– مەملەكەت باسشىسىنىڭ ەلدىك باستامالارىنىڭ ماڭىزىن ۋاقىتتىڭ ءوزى ايقىنداپ وتىر. ماعان جۇكتەلگەن ءبىرىنشى تاپسىرماسى وڭىردەگى كوممۋنالدىق-ەنەرگەتيكالىق سەكتوردى جاڭعىرتۋ بولاتىن. ءبىزدىڭ ايماقتا ەلەكتر جەلىلەرىنىڭ توزۋى 80,7%-عا جەتكەن. قازىر وڭىردە ەلەكتر جەلىلەرىن جاڭارتۋعا باعىتتالعان جۇمىس باستالدى. 2023-2024 جىلدارى ايماقتىق ەلەكتر جەلىلەرىن تاراتۋشى كاسىپورىننىڭ قاراجاتى ەسەبىنەن ءارتۇرلى كەرنەۋدەگى 2 744 كم ەلەكتر جەلىسىنە, 36 قوسالقى ستانساعا جانە 482 ترانسفورماتورلىق ستانساعا كۇردەلى جوندەۋ جاسالدى. بۇگىندە تۇرعىندارىمىز جايلى ءومىر ءسۇرۋى ءۇشىن ماڭىزدى كوممۋنالدىق نىسانداردىڭ قۇرىلىسى مەن جوندەۋ جۇمىسى اياقتالدى. جاڭادان قوسالقى ەلەكتر ستانسالارى پايدالانۋعا بەرىلدى. №3 كارىز-سورعى ستانساسى مەن №5 جىلۋ ماگيسترالى جاڭارتىلدى. بۇل نىساندار 1960-1970 جىلداردان بەرى جوندەۋ كورمەگەن. جاڭا ەلەكتر ستانساسى ورال قالاسىندا 120 مىڭ تۇرعىندى ەلەكتر قۋاتىمەن قامتاماسىز ەتەدى. №5 جىلۋ ماگيسترالى 70 مىڭ, №3 كارىز-سورعى ستانساسى 150 مىڭعا جۋىق پايدالانۋشىعا قىزمەت كورسەتەدى.
ورال قالاسى بويىنشا №2, №21, №18ا كارىز-سورعى ستانسالارىنا, №2 جىلۋ ماگيسترالىنە, №1 تۋربواگرەگاتقا قايتا جاڭارتۋ جۇمىسى باستالىپ, قالانىڭ سولتۇستىك-شىعىس بەتىندە جاڭا ەلەكتر قوسالقى ستانساسى سالىنىپ جاتىر. كەلەر جىلى №29 كارىز-سورعى جانە №20 سۋ كوتەرگىش ستانسالارىنىڭ قۇرىلىسىن باستايمىز. وسىلايشا, وبلىس ورتالىعىنىڭ سۋ اكەتۋ جانە سۋ كوتەرۋ نىساندارىنىڭ ءبارى دە جاڭعىرتىلىپ, ىسكە قوسىلادى.
ەنەرگەتيكا سالاسى بويىنشا ماڭىزدى ماسەلەنىڭ ءبىرى – وزگە ەلگە تاۋەلدىلىكتى ازايتۋ. قازىر ءبىزدىڭ جانىبەك جانە بوكەي ورداسى اۋداندارى ەلەكتر قۋاتىن رەسەيدەن الىپ تۇر. وسىعان بايلانىستى 5 مەگاۆاتتى گاز پورشەندى قوندىرعى ورناتۋ بويىنشا ەنەرگەتيكا مينيسترلىگىمەن كەلىسسوز جۇرگىزىلىپ جاتىر. وبلىستا 4 ەلدى مەكەن گازدى رەسەيدەن الادى. ولار: جانىبەك اۋدانىندا 3 اۋىل (قامىستى, بورسى, تالوۆ) جانە بايتەرەك اۋدانىندا 1 اۋىل (رازدولنوە). جانىبەك اۋدانىنداعى اۋىلدارعا ءوز گازىمىزدى جەتكىزۋ ءۇشىن مەردىگەر انىقتالدى. كەلەر جىلى قۇبىر تارتىلادى. ال بايتەرەك اۋدانى بويىنشا جوبا جاساقتالىپ جاتىر. بۇدان بولەك, مەملەكەت باسشىسى وتكەن جىلى وڭىرىمىزگە جۇمىس ساپارى بارىسىندا قاراشىعاناق كەن ورنىندا قۋاتتىلىعى جىلىنا 4 ملرد تەكشە مەتر گاز وڭدەۋ زاۋىتىن سالۋ جونىندە تاپسىرما بەردى. جاڭا گاز وڭدەۋ زاۋىتىنىڭ كەلەشەكتە ىسكە قوسىلۋى تاۋارلى گازبەن قامتاماسىز ەتۋگە مۇمكىندىك جاسايدى.
