– ەڭبەككە ەبى بار قىز-كەلىنشەكتەردى كومپانيا وكىلدەرى دايىندىق كۋرسىنان وتكىزىپ, تىگىن ماشيناسىنىڭ ءتىلىن ۇيرەتتى. سودان سوڭ تەحنولوگتەر كومەگىمەن ءوندىرىس ءۇردىسىن يگەرتتى. ناتيجەسىندە, ولار تەز ارادا ىسمەرلىك شەبەرلىكتەرىن شىڭداپ, زاماناۋي قۇرىلعىلاردى ەمىن-ەركىن يگەرىپ الدى, – دەيدى تىگىن تسەحىنىڭ شەبەرى زۋلفيا سادىرنيازوۆا.
ونىڭ ايتۋىنشا, ەڭبەكاقى اركىمنىڭ ناقتى ورىنداعان جۇمىس كولەمىنە قاراي تولەنەدى. تاپسىرىستى جىلدام ءارى ساپالى اتقارعان تىگىنشىلەردىڭ الدى ايىنا 400 مىڭ تەڭگەگە دەيىن تابىس تابادى ەكەن. ون ساۋساعىنان ونەر تامعان تىگىنشىلەر ورنالاسقان تسەحتىڭ جۇمىسى قات-قابات.
ارنايى ولشەممەن ءپىشىلىپ, كەسىلىپ كەلگەن كيىم بولشەكتەرىن ءبىر-بىرىنە جالعاي تىگىپ, تىنىمسىز ەڭبەك ەتىپ جاتىر. تابىس كولەمىن ۇلعايتۋ ءۇشىن ءونىمدى ەڭبەك قاجەتتىگىن جەتە سەزىنەتىن قىز-كەلىنشەكتەر ۋاقىتتى ۇتىمدى پايدالانۋعا توسەلگەن.
– قورعانىس مينيسترلىگى مەن ۇلتتىق ۇلان گۆاردياسى جانە شەكارا قىزمەتكەرلەرىنە, سونداي-اق تەمىرجول سالاسىنىڭ ماماندارىنا ارناۋلى كيىم تۇرلەرىن تىگەتىن كاسىپورىن ەڭبەككەرلەرى وزدەرىنە العان مىندەتتەرىن ابىرويلى اتقارىپ, 2024 جىلدى تابىسپەن اياقتادى. كاسىپورىننىڭ جوعارى ساپالى كيىمدەرىنە ەلىمىزبەن قاتار, رەسەيدەن تاپسىرىس ءتۇسىپ, ونى دا جەتكىزىپ بەردىك. بىلتىر جەلتوقساندا قورعانىس مينيسترلىگىنىڭ تاپسىرىسىمەن 58 مىڭ دانا تريكوتاجدىق كيىم جيىنتىعىن تىگىپ بىتىردىك. مەملەكەتتىك تاپسىرىستى ۋاقتىلى اياقتاۋ ءۇشىن كۇنىنە
2 500 دانا كيىم جيىنتىعى تىگىلدى. ەندى باس كيىمدەردى تىگۋدى باستاپ كەتتىك, – دەيدى «الاتاۋ» جشس ءوندىرىس باسشىسى مۇحامبەتقالي سابىروۆ.
ەڭبەك ۇجىمى وتكەن جىلدىڭ سوڭىندا ءوندىرىس اياسىن كەڭەيتۋ ماقساتىندا اياق كيىم تىگەتىن تسەحتى ىسكە قوستى. العاشقى كۇننىڭ وزىندە 20 جۇمىسشى 1 620 پار اياق كيىم تىگىپتى. تاۋلىگىنە 2 000 دانا اياق كيىم تىگۋدى جوسپارلاعان كاسىپورىننىڭ بۇل بولىمىندە دە جۇمىس قىزۋ. اياق كيىم تسەحى تۇگەلدەي نەمىس تەحنولوگياسىمەن جابدىقتالعان. اۆتوماتتاردىڭ تەتىگىندە وپەراتور وتىرادى. جۇمىستىڭ كەي بولىگىن روبوتتار اتقارادى. تسەحتىڭ ىسكە قوسىلعانىنا ەكى اپتا عانا وتكەنىمەن, وپەراتورلار زاماناۋي تەحنيكانىڭ ءتىلىن مەڭگەرىپ, قۇلتەمىردى ءتيىمدى باسقارۋدى ۇيرەنىپ العان.
كاسىپورىندا تىگىلەتىن كيىمگە قاجەت ماتالار وزبەكستان مەن قىتايدان الىنسا, اياق كيىمگە كەرەك بىلعارى ىرگەدەگى بورالداي مەن سوناۋ بەلورۋسيادان اكەلىنەدى. ءوندىرىس اۋماعىن كەڭەيتۋ ماقساتىندا 2 گەكتار جەر العان «الاتاۋ» جشس-ءنىڭ ينۆەستيتسيا كولەمى جىل سوڭىندا 1 ملن 550 مىڭ دوللاردى قۇراعان. وعان زاماناۋي قۇرىلعىلار ساتىپ الىنعان.
جالپى, جامبىل اۋدانىندا تاياۋ مەرزىمدە 4 ينۆەستيتسيالىق جوبا ىسكە اسىرىلماق. ونىڭ جالپى قۇنى 90 ملرد تەڭگەدەن اسادى. ناتيجەسىندە 3 000-نان اسا ادام تۇراقتى جۇمىسپەن قامتىلادى.
الماتى وبلىسى
