كوللاجدى جاساعان – امانگەلدى قياس, «EQ»
وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ باسشىسى بەردىبەك كارتباەۆتىڭ ايتۋىنشا, 2025 جىلعى 1 قاڭتاردان باستاپ «ەلەكتر ەنەرگەتيكاسى تۋرالى» زاڭعا ەنگىزىلگەن وزگەرىستەر اياسىندا سوڭعى تۇتىنۋشىلارعا ەلەكتر ەنەرگياسىن ساتۋمەن اينالىساتىن ەنەرگيامەن جابدىقتاۋشى ۇيىمدار تاراتىلادى. بۇدان بىلاي ولاردىڭ فۋنكتسياسىن ەنەرگيا بەرۋشى ۇيىمدار ورىندايدى.
«وبلىستا 2025 جىلدان باستاپ ەنەرگيامەن جابدىقتاۋشى ۇيىمنىڭ مىندەتتەرىن ءتيىستى ليتسەنزيا العان «ماڭعىستاۋ وڭىرلىك ەلەكترجەلىلىك كومپانياسى» اكتسيونەرلىك قوعامى, ياعني موەك ەنەرگيا بەرۋشى ۇيىمى ءوز موينىنا الادى. بۇرىن تۇتىنۋشىلارعا قىزمەت كورسەتكەن «ماڭعىستاۋ جارىق» جشس ەلەكترمەن جابدىقتاۋ قىزمەتىن توقتاتادى. ەنەرگيامەن جابدىقتاۋعا بايلانىستى بارلىق قىزمەت ءبىر ۇيىم ارقىلى ۇسىنىلادى. بۇل ءوزارا ءىس-قيمىل ۇدەرىسىن جەڭىلدەتەدى جانە كەز كەلگەن تۇيتكىلدى تەز شەشۋگە مۇمكىندىك بەرەدى», دەپ ءتۇسىندىردى بەردىبەك كارتباەۆ.
«ماڭعىستاۋ وڭىرلىك ەلەكترجەلىلىك كومپانياسى» اق توراعاسى قاسىمحان سىزدىقوۆتىڭ سوزىنشە, تۇرمىستىق تۇتىنۋشىلارعا بايلانىستى وزگەرىس از بولادى. تۇرمىستىق تۇتىنۋشىلار ەلەكترمەن جابدىقتاۋدىڭ ۇلگىلىك شارتى نەگىزىندە ەلەكتر ەنەرگياسىن الۋدى جالعاستىرادى.
ء«بىزدىڭ كاسىپورىننىڭ باسىمدىقتارىنىڭ ءبىرى – ونىڭ بارلىق قىزمەتىنىڭ جاريالىلىعى مەن اشىقتىعى. اكتسيونەرلىك قوعام ءوڭىردى ۇزدىكسىز ءارى تۇراقتى ەنەرگيامەن جابدىقتاۋ جونىندەگى ءوز مىندەتىن تولىق ءتۇسىنىپ, تۇتىنۋشىلارمەن اشىق ديالوگ فورماتىندا قارىم-قاتىناس ورناتادى. كومپانيا ەلەكتر ەنەرگياسىمەن قامتاماسىز ەتۋ بويىنشا مىندەتتەردى ءوز موينىنا الىپ قانا قويماي, جىل سايىن ءوڭىر ينفراقۇرىلىمىن دامىتۋعا قاتىستى بەلسەندى جۇمىس ىستەپ كەلە جاتىر. وسى جۇمىس اياسىندا ءبىز جەلىلەردى جاڭعىرتۋمەن, وزىق تەحنولوگيالاردى ەنگىزۋمەن جانە ەنەرگيا جۇيەسىنىڭ سەنىمدىلىگىن ارتتىرۋمەن اينالىسامىز», دەدى قاسىمحان سىزدىقوۆ.
جۇمىس ورىندارىن ساقتاۋ ماقساتىندا «ماڭعىستاۋ جارىق» جشس قىزمەتكەرلەرى موەك شتاتىنا بىرىكتىرىلمەك.
«وڭىردەگى الەۋمەتتىك تۇراقتىلىقتىڭ ماڭىزىن تۇسىنەمىز. جۇمىس ورىندارىن ساقتاۋ – قىزمەتكەرلەردى قولداۋ عانا ەمەس, سونىمەن قاتار قوعامنىڭ تۇراقتى دامۋىنا قوسىلعان ۇلەس», دەدى قاسىمحان سىزدىقوۆ.
«ماڭعىستاۋ جارىق» جشس باس ديرەكتورى ايدوس ابەنوۆ قاڭتاردىڭ باسىندا الىنعان «ماڭعىستاۋ جارىق» تۇبىرتەكتەرىندە كورسەتىلگەن بۇرىن جيناقتالعان بەرەشەك جانە اعىمداعى ەسەپتەۋلەر بويىنشا ەلەكتر ەنەرگياسى ءۇشىن تولەمدى بەلگىلەنگەن تارتىپپەن موەك اتىنا جۇرگىزۋ قاجەت ەكەنىن ءتۇسىندىردى. «تۇتىنۋشىلارعا ىڭعايلى بولۋ ءۇشىن جانە قاتە تولەمدەر جاعدايلارىن بولدىرماۋ ءۇشىن, سونداي-اق موەك الدىنداعى كرەديتورلىق بەرەشەكتى ەسكەرە وتىرىپ, تۇتىنۋشىلاردىڭ دەبيتورلىق بەرەشەگىن «ماڭعىستاۋ وڭىرلىك ەلەكترجەلىلىك كومپانياسى» اق-عا بەرۋ تۋرالى بىرلەسكەن شەشىم قابىلداندى» دەپ ءتۇسىندىردى ايدوس ابەنوۆ.
جاڭا جىل قارساڭىندا جەتكەن جاڭالىق وسىنداي. ەندى وندىرۋشىدەن ەلەكتر ەنەرگياسىن تۇتىنۋشىعا دەيىن جەتكىزۋ جانە ءتۇرلى قاجەتتىلىككە وراي جەلىلەردە ايىرۋ-قوسۋ جۇمىستارىن جۇرگىزۋ, ەسەپتەگىشتەردى تەكسەرۋ, وزگە دە ەلەكتردى تاسىمالداۋ مەن جابدىقتاۋعا قاتىستى ءىرىلى-ۇساقتى جۇمىستاردىڭ ءبارى سەنىمدى ءبىر قولعا ءوتتى.
«دەلدالداردىڭ ەلەكتر ەنەرگياسىن تاسىمالداۋشى نارىعىنان كەتۋىن قولداپ, ءتيىستى مينيسترلىكتەرگە شاعىمدانعان ەدىك. داۋلى ماسەلە توڭىرەگىندە حالىق اراسىنان تابىلا بىلگەن «Egemen Qazaqstan» گازەتىنە دە العىسىمىز شەكسىز. ارينە, تەگىن ەشتەڭە جوق, تۇتىنعان قىزمەتتىڭ اقىسىن تولەۋگە مىندەتتىمىز. بىراق ەكى ورتادا حالىق ەسەبىنەن اقشا تاباتىندارعا شەكتەۋ بولۋعا ءتيىس», دەيدى سايىن اۋلىنىڭ تۇرعىنى, قوعام بەلسەندىسى سىرعالاي مەڭدىباي.
ماڭعىستاۋ وبلىسى