– بىلتىر باتىس قازاقستان وبلىسىندا بولعان الاپات سۋ تاسقىنى حالىققا قيىن ءتيدى. تاسقىن زاردابىن جويۋ باعىتىندا اتقارىلعان جۇمىس جايىندا ايتىپ بەرسەڭىز.
– ءيا, بىلتىرعى تابيعي اپات سالدارىنان 2 مىڭعا جۋىق تۇرعىن ءۇي, 15 مىڭداي ساياجاي سۋ استىندا قالدى. مەملەكەت باسشىسى تاپسىرماسىمەن ۇكىمەتتىڭ دەر كەزىندە قابىلداعان شارالارىنىڭ ارقاسىندا 9 994 وتباسىعا 3,6 ملرد تەڭگە كولەمىندە بىرجولعى الەۋمەتتىك كومەك تولەندى. 10 مىڭنان استام وتباسىعا شىعىندار ءۇشىن 3,7 ملرد تەڭگە ماتەريالدىق كومەك بەرىلدى. تۇرعىندار باسپاناسىن قالپىنا كەلتىرۋ ءۇشىن 4,3 ملرد تەڭگە جوندەۋگە ءبولىندى. 40,8 ملرد تەڭگەگە 1 939 پاتەر ساتىپ الىنىپ, 23,7 ملرد تەڭگەگە 889 جاڭا ءۇي سالىندى. قايىرىمدىلىق قورلارى ەسەبىنەن 69 وتباسى جاڭا باسپانا الدى.
وسى ءساتتى پايدالانا وتىرا, سۋ تاسقىنىنان زارداپ شەككەن تۇرعىندارعا, قيىن ساتتە قولۇشىن سوزعان بارشا ازاماتقا جانە دەمەۋشىلەرگە العىسىمدى بىلدىرەمىن.
– مۇنداي تاسقىن بيىل قايتالانباي ما؟ اپاتتىڭ الدىن الۋ ءۇشىن قانداي دايىندىق جاسالىپ جاتىر؟
– ارينە, كوكتەمگە دايىندىقتى وتكەن كۇزدىڭ العاشقى ايىنان باستاپ كەتتىك. قازىردىڭ وزىندە جايىق وزەنى بويىندا دامبالار سالىنىپ, سۋ تاسقىنى بولۋى مۇمكىن ايماقتار بەكىتىلىپ جاتىر. ەلدى مەكەندەردە قورعانىس بوگەتتەرىن ورناتۋ 2024 جىلعى ينجەنەرلىك جۇمىس جوسپارى شەڭبەرىندە جانە «دەمەۋ قازاقستان قورى» ەسەبىنەن جۇرگىزىلەدى. جالپى, 2025 جىلعى سۋ تاسقىنى كەزەڭىندە ەلدى مەكەندەردى تاسقىن سۋدان قورعاۋ ءۇشىن جالپى ۇزىندىعى 102 كم 54 قورعانىس بوگەتى ورناتىلدى.
