وندىرىستىك جانە الەۋمەتتىك نىسانداردى ارالادى

ماڭعاز ولكەدەگى 247 مۆت گيبريدتى ەلەكتر ستانساسىنىڭ قۇرىلىسى بىلتىر باستالعان. يننوۆاتسيالىق جوبا ەلىمىزدە ال­عاش رەت جۇزەگە اسىرىلىپ وتىر. ىسكە قوسىلعان سوڭ كومىرقىشقىل گازىنىڭ قالدىقتارىن ازايتادى ءارى 70 ادامدى جۇمىسپەن قامتي­دى. بۇل – «قازمۇنايگاز» ۇق جانە يتاليالىق «ENI» كومپانياسى­نىڭ بىرلەسكەن باستاماسى. باس مەردى­گەر – «Hi-Teck «Qazaqstan» سەرىكتەس­تىگى. ءماجىلىس دەپۋتاتتارى ەدىل جاڭ­بىرشين مەن سامات مۇساباەۆ ساپار بارىسىندا وسى ستانسا باسىنداعى جۇمىس قارقىنىن باقىلاپ قايتتى.

«كۇن ەلەكتر ستانساسى 50 مۆت, جەل ستانساسى 77 مۆت جانە گاز ستانساسى – 120 مۆت قۋاتپەن جۇمىس ىس­تەيدى. گيبريدتى ستانسا  جاڭا­وزەن قالاسىنداعى كاسىپورىندار­دى, مۇناي ءوندىرۋشى كومپانيالار مەن «قازمۇنايگاز» گاز وڭدەۋ زاۋىتىن ەلەكتر ەنەرگياسىمەن تۇراقتى تۇردە قامتاماسىز ەتەدى. ستانسا قۇرىلىسىن 2026 جىلى اياقتاۋ جوسپارلانعان», دەدى ە.جاڭ­بىرشين.

قۇرىلىسشىلارمەن اڭگىمەلە­سۋ بارىسىندا دەپۋتاتتار پارلا­مەنتتە قابىلدانعان زاڭدار­دىڭ جۇزەگە اسىرىلۋى جونىندە پىكىر الماستى. اسىرەسە «جەر قوي­ناۋى جانە جەر قويناۋىن پاي­دالا­نۋ» تۋرالى زاڭنىڭ ارتىق­شىلىق­تارىن ورتاعا سالىپ, بۇل قۇجات پرەزي­دەنتتىڭ قوعامدا ادىلدىك ورناتۋعا باعىتتاعانىنا نازار اۋداردى.

ال «Amanat» فراكتسياسىنىڭ مۇشەلەرى اسحات ايماعامبەتوۆ, نيكيتا شاتالوۆ, باۋىرجان سماعۇلوۆ, ءۇنزيلا شاپاق, ار­مان قالىقوۆ, قۇدايبەرگەن بەكسۇل­تانوۆ جانە تىلەكتەس ادامبەكوۆ تەمىرتاۋ قالاسىنداعى گاز تاراتۋ جەلىلەرىنىڭ قۇرىلىس بارىسىمەن تانىستى.

«قازىرگى تاڭدا 4 گاز تاراتۋ ستان­ساسى ىسكە قوسىلدى. جوسپاردا تاعى 4 ستانسانى ىسكە قوسىپ, كەيىن ابونەنتتەردى قوسۋ جۇمىستارى جۇرگىزىلەدى. مۇنىڭ بارلىعى ەكولو­گيالىق جانە الەۋمەتتىك جاعىنان وڭ اسەرىن بەرەدى, سەبەبى كومىرمەن جىلىتۋ قيىن ءارى قىم­بات. قازىر كومىردىڭ تونناسى شامامەن 25 مىڭ تەڭگە تۇرادى, ال كوگىلدىر وتىن ودان ارزان», دەدى دەپۋتات ب.سماعۇلوۆ. 

تەمىرتاۋدا تابيعي گاز 3 مىڭ­نان اسا ۇيگە قوسىلعان. الداعى ۋاقىتتا تاعى شامامەن 3 500 تۇر­عىن ءۇيدى گازبەن قامتۋ جوسپارلانىپ وتىر. ارمان قالىقوۆتىڭ ايتۋىن­شا, پرەزيدەنت ازاماتتاردى «كوگىلدىر وتىنعا» قوسۋ جۇمىس­تارىن جانداندىرۋدى بىرنەشە رەت تاپسىرعان بولاتىن. گازداندىرۋ كومىر گەنەراتسياسىن پايدالانۋدى ەداۋىر قىسقارتادى, ول اۋا تازالىعىن قامتاماسىز ەتەدى.

