بۇگىنگى تالاپتار مەن سۇرانىستارعا سايكەستەندىرىلدى. ۆيتسە-ءمينيستردىڭ مالىمدەۋىنشە, جوعارى وقۋ ورىندارىنا ماتەريالدىق-تەحنيكالىق بازانى كۇشەيتۋ جونىندە تالاپتار قويىلدى. ونىڭ ىشىندە كىتاپحانا جۇيەسىن دامىتۋ, قاجەتتى وقۋلىقتارمەن قامتاماسىز ەتۋ مىندەتىن اتاپ ءوتۋ كەرەك. سالا مامانىنىڭ ايتۋىنشا, بۇل – ستۋدەنتتەردىڭ ءبىلىمىن شىڭداۋعا قاجەتتى ەڭ ءبىرىنشى تالاپ. سونىمەن بىرگە جاتاقحانا ماسەلەسى مينيسترلىكتىڭ كۇن تارتىبىنەن تۇسكەن ەمەس. وسىعان بايلانىستى ارنايى جوسپار قۇرىلىپ, ءتيىستى جۇمىس قولعا الىندى. ناتيجەگە وراي بىلتىر كوزدەلگەن 10 مىڭنىڭ ورنىنا 11 مىڭ ستۋدەنت جاتاقحانامەن قامتاماسىز ەتىلىپ, 40 جاتاقحانا عيماراتتارى پايدالانۋعا بەرىلدى. سالا وكىلىنىڭ سوزىنشە, بۇل باعىتتاعى جۇمىستار وسى جىلى دا ءوز جالعاسىن تاباتىن بولادى. بۇدان وزگە ەسەپتى جىل ىشىندە رەسپۋبليكادا العاش رەت اكادەميالىق جانە زەرتتەۋ ارتىقشىلىقتارى ورتالىعىنىڭ وتاندىق مودەلى ازىرلەندى.
ۆيتسە-مينيستر ءوز سوزىندە ۆەدومستۆو پەداگوگيكالىق ماماندىقتارعا وقىتۋ ىسىنە ەرەكشە كوڭىل بولەتىنىن جەتكىزدى. سەبەبى وسكەلەڭ ۇرپاققا ساپالى ءتالىم-تاربيە بەرەتىن مۇعالىم بولعاندىقتان ولاردىڭ ءبىلىمدى دە بىلىكتى بولۋى وتە ماڭىزدى. وسى تۇستا وزبەكالى جانىبەكوۆ اتىنداعى وقپۋ پەداگوگ-ماماندار دايارلاۋدىڭ وڭتۇستىك وڭىرىندەگى ۇستاحاناسى دەپ اتاعان ءجون.
عىلىم جانە جوعارى ءبىلىم مينيسترلىگى تاراپىنان قولعا الىنعان قاناتقاقتى جوبانىڭ ءبىرى – ۇلتتىق رەيتينگ كورسەتكىشى. ەندى اتالعان باستامانى جۇزەگە اسىرۋ كوزدەلىپ وتىر. ياعني وسى ارقىلى ۋنيۆەرسيتەتتەردىڭ مامان دايارلاۋداعى جۇمىستارىنىڭ ساپاسى كورىنەدى. بۇل ءبىرىنشى كەزەكتە كەلەشەك تالاپكەرلەردىڭ جوعارى وقۋ ورنىن دۇرىس تاڭداۋىنا كومەكتەسەدى. ەكىنشىدەن, ۇلتتىق رەيتينگ ءبىلىم سالاسى نارىعىندا جوعارى وقۋ ورىندارى اراسىندا ءوزارا باسەكەلەستىكتى كۇشەيتەدى. ال بۇل ەڭ الدىمەن ءبىلىم ساپاسىنىڭ كۇشەيۋىنە سەپتىگىن تيگىزەرى حاق.
شىمكەنت