– پرەزيدەنت العا قويىپ وتىرعان تاپسىرمانىڭ ءبىرى – وڭىرگە ينۆەستيتسيا تارتۋ, شاعىن جانە ورتا بيزنەستى دامىتۋ. وسى باعىتتا قانداي جوبالار بار؟
– سوڭعى ەكى جىلدا نەگىزگى كاپيتالعا سالىنعان ينۆەستيتسيا كولەمى 1,2 ترلن تەڭگە بولدى. سونىڭ ىشىندە جەكە ينۆەستيتسيانىڭ ۇلەسى – 900 ملرد تەڭگە. بۇل كەلگەن قارجىنىڭ 75%-ى جەكە ينۆەستيتسيا دەگەن ءسوز. سونىمەن قاتار سوڭعى ەكى جىلدا وبلىسىمىزعا سالىنعان تىكەلەي شەتەلدىك ينۆەستيتسيا كولەمى 1,8 ملرد دوللار بولدى. بۇگىنگە دەيىن ءوڭىردىڭ نەگىزگى ينۆەستورى – «قاراشىعاناق پەترولەۋم وپەرەيتينگ ب.ۆ.» كومپانياسى بولىپ كەلدى. ونىڭ ۇلەسىنە وڭىردەگى ينۆەستيتسيانىڭ شامامەن 60%-ى تيەسىلى. ارينە, ءبىر كومپانيانىڭ قىزمەتىنە وسىلايشا تاۋەلدى بولۋ ۇلكەن تاۋەكەل تۋعىزادى. سوندىقتان باتىس قازاقستان وبلىسى ءۇشىن ماڭىزدى مىندەتتىڭ ءبىرى – ءوڭىر ەكونوميكاسىن ءارتاراپتاندىرۋ. مەملەكەت باسشىسىنىڭ تاپسىرماسىن ورىنداۋ اياسىندا وڭىردە سوڭعى ەكى جىلدىڭ وزىندە 39,2 ملرد تەڭگەگە 55 ينۆەستيتسيالىق جوبا ىسكە قوسىلىپ, 1 مىڭنان استام جاڭا جۇمىس ورنى قۇرىلدى. الداعى 5 جىلدا 2,4 ترلن تەڭگەگە 42 ينۆەستيتسيالىق جوبانى ىسكە اسىرۋ جوسپاردا تۇر. بۇل وڭىردە 10 مىڭنان استام جۇمىس ورنى اشىلادى دەگەن ءسوز.
2024 جىلدىڭ قازان ايىندا مۇناي-گاز سالاسىنا قاجەتتى جابدىقتاردى وندىرەتىن «KaspiMunayKapital» زاۋىتى ىسكە قوسىلدى. وسىلايشا, شيكىزات وندىرىسىنە قاجەتتى قۇرال-جابدىقتى وزىمىزدەن شىعارۋعا مۇمكىندىك الدىق. وتكەن قاراشادا جاھاندىق ينۆەستيتسيالار جونىندەگى دوڭگەلەك ۇستەل اياسىندا پرەمەر-ءمينيستردىڭ قاتىسۋىمەن 81 ملرد تەڭگەگە وڭتۇستىك كورەيالىق ينۆەستورمەن مەموراندۋمعا قول قويىلدى. بۇدان بولەك, الداعى جىلدارى بىرقاتار ماڭىزدى ينۆەستيتسييالىق جوبا ىسكە اسىرىلادى. ولار:
- «قازاق كاليۋم» كومپانياسىنىڭ ء«ساتيمولا» كەن ورنىندا كالي تۇزدارىن ءوندىرۋ بويىنشا بايىتۋ-وندىرىستىك كەشەنىن سالۋ جوباسى;
- قىتايلىق «China Energy» ينۆەستورىمەن بىرلەسىپ, 2028 جىلعا دەيىن ارقايسىنىڭ قۋاتى 100 مۆت بولاتىن 2 گتەس سالۋ جوسپارى;
- «Bilgili Group» تۇرىك كومپانياسىمەن بىرلەسىپ, تۇرمىستىق حيميا ءوندىرىسى جولعا قويىلادى (38 جاڭا جۇمىس ورنى);
- ورال ترانسفورماتور زاۋىتىنىڭ بازاسىندا اليۋميني بۇيىمدارىن ءوندىرۋ («Ural Electric» جشس, 10 جۇمىس ورنى);
- قۋاتى 15 مىڭ توننالىق 2 كوكونىس قويماسىن سالۋ («Baystone» جشس, «ورال اگرو» جشس).
شاعىن جانە ورتا بيزنەس باعىتىندا دا بىرقاتار باستاما بار. وبلىستا 58 مىڭنان استام شاعىن جانە ورتا بيزنەس نىسانىندا 130 مىڭ ادام جۇمىس ىستەيدى. شاعىن جانە ورتا بيزنەستى دامىتۋعا 2023-2024 جىلدارى 38,1 ملرد تەڭگە ءبولىنىپ, 6 مىڭنان استام جوباعا قولداۋ كورسەتىلدى.