بۇعان قوسا ماجىلىسمەندەر «Qarmet» مەتاللۋرگيالىق كومبي­ناتىنىڭ گازعا كوشۋ بارىسىمەن تانىستى. كاسىپورىندا سىرتقى جانە ىشكى گاز قۇبىرى سالىنادى. جۇمىستاردىڭ 60 پايىزدان استامى اياقتالعان. كومبيناتتىڭ گازعا كوشۋى مازۋتتى پايدالانۋدان باس تارتۋعا مۇمكىندىك بەرىپ, اتموسفەراعا زياندى شىعارىن­دىلاردى كەم دەگەندە 30 پايىزعا قىسقارتۋعا جول اشادى.

دەپۋتاتتار جاناربەك ءاشىم­جا­نوۆ, ماكسيم روجين مەن ماقسات تولىقباي ىلە اۋدانى وتە­­گەن با­تىر اۋىلىنا ارنايى با­­­رىپ, مادە­نيەت ءۇيىنىڭ قۇرىلىس با­­رى­سىمەن تانىستى. وتەگەن باتىر اۋىلىنداعى 400 ورىندىق ما­دەنيەت ءۇيىنىڭ قۇرىلىسى بىرنەشە جىلعا سوزىلىپ كەلەدى. 2022 جىلى باستالعان جوبا بۇگىندە تەك جارتىلاي عانا اياقتالعان.

– بۇل – ءوڭىردىڭ الەۋمەتتىك دامۋى ءۇشىن وتە ماڭىزدى جوبا. نى­ساننىڭ قۇنى 2,2 ملرد تەڭگە دەپ بەكىتىلگەن. قارجى كەزەڭ-كەزەڭىمەن ءبولىنىپ كەلەدى. دەگەنمەن جۇمىس ءتيىستى دەڭگەيدە ورىندالماعان. 2023 جىلى پايدالانۋعا بەرىلۋى كەرەك ەدى, بىراق تەك جارتىسى عانا دايىن. قۇرىلىس توقتاپ تۇر. بۇل جەردە باقىلاۋدىڭ جەتكىلىكسىز­دىگى انىق بايقالادى. حالىققا ۋادە بەرىلگەن بولسا, ونى ورىنداۋ – ءبىزدىڭ ورتاق مىندەتىمىز. ءبىز بۇل ماسەلەنى قاتاڭ باقىلاۋعا الامىز جانە بارلىق جاۋاپتى تاراپتاردان ناقتى ارەكەت تالاپ ەتەمىز, – دەدى دەپۋتات م.روجين.

ىلە اۋداندىق قۇرىلىس ءبولىمى­نىڭ باسشىسى ايدوس كۇنەسبايدىڭ مالىمەتىنشە, وتكەن جىلدىڭ ساۋىرىند­ە مەرزىمدى تاعى ۇزارتۋ تۋرالى كەلىسىم جاسالىپ, جوبانىڭ اياقتالۋ ۋاقىتى 2025 جىلدىڭ شىلدەسىنە شەگەرىلدى. قازىرگى تاڭدا قۇرىلىستى تولىق اياقتاۋ ءۇشىن قوسىمشا 805 ملن تەڭگە قاجەت. قازىرگى ۋاقىتتا قۇرىلىسقا قاجەتتى قارجىنى ءبولۋ ماسەلەسى الماتى وبلىسىنىڭ بيۋدجەت كوميسسياسىنا جولدانباقشى.

«Respublica» پارتياسىنىڭ تەڭ توراعاسى, ءماجىلىس دەپۋتاتى رۋسلان بەردەنوۆ باتىس قازاق­ستاننىڭ رەسەيمەن شەكارا­دا­عى «سىرىم» باقىلاۋ-وتكىزۋ بەكە­تىندە بولىپ, شەكارالىق ينفرا­قۇرىلىمدى جاقسارتۋ ماسەلەلەرىن تالقىلادى. سونداي-اق ول وبلىس باسشىلىعىمەن, كاسىپكەرلەرمەن جانە بەلسەندى جاستارمەن كەزدەسۋلەر وتكىزىپ, ءوڭىر تۇرعىندارىنىڭ وزەكتى پروبلەمالارىن تىڭدادى.

جەتىسۋ وڭىرىنە جۇمىس ساپارى بارىسىندا ءماجىلىس دەپۋتاتى, «اق جول» پارتياسى فراك­تسيا­سى­نىڭ جەتەكشىسى ازات پەرۋا­شەۆ «تالدىقورعان» يندۋستريال­دى اي­ماعىندا بولدى. بىرقاتار كاسىپ­ورىننىڭ, سونىڭ ىشىندە «Asma Industrial» اككۋمۋلياتور زاۋى­تى­نىڭ جۇمىسىمەن تانىستى. ال ءماجىلىس دەپۋتاتى, جالپىۇلتتىق سوتسيال-دەموكراتيالىق پارتياسى فراكتسياسىنىڭ مۇشەسى اجار ساعاندىقوۆا شىمكەنت قالا­لىق توتەنشە جاعدايلار دەپار­تامەنتىنىڭ جۇمىسىمەن تانىسىپ, بىرنەشە ءورت ءسوندىرۋ بەكەتىن ارالادى.