مينيسترلىكتە وتكەن سالتاناتتا ەكى فەلدشەر «دەنساۋلىق ساقتاۋ ءىسىنىڭ ۇزدىگى» توسبەلگىسىن وڭىرىنە تاقسا, ءتورت فەلدشەر قۇرمەت گراموتاسىن الدى. بارلىق التى فەلدشەر دە جەدەل مەديتسينالىق جاردەم قاۋىمداستىعىنىڭ «ۇزدىك قىزمەتكەر» توسبەلگىسىمەن ماراپاتتالدى. كەزدەسۋدە ا.ءالنازاروۆا سالادا ىسكە اسىپ جاتقان اۋقىمدى جوبا-جوسپارلاردىڭ رەتىن باياندادى.
«مەملەكەت باسشىسىنىڭ تاپسىرماسىمەن وتكەن جىلعى 19 ساۋىردە مەديتسينا قىزمەتكەرلەرىنىڭ كاسىبي جاۋاپكەرشىلىگىن ساقتاندىرۋ تەتىگى ەنگىزىلدى. مەديتسينا قىزمەتكەرلەرىنىڭ مارتەبەسىن كوتەرۋگە, زاڭگەرلىك, قارجىلىق جاعىنان قورعاۋعا باعىتتالعان ماڭىزدى زاڭعا قول قويىلدى. الەۋمەتتىك قولداۋعا باسىمدىق بەرىلدى. ەل كولەمىندە جەدەل مەديتسينالىق جاردەم قىزمەتىن 20 دەربەس ستانسا, 98 قالالىق كىشى ستانسا, 232 اۋداندىق بولىمشە كورسەتەدى. ولار وتكەن جىلى 7 ميلليوننان استام شاقىرتۋعا بارعان. وبلىستىق, قالالىق جەدەل جاردەم ستانسالارىندا ءبىر اۋىسىمدا 1 491 كوشپەلى بريگادا جۇمىس ىستەيدى. جەدەلدىلىكتىڭ 4-ساناتىنداعى شاقىرتۋلارعا قىزمەت كورسەتۋ ۇيىمدارىنىڭ جانىنداعى جمج بولىمشەلەرىندە 446 بريگادا بار. جەدەل جاردەم بريگادالارىنىڭ ءتيىستى قۇرال جابدىعىن تۇگەندەۋگە كوڭىل ءبولىنىپ كەلەدى. جەرگىلىكتى اتقارۋشى ورگاندار 150-گە جۋىق مەديتسينالىق سانيتارلىق كولىك ساتىپ الدى. بيىل 350-گە جۋىق كولىك جەدەل جاردەم قىزمەتىنە بەرىلەدى. جەدەل جاردەمنىڭ ساپالى قىزمەت كورسەتۋى ءۇشىن ءتيىستى زاڭدارعا وزگەرىستەر ەنگىزىپ, تاريف ماسەلەسىن قايتا قاراپ, ىنتالاندىرۋ جۇمىستارىنا قاتىستى شارالاردى باتىل قولعا الدىق, بۇل جۇمىستاردى الداعى ۋاقىتتا دا جالعاستىرۋدى جوسپارلاپ وتىرمىز», دەدى ا.ءالنازاروۆا.
مينيستر سۋ تاسقىنى كەزىندە, اقتۇتەك بوراندا, ءورت ءسوندىرۋ بارىسىندا توتەنشە جاعدايلار مينيسترلىگىنىڭ قىزمەتكەرلەرىمەن يىق تىرەسە ءوز مىندەتىن ابىرويمەن اتقارعان فەلدشەرلەردى قۇتتىقتاپ, جۇرەكجاردى لەبىزىن ءبىلدىردى.
«سىزدەر ىلعي دا باتىلدىق پەن قايسارلىقتىڭ ۇلگىسىن كورسەتىپ جۇرسىزدەر. نەبىر قيىندىقتارعا قاراماستان كاسىبي مىندەتتەرىڭىزگە ادالدىق تانىتاسىزدار. تۇرعىنداردى اۋىر جاعدايعا قالدىرمايتىن ناعىز باتىرسىزدار. كەشەگى اقتاۋ ماڭىنداعى ۇشاق اپاتىنا دا ساقاداي سايلانىپ, جەدەل جەتكەن ارىپتەستەرىمىز ءوز مىندەتتەرىن ابىرويلى ورىنداپ, ناعىز بىلىكتى ماماندار ەكەنىن كورسەتتى. ەلىمىزدىڭ بارلىق ايماعىندا وزدەرىڭىز سەكىلدى ءمىنسىز ەڭبەك ەتىپ جۇرگەن جەدەل جاردەم قىزمەتكەرلەرىنە العىسىمدى بىلدىرەمىن», دەپ تۇيىندەدى مينيستر.
ماراپاتتالعان فەلدشەرلەردىڭ ىشىندە قارقارالى اۋدانىنداعى دالا ءورتى كەزىندە تۇرعىندارعا مەديتسينالىق, ەۆوكۋاتسيالىق كومەك كورسەتىپ, ەرلىك تانىتقان گۇلناز بورانبايقىزى, پاتسيەنتكە جەتۋ ءۇشىن مۇزداي سۋعا تۇسۋدەن تايىنباعان قامىستى جەدەل جاردەم ستانساسىنىڭ فەلدشەرى سەرگەي ۆولكوۆ, بوراندى كۇنى بوساناتىن ايەلگە جەتۋگە اسىققان ءمادينا احمەتجانوۆا بار. دەنساۋلىق ساقتاۋ مينيسترلىگىنىڭ قۇرمەت گراموتاسىمەن ماراپاتتالعان ماماننىڭ ءبىرى – انەل بايمىرزينا. ول قىزمەت بارىسىندا ناۋقاستىڭ تۋىستارىنان سوققىعا جىعىلىپ, قازىر ستاتسيونارلىق ەم الىپ جاتقان سوڭ, كەزدەسۋگە كەلە المادى.
وتكەن جىلى مەملەكەت باسشىسىنىڭ باستاماسىمەن ءۇش دارىگەر «قازاقستاننىڭ ەڭبەك سىڭىرگەن دارىگەرى» قۇرمەتتى اتاعىن الدى. ولارعا 1000 ەسەلەنگەن اەك مولشەرىندە بىرجولعى ىنتالاندىرۋ سىيلىعى بەرىلدى.
جاقىندا مەديتسينا, فارماتسەۆتيكا قىزمەتكەرلەرىنىڭ اراسىندا وتكەن «كاسىبىنىڭ ۇزدىگى» رەسپۋبليكالىق كونكۋرسىنىڭ جەڭىمپازدارى انىقتالدى. ۇزدىك دەپ تانىلعان 16 نوميناتسيانىڭ جەڭىمپازى 500 اەك مولشەرىندە اقشالاي سىياقى الدى.