– اۋىلداردى ساپالى اۋىزسۋمەن قامتۋ, گازداندىرۋ باعىتىندا قانداي جۇمىس اتقارىلىپ جاتىر؟
– سوڭعى ەكى جىلدا 32 اۋىل ساپالى اۋىزسۋمەن قامتاماسىز ەتىلدى. ءسويتىپ, 12 ملرد تەڭگەگە 71 جوبا جۇزەگە اسىپ, 8,1 مىڭ تۇرعىن تازا سۋعا قول جەتكىزدى. 2024 جىلدىڭ سوڭىندا اۋىل حالقىنىڭ 97%-ى ساپالى اۋىزسۋمەن قامتىلدى. قازىر 310 اۋىل تازا سۋ تۇتىنادى. بۇل – وڭىردەگى بارلىق ەلدى مەكەننىڭ 75%-ى. 2023 جىلى 7 اۋىل جانە 17 اۋىلداعى 49 الەۋمەتتىك نىسان تابيعي گازعا قوسىلعان ەدى. بۇل ءۇشىن وبلىستىق بيۋدجەتتەن 1 ملرد تەڭگەگە جۋىق قاراجات جۇمسالدى. بۇگىندە وبلىس تۇرعىندارىنىڭ تابيعي گازبەن قامتىلۋى 99,7%-عا جەتتى. 2025 جىلى تاعى 11 اۋىلعا تابيعي گاز تارتىلادى.
– استاناداعى بريفينگتە 2020-2022 جىلدارى باستالىپ, تۇرىپ قالعان نىساندار جايىندا ايتىپ ەدىڭىز.
– باتىس قازاقستان وبلىسىندا 2020-2022 جىلدارى باستالىپ, اياقتالماعان 55 الەۋمەتتىك نىسان تىركەلگەن بولاتىن. بۇگىندە ولاردىڭ قۇرىلىسى تولىق اياقتالدى. بۇل حالىق ءۇشىن اسا ماڭىزدى سۋ قۇبىرى, مەكتەپ, سپورتتىق نىسان, جول, ينجەنەرلىك جەلى, تۇرعىن ءۇي, مادەنيەت پەن دەنساۋلىق ساقتاۋ نىساندارى بولاتىن. ءبىز جوسىقسىز مەردىگەرلەردى جاۋاپقا تارتىپ, ءتيىستى قاراجات كوزدەرىن تاۋىپ, ماسەلەگە نۇكتە قويدىق.
– وتكەن جىلى بوكەي وردا جانە جانىبەك اۋداندارىنا سالىنىپ جاتقان جول قۇرىلىسى اياقتالدى...
– ءيا, وبلىس تۇرعىندارىن ءاردايىم تولعاندىراتىن ماسەلەنىڭ ءبىرى – جولدىڭ ساپاسى. مەملەكەت باسشىسىنىڭ تاپسىرماسىنا سايكەس, سوڭعى ەكى جىلدا وبلىستا 174 ملرد تەڭگەگە 1 مىڭ شاقىرىمنان اسا جول جوندەلدى. 2023 جىلى 137,4 كم رەسپۋبليكالىق, 290,8 كم وبلىستىق جانە اۋداندىق جول جانە 134 كم كوشە جەلىلەرى جاڭارتىلدى. 2024 جىلى رەسپۋبليكالىق دارەجەدەگى – 77,8 كم, وبلىستىق جانە اۋداندىق دەڭگەيدەگى 242,6 كم جول جاڭارتىلىپ, 125,8 شاقىرىم كوشەگە اسفالت توسەلدى. بيىل دا 500 شاقىرىمعا جۋىق جولدى جوندەۋ جوسپارلانىپ وتىر.
– سوڭعى كەزدە وبلىستا الەۋمەتتىك نىساندار دا كوپتەپ بوي كوتەرە باستاعانداي؟
– راس ايتاسىز, ءبىلىم سالاسىندا 2023 جىلى 16 جاڭا مەكتەپتىڭ قۇرىلىسى اياقتالىپ, پايدالانۋعا بەرىلسە, وتكەن جىلى جاڭادان 6 مەكتەپ سالىندى. بيىل «جايلى مەكتەپ» باعدارلاماسى بويىنشا 6 مەكتەپ قۇرىلىسى جۇرەدى. بۇعان قوسا 8 مەكتەپتىڭ قۇرىلىسىن باستايمىز. سونىمەن قاتار وسى جىلى 5 مەكتەپتى كۇردەلى جوندەۋدەن وتكىزۋ جوسپارلانىپ وتىر. وسى جۇمىستار وبلىستاعى ءۇش اۋىسىمدى جانە وقۋ ورنى تاپشىلىعى بار مەكتەپتەردىڭ ماسەلەسىن شەشۋگە مۇمكىندىك بەرەدى.
