مەكتەپ اسحاناسى مازىرىندە قانت پەن تۇز ازايتىلادى

دەنساۋلىق ساقتاۋ مينيسترلىگىنە قاراستى سانيتاريالىق-ەپيدەميولوگيالىق باقىلاۋ كوميتەتى جەتەكشى بەيىندى ساراپشىلارمەن بىرلەسىپ ءبىلىم بەرۋ ۇيىمدارىنا ارناپ ازىرلەگەن «ۇلگىلىك پەرسپەكتيۆالىق ءمازىر» – قاۋىپسىز, تەڭدەستىرىلگەن جانە عىلىمي نەگىزدەلگەن, بالالاردىڭ فيزيولوگيالىق قاجەتتىلىكتەرى مەن كالورياسىن ەسكەرە وتىرىپ جاسالعان, وندا جاس ەرەكشەلىك ساناتتارى, ماۋسىمدىلىعى, سونداي-اق اس بلوگى جوق مەكتەپتەردەگى بالالاردىڭ تاماقتانۋى ەسكەرىلگەن.

مازىردە ددۇ-نىڭ سەمىزدىك, قانت ديابەتى, جۇرەك-قان تامىرلارى جانە باسقا دا اۋرۋلاردىڭ دامۋ قاۋپىن ازايتۋ ءۇشىن قانت پەن تۇزدى ازايتۋ بويىنشا ۇسىنىستارى ەسكەرىلگەن. مىسالى, بالالار تاۋلىك بويى بولاتىن ۇيىمدار ءۇشىن قانت مولشەرى 6-10 جاس ەرەكشەلىك توبىندا – 55 گ-نان 15 گ-عا دەيىن, 11-14 جاس ەرەكشەلىك توبىندا – 70 گ-نان 21 گ-عا دەيىن, ياعني 3,3-3,6 ەسە ازايدى. تۇز 6-10 جاس ەرەكشەلىك توبىندا – 15 گ-نان 3 گ-عا دەيىن, 11-14 جاس ەرەكشەلىك توبىندا – 15 گ-نان 4,5 گ-عا دەيىن, ياعني 3,3-5 ەسە ازايدى.

نەگىزگى مازىرگە ەت, بالىق, كوكونىس تاعامدارى, جاڭا پىسكەن كوكونىستەن جاسالعان سالاتتار جانە قانت مولشەرى از سۋسىندار كىرەدى.

بالالاردىڭ ءوسۋى مەن دامۋى, سونداي-اق اۋرۋلاردىڭ الدىن الۋ ءۇشىن راتسيونعا مايى از ءسۇت, پروبيوتيكتەرى بار ءسۇت قىشقىلى ونىمدەرى كىرەدى, وعان قوسا كوكونىس پەن جەمىس-جيدەك كولەمى ارتتىرىلعان.