ساپار اياسىندا دەپۋتاتتار جەرگىلىكتى تۇرعىندارمەن كەزدەسىپ, ولاردىڭ تۇرمىس-تىرشىلىگىن, وڭىردەگى ەكولوگيالىق جاعدايدى جانە اتقارىلىپ جاتقان جۇمىستاردى تالقىلادى. ازاماتتاردىڭ ۇسىنىس-تىلەكتەرىن تىڭداپ, پارلامەنتتە قابىلدانىپ جاتقان زاڭدار تۋرالى پىكىر الماستى.
– بۇگىن جىلىويلىقتارمەن كەزدەسىپ, كوكتەمگى ماۋسىمعا دايىندىقپەن تانىستىق. اتاپ ايتقاندا, جەم وزەنى مەن قۇرساي وزەكتەرىنىڭ ءتۇبىن تەرەڭدەتۋ جۇمىستارىن كوردىك. جوبا اياسىندا جەرگىلىكتى جەردىڭ گەوگرافياسىن جاتقا بىلەتىن كونەكوز قاريالار مەن اۋىلدىڭ بەلسەندى ازاماتتارىنىڭ ۇسىنىستارى ەسكەرىلەدى. وسى ماسەلە بويىنشا اتقارىلىپ جاتقان جۇمىس ءاردايىم ءبىزدىڭ نازارىمىزدا بولادى, – دەدى دەپۋتات دۇيسەنباي تۇرعانوۆ.
جوبا اياسىندا جالپى ۇزىندىعى 95 شاقىرىم بولاتىن ءتۇپ تەرەڭدەتۋ جۇمىستارى جوسپارلانعان. اتاپ ايتقاندا, قۇرساي كانالى – 46,1 شاقىرىم, جەم وزەنى – 48,9 شاقىرىم, بوگەت قۇرىلىسى – 61 شاقىرىم.قازىرگى ۋاقىتتا جەم وزەنىنىڭ 4 شاقىرىمى جانە قۇرساي كانالىنىڭ 31 شاقىرىمى, جالپى 35 شاقىرىم ءتۇپ تەرەڭدەتۋ جۇمىستارى اياقتالعان. ءتۇپ تەرەڭدەتۋ جانە بوگەت سالۋ جۇمىستارىنا 107 ارنايى تەحنيكا جۇمىلدىرىلعان.
جۇمىس كەستەگە ساي كوكتەمگە دەيىن تولىق اياقتالادى دەپ جوسپارلانىپ وتىر. دەپۋتاتتاردىڭ ايتۋىنشا, بۇل شارالار كوكتەمگى سۋ تاسقىنىنىڭ الدىن الۋعا جانە ايماقتىڭ ەكولوگيالىق جاعدايىن جاقسارتۋعا سەپتىگىن تيگىزەدى.
