فوتو: aa.com.tr
ساۋالناما كەلەسى پارامەترلەردى قامتىدى: Brent ماركالى مۇناي باعاسى, قازاقستان ەكونوميكاسىنىڭ ءوسۋى, ينفلياتسيا, بازالىق مولشەرلەمە, تاۋارلار مەن قىزمەتتەردىڭ ەكسپورتى مەن يمپورتى, ۇلتتىق ۆاليۋتا باعامى.
مەدياندىق باعالاۋلار بويىنشا, Brent ماركالى مۇنايدىڭ باعاسى 2025 جىلى باررەلىنە 75 دوللاردى قۇرايدى (بۇرىن باررەلىنە 76,5 دوللار). 2026 جىلعا ارنالعان بولجام باررەلىنە 74 دوللار دەڭگەيىندە ساقتالادى. 2027 جىلعا ارنالعان بولجام باررەلىنە 75 دوللار دەڭگەيىندە بەلگىلەنگەن.
ساراپشىلاردىڭ بولجامى بويىنشا, قازاقستاننىڭ 2025 جانە 2026 جىلدارداعى ەكونوميكالىق ءوسىمى وزگەرىسسىز قالادى جانە سايكەسىنشە 4,7 جانە 4,5 پايىزدى قۇرايدى. 2027 جىلى ەكونوميكانىڭ ءوسۋ قارقىنى 4,5 پايىز دەڭگەيىندە ساقتالادى.
بۇل رەتتە ساراپشىلار 2025 جىلعا ارنالعان ينفلياتسيا بولجامىن 6,9 پايىزدان 7,5 پايىزعا, ال 2026 جىلعا 6 پايىزدان 6,5 پايىزعا ارتتىردى. 2027 جىلى ينفلياتسيا 5,6 پايىزدى قۇرايدى.
«2025 جىلعا ارنالعان بولجامنىڭ مەديانالىق ءمانى 12,5 پايىزدان 14,7 پايىزعا, 2026 جىلعا - 10,3 پايىزدان 11,8 پايىزعا دەيىن تۇزەتىلدى. 2027 جىلعا بازالىق مولشەرلەمە 10,5 پايىز دەڭگەيىندە بولجانعان», دەلىنگەن اقپاراتتا.
ايتا كەتەيىك, ساۋالناماعا قازاقستان بويىنشا ماكروەكونوميكالىق كورسەتكىشتەردى تالداۋ جانە بولجاۋمەن اينالىساتىن 12 ۇيىم قاتىسقانى كورسەتىلگەن. رەسپوندەنتتەرگە نارىقتىڭ كاسىبي قاتىسۋشىلارى, زەرتتەۋ ينستيتۋتتارى, حالىقارالىق ۇيىمدار جانە رەيتينگتىك اگەنتتىكتەر كىرەدى.
ەستەرىڭىزگە سالا كەتەيىك, 29 قاراشادا ۇلتتىق بانك بازالىق مولشەرلەمەنى +/- 1 پايىزدىق تارماق دالىزىمەن جىلدىق 14,25-تەن 15,25 پايىزعا دەيىن كوتەرگەن بولاتىن. جەلتوقساندا قازاقستانداعى ينفلياتسيا باسەڭدەدى.