«اۋىلدىق دەنساۋلىق ساقتاۋدى جاڭعىرتۋ» جوباسى اياسىندا 2025 جىلعا دەيىن جاڭا 50 نىسان قۇرىلىسى جوسپارلانىپ, 2023 جىلى 12-ءسى پايدالانۋعا بەرىلدى. وتكەن جىلى 38 نىساننىڭ قۇرىلىسى ءجۇردى. وعان قوسا, 13 نىسان كۇردەلى جوندەۋدەن ءوتىپ جاتىر. مادەنيەت سالاسىندا قورجىن, كونەككەتكەن, قابىرشاقتى, ماكاروۆ, كوشىم, اتامەكەن, ولەڭتى اۋىلدارىندا جاڭا نىسان سالىنىپ, ءۇش نىسان كۇردەلى جوندەۋدەن وتەدى. سونىمەن بىرگە بىلتىر اۋىل كىتاپحانالارىن قايتا جاڭعىرتۋ ماقساتىندا «قازاقستان حالقىنا» قوعامدىق قورىنىڭ قولداۋىمەن اۋىلدىق جەردە 25 كىتاپحانانى جاڭعىرتۋ جوباسى جۇزەگە استى. قور بولگەن قاراجاتقا كىتاپحانالارعا زاماناۋي قۇرال-جابدىق, جيھاز ساتىپ الىنىپ, كىتاپ قورى تولىقتىرىلادى. جىل اياعىندا بۇل جۇمىستى اياقتايمىز.
ورالدا كۇردەلى جوندەۋدەن ءوتىپ جاتقان مادەنيەت جانە جاستار ءۇيى عيماراتىندا «سامۇرىق قازىنا» قورىنىڭ قولداۋىمەن «كرەاتيۆتى حاب» ىسكە قوسىلادى. حاب وڭىردەگى جاستار شىعارماشىلىعىن دامىتۋعا باعىتتالعان. سپورت ينفراقۇرىلىمىن دامىتۋ ماقساتىندا بىلتىر 2 دەنەشىنىقتىرۋ-ساۋىقتىرۋ كەشەنى جانە 1 ءمودۋلدى سپورت كەشەنى پايدالانۋعا بەرىلدى. پرەزيدەنتتىڭ 2023 جىلى وڭىرگە جۇمىس ساپارى بارىسىندا بەرگەن تاپسىرماسىنا سايكەس, ورال قالاسىندا مىڭ ورىندىق كوپفۋنكتسيونالدى سپورت كەشەنى اشىلدى. ەندىگى كەزەكتە وبلىستىڭ ءىرى اۋىلدارىن سپورت نىساندارىمەن قامتۋدى باستاپ كەتتىك. بۇگىندە 7 اۋىلعا وسىنداي سپورت كەشەن سالىنسا, كەلەسى جىلى جاقسىباي, ۇيالى, شوپتىكول, داريان, اقجايىق, اقپاتەر اۋىلدارىندا 6 سپورت كەشەنىن سالامىز.
– اۋىل شارۋاشىلىعى سالاسىندا قانداي جاڭالىق بار؟
– مەملەكەت تاراپىنان بۇل سالانى قولداۋعا 2023-2024 جىلدارى 114 ملرد تەڭگە قاراجات ءبولىنىپ, اۋىل شارۋاشىلىعى قۇرىلىمدارىنا بەرىلدى. 2024 جىلى الىنعان تولىمەن بىرگە ۇساق مالدىڭ سانى 2 ملن-عا جۋىقتادى, ءىرى قارا 1 ملن, جىلقى 350 مىڭنان اسىپ, تۇيە 3 مىڭ باسقا جەتتى. ناتيجەسىندە, وبلىسىمىز ەتتى جانە ەتتى-ءسۇتتى ءىرى قارا مال باسى مەن اسىل تۇقىمدى مال شارۋاشىلىعى بويىنشا رەسپۋبليكاداعى ەڭ ءىرى ءوڭىردىڭ ءبىرى بولدى. قازىر ءبىزدىڭ وبلىس كورشىلەس وڭىرلەردى دە ەت ونىمدەرىمەن قامتىپ وتىر. «اۋىل اماناتى» باعدارلاماسى اياسىندا ەكى جىلدا 9 ملرد تەڭگەگە جۋىق قارجى ءبولىنىپ, اۋىلدىق جەردە 1,5 مىڭنان استام جاڭا جۇمىس ورنى قۇرىلدى.
نەسيەگە قول جەتكىزە المايتىن, حالىقتىڭ الەۋمەتتىك وسال توپتارىنا تاۋارلىق نەسيە بەرۋ جۇزەگە استى. قازىر 215 وتباسىعا تاۋارلىق نەسيە رەتىندە 354 سيىر, 535 قوي-ەشكى جانە 86 جىلقى بەرىلدى. بۇل جۇمىس جالعاسادى.
وتكەن جىلى وڭىردەگى ەڭ ءىرى «قاراشىعاناق» مۇناي-گاز كومپانياسىمەن مەموراندۋمعا وتىرىپ, باعدارلاما اياسىندا كاسىپ اشقان تۇرعىنداردىڭ ونىمدەرىن زاكىرلىك كووپەراتسيالار ارقىلى كپو كومپانياسىنا تىكەلەي ساتۋ ۇيىمداستىرىلدى. ءسويتىپ, «باتىس ءسۇت» كەشەنى – ءسۇت ونىمدەرىن, «ورال قۇس فابريكاسى» – جۇمىرتقاسىن, «باتىس نىق» كومپانياسى – سيىر ەتىن, «رۋبەجينسكي» اشوك – كوكونىستى, «شالقار قۇس» كەشەنى تاۋىق ەتىن شەتەلدىك كومپانياعا ۇسىندى. سونىمەن قاتار ءبىزدىڭ وڭىردەگى اۋىل شارۋاشىلىعى كووپەراتيۆتەرى وندىرگەن ءونىمدى كەدەرگىسىز وتكىزۋ ءۇشىن ماڭعىستاۋ وبلىسىنىڭ الەۋمەتتىك كاسىپكەرلىك كورپوراتسياسى قورىنا ۇنەمى وتكىزىپ وتىرۋ بويىنشا كەلىسسوز ءجۇرىپ جاتىر.
– «قالادان اۋىلعا» باعدارلاماسى جايىندا «Egemen Qazaqstan» گازەتى ارنايى ماقالا جاريالاعان ەدى. باعدارلامانىڭ قازىرگى ناتيجەسى قانداي؟
– بۇل قاناتقاقتى جوبا اۋىلدىق جەردە جۇمىس كۇشى تاپشىلىعىن جويۋ, اگروونەركاسىپتىك كەشەننىڭ تۇراقتى دامۋىن ساقتاۋ ماقساتىندا قولعا الىنعان ەدى. 2024-2026 جىلدارعا ارنالعان جوبا بويىنشا قونىس اۋدارۋ ءۇشىن 57 اۋىل بەلگىلەندى. ءبىز وسى اۋىلدارعا 120 وتباسىن كوشىرۋدى جوسپارلادىق. قازىرگى ناتيجە بويىنشا 87 وتباسى قونىس اۋداردى.
– وبلىستى جان-جاقتى دامىتۋ بويىنشا الدا تاعى قانداي جوسپار بار؟
– جوسپار كوپ. مەملەكەت باسشىسىنىڭ «اnا tili» گازەتىنە بەرگەن سۇحباتىندا ايتىلعانداي, ءبىرىنشى كەزەكتە تۇرعىنداردىڭ ءال-اۋقاتىن ارتتىرۋ باعىتىندا الەۋمەتتىك ينفراقۇرىلىمدى جاڭعىرتۋ جۇمىستارى جالعاسادى. اتاپ ايتقاندا, تۇرعىن ءۇي شارۋاشىلىعىن, ەنەرگەتيكا نىساندارىن جاڭعىرتۋ, اۋىلدى كوركەيتۋ, ساپالى جول سالۋ, تۇرعىن ءۇي قۇرىلىسىن ارتتىرۋ سياقتى ماڭىزدى سالالارعا باسىمدىق بەرەمىز. سونداي-اق وتاندىق ءونىم شىعارۋ باعىتىندا كوپ ءىس اتقارۋىمىز كەرەك. وڭىردە قايتا وڭدەۋ سالاسىنداعى كاسىپورىنداردىڭ سانىن ارتتىرىپ, ايماق ەكونوميكاسىن العا جىلجىتۋ – باستى ماقساتىمىز. ينۆەستيتسيا تارتۋ, جاڭا جۇمىس ورىندارىن اشۋ باعىتىندا جۇمىس ودان ءارى جالعاسادى.
اڭگىمەلەسكەن –
قازبەك قۇتتىمۇرات ۇلى,
«Egemen Qazaqstan»
